Read Kissi Sakari 12 Bible Online

Sakari 12 - Kissi bible

Sakari 12

¹Sɔɛi Mɛlɛka dimi a Israɛlla o kɔɔ-e. Nuaa Mɛlɛka, o pɛngɛla halataala-o, o cɔw lɛŋnden mó cɔaw yoomu vanacieo-vo dimi ni aa:

²«I co Yerusalɛm siinguu maa taala kólaa pɛ a mɔima kɔl ni fulaa-o, le vanaa-mangalaa-isɔaa balu ndu-a kpow. Lende koni ɲɔɔ vanin le tàndá Yuda-o lɔ́ɔ́ vannda tiilanin Yerusalɛm-ndo ni.

³Paale len, i siinguunin Yerusalɛm maa pow lusulaa le vanaa-mangalaa-isɔɔa súúlan kpow. Vanaa cuanin ndu-a kpow boolunnin taw. Vanaa-mangalaa-isɔɔa kpow a cuungiannin le ndu cɔlɔbaa.

⁴Ya Mɛlɛka co sɔɛi nuaa ni: Paale len, i seemiaanin soa, mì vanaa ɲaanun a soa-a yɔŋnun yoloma-yoloma. Kɛ i landunin hɔlla polale Yuda len coo tuma ya suumiaanin soa vanaa-mangalaa-isɔɔa tɔ̀a kpow-vo.

⁵Simlacia Yuda diminin o kɔlta ndalan nin maa o Mɛlɛka-Nɔ-Kpaayaa-Kpow-vo nin yoomuma vanaa co icali Yerusalɛm-nda ma co ni, Hala ndaa pɛɛn.

⁶Paale len, i siinguunin vanaa co bolii lapangɛi Yuda-a maa yinndacieele yinnde bɛndoo o yɔmnde tɛɛn, te kon te maa tɛngɛ biyaa o tumbula n'maltan tɛɛn. A diwnin vanaa-mangalaa-isɔaa balu nda o ba kɛndɔɔ a o ba mɛllo coo-a kpow. O kon Yerusalɛm lonin o fonda ndɔɔ Yerusalɛm.

⁷Yungula Yudaa fɔlɔn Mɛlɛka baŋanin ni, yɔŋii yungu David-o, vannda Yerusalɛm ciee, a kuundian mà cennun maa nda hiow vanaa tɔ̀a Yuda ni.

⁸O palɛi ken nin, Mɛlɛka kandanin vanaa nɔ mayoomu le-a vanaa vanin icali Yerusalɛm-nda tɛɛn. Nda vanin ɲinkon maa David. Polale David len le vanin ɲinkon nda o hɔl maa Hala pila, maa mɛlɛkanɔ Hala-o.»

⁹«O palɛi ken nin, i tɛɛmbuunin vanaa-mangalaa-isɔɔa hinulnin Yerusalɛm-nda kpow.

¹⁰I cucunin kɔl ikɛndɔɔ a kɔl tɛɛlanndo polale David len a vanaa vanin icali Yerusalɛm-nda kpow coo. O kon, a mulinin hɔlla o ya lo mà tofa ya, le vana nda buli lungbuei-yo. A caŋnin le ndu mɛɛ vana caŋ le piɔ́m pole pilɛlen nuaa yɛ. A koŋulnin ndu coo mɛɛ vana koŋul le piɔ́m po tasoo yɛ.

¹¹O palɛi ken nin, dɛnɛ palaa bɛndoo vanin Yerusalɛm, dɛnɛ palaa kon vanin maa dɛnɛ palaa Hadad-Rimɔn-ndo o dɛɛlaa Mekido nin.

¹²Lɛŋnden kpow le vanin o dɛnɛ palaa nin. Yungu oo yungu nɔnin dɛnɛ palaa o ndɔɔ: yungu David-o o ndɔɔ, vanlaandua ndaa o ndaa, yungu Natan-ndo o ndɔɔ, vanlaandua ndaa o ndaa,

¹³yungu Levii-o o ndɔɔ, vanlaandua ndaa o ndaa, yungu Simei-yo o ndɔɔ, vanlaandua ndaa o ndaa.

¹⁴Yungu oo yungu nɔnin dɛnɛ palaa ndɔɔ, mì vanlaandua yungu kon a nɔ o ndaa.»