Read Kissi Sakari 13 Bible Online

Sakari 13 - Kissi bible

Sakari 13

¹«Paale len, mɛnndan ma fulanin o soondo nin le yungu David-o a vanaa vanin Yerusalɛm-nda pulɔɔ le hakio a le dɛnɛ nɔɔlɛiyo.»

²«Mɛlɛka-Nɔ-Kpaayaa-Kpow-vo soo aa: ‹O palɛi ken nin, i ɲuminin diola piɔmnda kpow o lɛŋnden nden nin. O kon vana loonun ndɛnin a nda o kɔɔ le. I faŋanin vɛlɛ vanaa siingun nda pila vanaa-tɛɛngaa-diom Hala-a a kɔl dɛnɛ nɔɔlɛiyo o lɛŋnden nden nin.

³Te vanndo hun va nin pɛ diom Hala-o tɛɛnguuo, fuɲa ndɔ a kala ndɔ velu ndu-o dimulnin ndu aa: Piɔ́m nɔmndo tiiya! Kani còòlan n co dimio o diola Mɛlɛka lan nuaa ni. O kon, telen o vanin diom Hala-o tɛɛnguuo-o, fuɲaa nda kala velu ndu-o a cuukuu ndu, a dii ndu.

⁴Paale len, te vanaa-tɛɛngaa-diom Hala-a tɛɛnguu pɛ diom Hala-o, siɛmbulan la biinin nda le vunduma ndama nda ce-an. A vownun ndɛnin domala bɛndula iyiin-ndan, le sɔɔn lacòòvan dimio le.

⁵Nda kpow vana-vana diminin aa: I co vana-tɛɛngaa-diom Hala le, vana váà ya co ni. Vanndo pum pendu ya kabi o felengiyɛi nii nin ni.

⁶Kɛ taa ɲuna ndu pɛ aa: Kɛ boolɔnnda yɛɛ la co yɛ lan nɔm o takpa? O mulinin aa: O caaŋaa nia lo cɛinin nda booluu ya nuaa ni.›»

⁷Ɲɛ Mɛlɛka-Nɔ-Kpaayaa-Kpow-vo dimi-o co hoo ni aa: «Mɔɛi cɔwve! Cɔ́n ma kuel vana mandaa n'cɔlu nuu! Cɔ́n ma kuel vɛlɛ vana naa n co nɛɛ pilɛ-o! Lɔva vana mandaa n'saa, o kon mì saa saŋnun! O kon, i mululunnin saa cuawva, mì diw nda tɛ́ɛ́.»

⁸Mɛlɛka dimi aa: «O lɛŋnden nden kpow nin, o vanndacieea kundalan tan yáá coo, kundalan tan tiɔn la vunin, mì o pilɛ lo yoomu.

⁹I lueinin kunda yàándɔ lonin kon-ndo o yinnden nin, mì dindi ndu mɛɛ vana dindi volii humbuei yɛ. I dindinin ndu mɛɛ vana dindi sianiei yɛ. Vanaa kan a pialnin diola nilan o piɛilen nin, mì mulul nda. I diminin aa: ‹Vanaa nia co haa ni.› O kon nda bɛɛ diminin aa: ‹Mɛlɛka co Hala naa ni.›»