Read Kissi Sakari 14 Bible Online

Sakari 14 - Kissi bible

Sakari 14

¹«Niaa vanaa co Yerusalɛm-nda, paale Mɛlɛka len le co le tiiyaa. Vannda piɔwnin ɲɛm nda puunin niaa o laba-on.

²I cuungiaanin vanaa-mangalaa-isɔɔa kpow mà hinul Yerusalɛm a cɔwvo. A biinin kobio mà cɔwviaa ɲɔɔn cɛilan nin, mà kpuwviaa vanlaandua, mà bii vannda a tiŋ, mà kɔɛ a nda o cɛlen nin. Kɛ vanaa tɔ̀a lonin-nda, nda cúúnìn faŋan o kobi kalaa nin te.

³O kon, Mɛlɛka fulanin ceen, mò cɔlɔba vanaa-mangalaa-isɔaa kan, mɛɛ o cɔlɔba o paale cɔwlen coo yɛ.

⁴Pelun ndɔn pilannin ɲinkon Pembii oliviei, i co Yerusalɛm o hɔl-ndɔ a ba paalen le can-ndo-e pɛɛn. Pembii oliviei ken tɛndanin tɛɛn kpala-kpala, kandɔɔ a ba paalen le can-ndo háá ba le del-lo, mì ból bɛndu-bɛndoo del o fonda kon. Pembei kpengei pilɛ nannunnin a ba luaŋ-ndo mì kpengei pilɛi nannun a ba too.

⁵La keinin o ból vanin kon o pembun mun tɛɛn-ndo nin mì la ɲaanun, kani ból kon tiiyanin háá Asal. La ɲaanunnin ɲinkon mɛɛ niaa ɲaanun sindɛ lɛŋnde ɲiiyaalen o paale Osias, va masaa Yuda-o len yɛ. O kon kɔɔli, Mɛlɛka Hala nuu hunnin a mɛlɛkaa ndɔa diandaa kpow.

⁶Paale len, ɲɛ-tengaa ve lɛnin te, hoeyii misisiei a mɛmma liimianndan bɛɛ ma venin te.

⁷Paale len le vanin teengen, Mɛlɛka ndu pilɛ kpé sina paale len ni. Ipala ve lɛnin te, icɔl ve lɛnin te. Hali icɔllo, ɲɛ-tengaa vanin.

⁸O palɛi ken, mɛmma soonndan ma vanin fulaa Yerusalɛm. Matiŋ ma vanin kɔlan a ba mɛmma ihɛlma co a ba paalen le can-ndo-an, mì matiŋ ma va kɔlan a ba mɛmma ihɛlma co a kpengii paalen le del-lo-an. Lende ɲɔɔ vanin tosanndo vɔɔlen a sialten ni.

⁹Mɛlɛka tosanin masalen o lɛŋnden kpow coo. O palɛi ken nin, Mɛlɛka ndu pilɛ kpé vanin biilɔnndo ni. Diola ndɔlan daama la vanin diola kpeekpei lan ni.

¹⁰Tàndá balu Yerusalɛm-ndo kpow siŋnunnin dɛɛlaa vesɛiyo, cɔnɔnndo Keba háá tiiyaa Rimɔn, Yerusalɛm a ba too. Yerusalɛm sɔlanin heeloo mo lo o fonda ndɔɔ. Kandɔɔ a dio Bɛnyamɛn-ndo háá o fonda dio tasoo, kɔlan háá o dio lasɔngio, keiyo a cɛi coocoo Hananeɛl-lo, kɔlan háá o doolala nda vayia mɔiyan le masaa-a.

¹¹Vannda calnin Yerusalɛm lon, kɔngɔlan ve lɛnin kobio kɔɔli le ndu tɛɛmbuu le, o vannunnin nila ɲulu.

¹²Tofa vɔ kpundɛ Mɛlɛka tuisinin vanaa-mangalaa-isɔɔa cɔlɔbanin Yerusalɛm-nda coo-o: vana-vana lonin yoomu mì dialun ndɔn sɛ kpow. Hɔltan la lonin vannda o koongolan nin mì la sɛ, diɛɛmuei lonin nda o lasondo mì sɛ.

¹³O palɛi ken nin, Mɛlɛka hiiluunin nda vokuu-vokuu, a biyannin a sɔngɔɔ vellaa-velle, mì vana-vana del vana nda cɛɛlan-ndo coo.

¹⁴Vannda Yuda tosanin cɔwvo le Yerusalɛm baŋaa. À hialunin bolofaa vanaa-mangalaa-isɔaa balu nda-a mà cuungiaa ndu: sianion, volion a volɔɔla cuɛinanndan taw-taw.

¹⁵Kpundɛla vaa lende la toalnin soa, milɛɛa, ɲɔɔmɛɛa, sofɛlɛa a cɔlua vanin o dɔ́ɔ́ngɔ́ɔ̀ nin-nda kpow coo, mɛɛ la tol vanndacieea coo yɛ.

¹⁶O vanaa hinulnin Yerusalɛm a cɔwvo-a tɛɛn, vanaa lonin yoomu-a vanin helɔɔ Yerusalɛm ciee vɔsi oo vɔsi le kɔlan vulan baŋɔɔ Masaa o labɛngunin, Mɛlɛka-Nɔ-Kpaayaa-Kpow-vo pɛɛn, a le kafo lakùùo tosaa.

¹⁷O yungula co o lɛŋnden coo lan tɛɛn, yungu oo yungu kɛɛ pɛ le helɔɔ Yerusalɛm, le kɔlan vulan baŋɔɔ Masaa, o co Mɛlɛka-Nɔ-Kpaayaa-Kpow-vo-o o labɛngunin, piɔɔ senin o nda lo le.

¹⁸Te Esiptea kɛɛ pɛ le helɔɔ Yerusalɛm, le kafo lakùùo tosaa-a, kpundɛ toalnin vanaa-mangalaa-isɔaa tɔà kɛɛnin le kafo lakùùo tosaa-a coo-o toalnin nda Esiptea kan coo.

¹⁹Lende Esiptea a vanaa-mangalaa-isɔaa kɛɛnin le kafo kon tosaa-a a sɔlanin soŋɔɔ ni

²⁰Telen kon, hali o bamban pɔmbɔn soa coo, o vanin o sɛvaa aa: «O siŋnun teengen le Mɛlɛka-o!» Hali kpɛɛnɛn co o Cɛi-Hala-o nin-ndon vanin n'diandaa maa taalala kólaala co o fonda-loamaa-lasálàá hɔl-ndɔ lan.

²¹Kpɛɛnɔn Yerusalɛm ciee a mun Yuda kpow n vanin n'solianndon sálà le baala Mɛlɛka-Nɔ-Kpaayaa-Kpow-vo-o. Mì vanaa vanin hunɔɔ sálàlan solio-a cua kpɛɛnɛn mun le vision yawvo lenin. O telen kon, yulaa ve lɛnin o cɛi Mɛlɛka-Nɔ-Kpaayaa-Kpow-vo o nin te.»