Read Kissi Sakari 7 Bible Online

Sakari 7 - Kissi bible

Sakari 7

¹«O vɔsi hiɔɔlundɔɔ nin o masale Darius len bɛngu, paangii ŋɔmahiɔɔlundɔɛi, paangii nɔ diolan Kisleu-ve va lɔma lehiɔɔlu, mí sɔɛi Mɛlɛka-e dimulun Sakari.

²Nduyɛ, vannda Betɛl ndáà vem Sarɛsɛr nda Rekɛm-Melɛk a vanaa ndɔa le kɔlan Mɛlɛka tɛɛlɔnndo,

³a le vanaa-solia-lasálàá va baalaa o Cɛi Mɛlɛka-Nɔ-Kpaayaa-Kpow-vo nin-nda a vanaa-tɛɛngaa-diom Hala-a ɲunaa ni aa: ‹Vɛ̀ɛ̀ mì va hiovɔɔ laci a caŋndo a sumndo biyɔɔ o paangii ŋuɛɛnundɔɛi nin mɛɛ ya co nin tosaa lende o vɔsilan taw nin yɛ?›

⁴O kon, mí Mɛlɛka-Nɔ-Kpaayaa-Kpow-vo soaa o ya Sakari lo, mó dimul-la aa:

⁵‹Ɲuna vɔ vanaa co o lɛŋnden nden kpow nin-nda a vanaa-solia-lasálàá aa: O vɔsilan belaŋɔmmɛw bɛngu la va sumndo biyɔɔ a caŋndo o paangii ŋuɛɛnundɔɛi a o paangii ŋɔmmɛwndɔɛi nin, mò va maa le ya niaa va sum kon biyɔɔ ni?

⁶Te la de pɛ ɲɛdiaa mí la kol, o co le niaa pila le niaa de mí la kol te?

⁷Sɔɔn mun Mɛlɛka ndóò dimul sindɛ vanaa-tɛɛngaa-diom Hala-a le vannda tɛɛngullo ni. Tuma kon, vannda va icali Yerusalɛm taw, a vannun nila ɲulu a kobila balu Yerusalɛm-ndan, a o tàndá co a ba too-o nin, haa vannun vɛlɛ icali nila ɲulu o tàndá ladɛɛlaa nin.

⁸Mí sɔɛi Mɛlɛka-e dimulun Sakari aa:

⁹Nuaa Mɛlɛka-Nɔ-Kpaayaa-Kpow-vo soo ni mó dimi aa: La kiolu yaman o sandei nin. La vá vanaa kɛndɛa niaa pila tɛɛn, mì la tuinan ɲííye vellaa-velle.

¹⁰La luéì vanalanɔ pɔnɔ ndɔ vi-o a vííyo mɔnɛi le. La sáángiàà miallo a vana bala fondoo le. La túúnùn o lakɔl le dɛnɛ vɔɔndo tosalanndo vellaa-velle le.

¹¹Kɛ, má kɛɛ le sɔɔn mún biyɔɔ, má tosa nila kalulan, má baŋulu nila ndalan yɔŋii ndáà tuei sɔɔn kalan.

¹²Má mingi kɔlta ndalan lakàlà-kálà maa idiaman, yɔŋii ndáà yaŋ nilan o tɔŋndo a o sɔɔn Mɛlɛka-Nɔ-Kpaayaa-Kpow-vo dimul nda a kɔl ndɔɔ a sondola vanaa-tɛɛngaa-diom Hala-a lɔ́ɔ́ kon-ndon. Lelan, mí Mɛlɛka-Nɔ-Kpaayaa-Kpow-vo tuulu kɔl a nda taw-taw.

¹³Mó dimi aa: Le tùú ya va nda veeloo má kɛɛ le nilan yaŋɔɔ-o, nda bɛɛ a veelunin ya, kɛ i yeŋnin nda lani le. Ya Mɛlɛka-Nɔ-Kpaayaa-Kpow-vo soo nuaa ni.

¹⁴Mí saŋ nda vanaa-mangalaa-isɔaa ndáà sina paandu le-a tɛɛn, mí lɛŋnden le koma tambuu nda kɔɔli. Vana ve lɛ cɔnɔn o lɛŋnde len nin le lakɔ inɛɛ le, vana ve lɛ vɛlɛ cɔnɔn inɛɛ le hunɔɔ o lɛŋnde len nin te. Lende nda tɛɛmbuu lɛŋnde kɛndɛle len ni, má siinguu len lɛŋnde imɔnɔle siɔŋɛilen.›»