Read Kissi Sakari 8 Bible Online

Sakari 8 - Kissi bible

Sakari 8

¹«Mí Mɛlɛka-Nɔ-Kpaayaa-Kpow-vo soaa o ya lo aa:

²‹Nuaa Mɛlɛka-Nɔ-Kpaayaa-Kpow-vo dimi ni aa: Paŋala bɛndu-bɛndoo co ya o kɔl le kaola ya kaola Siɔn-ndo. Yeemɛi bɛndu-bɛnduei co ya o kɔl le ndu.›

³Le hee, Ya Mɛlɛka soaa nuaa ni, I co muungoo Yerusalɛm, i co hunɔɔ vɛlɛ calle o kobio Siɔn nin. Yerusalɛm sɔlanin diolan aa Kobi lo o lediom coo-o. Pembii Mɛlɛka-Nɔ-Kpaayaa-Kpow-vo i veelunnin aa Pembii Diandɛi.

⁴Ya Mɛlɛka-Nɔ-Kpaayaa-Kpow-vo co sɔɛi nuaa ni. Falaa yuuvɛiya a vuɛŋaa yuuvɛiya, calnin vɛlɛ o bɛ́ɛ̀la bɛndulan Yerusalɛm a tindalan o laba le va nda vanin a yuuvɛiya kudɛɛ-kudɛɛ-o.

⁵Bɛ́ɛ̀la lan la vanin lapiaalan cá a poambɔa piaandua a á cuaambɔa laandua. Felengia kan vanin pisultan o nɛilan coo.

⁶Ya Mɛlɛka-Nɔ-Kpaayaa-Kpow-vo co sɔɛi ni tuŋ. Te vanaa tɔ̀a lonin o vanaa kan tɛɛn-nda ce pɛ maa dɛnɛ kon nɔlanin tosanndo paale len te, bàà mì ya Mɛlɛka ce vɛlɛ maa o nɔlanin tosan te? Ya Mɛlɛka-Nɔ-Kpaayaa-Kpow-vo co sɔɛi ni.

⁷Nuaa ya Mɛlɛka-Nɔ-Kpaayaa-Kpow-vo dimi vɛlɛ ni aa: La tofa vɔ, i co vanaa nia baŋa, mì soli nda o lɛŋnde co a ba paalen le can-ndo len nin, mì soli vɛlɛ nda o lɛŋnde co a ba paalen le del-lo len nin.

⁸I co nda faŋa lon mì mingi nda nanu, mà hun cal Yerusalɛm ciee. A vanin vanaa nia, mì ya i va Hala ndaa o toɲaa a o sandei nin.

⁹Ya Mɛlɛka-Nɔ-Kpaayaa-Kpow-vo soaa nuaa ni: La lueí yoomuan, niaa co hau sɔɔn vanaa-tɛɛngaa-diom Hala-a dimi lɔ́ɔ́ kon-ndon tueyɔɔ-a. Lɔ́ɔ́ Cɛi-Mɛlɛka-Nɔ-Kpaayaa-Kpow-vo-o kilan tumndo-o nda dimi mun ni, lɔ́ɔ́ nda kandu Cɛi-Hala-o mingio tangullo-o pɛɛn.

¹⁰Kani tuma pá mí telen kon tiiya, vanacieo ndóò nɔ sala le baala ndɔɔ le, cɔloo bɛɛ ndóò nɔ vɔ́ngɔ̀ le baala ndɔɔ le. Le siòòŋii yaamɔɔa, kɔlɲulu ve le vanaa va luɛyɔɔ a fulaa-a le. Bau mí yáà mal vanndacieea, má ndáà va nda pila cɔlɔbanndo.

¹¹Kɛ nihau, i tosal-lɛnin vanaa tɔ̀a lo yoomu o vannda ha tɛɛn-nda mɛɛ ya tosa paandu yɛ le. Ya Mɛlɛka-Nɔ-Kpaayaa-Kpow-vo o dimi lende ni.

¹²I saŋnin kɔlɲuloo o lɛŋnden coo. Nakɔla n'rɛsɛnndan la koamnin, lɛŋnden le nɛŋinin tɔlɔɔlan, halataalaa tuisinin piɔɔ. I yɔngunin vanaa tɔ̀a lo-a ɲɛm kɛndɛn mun kpede.

¹³Niaa cuavaa Israɛlla a niaa polale Yuda len, La paandu maa vanaa danga vanaa-mangalaa-isɔaa tɛɛn yɛ. Kɛ o laan, i co niaa ciindiaa, mì la siŋnun vanaa duaa. Lelan, siòòŋii bíì niaa le. La lueí yoomuan.

¹⁴Kani ya Mɛlɛka-Nɔ-Kpaayaa-Kpow-vo dimi ni aa: Mɛɛ yáà tuu paandu le niaa dɛnɛ vɔɔndo tosallo le tùú fuɲaa niaa mamaa tuulu ya kɔl-lo yɛ, yáà mangala vɔ yiyan kon te. Ya Mɛlɛka-Nɔ-Kpaayaa-Kpow-vo o co sɔɛi nuaa ni.

¹⁵Sisa, i mangala yiyan kon, i co Yerusalɛmnda a Yudaa kpow dɛnɛ kɛndɔɔ tosal. Lelan siòòŋii bíì niaa le.

¹⁶La tuei-yɔ ɲɛ niaa bɛnda le tosaa-o la dìmulán toɲaa vellaa-velle, la kiolu yamɛi o sandei nin mì kɔlɲuloo luɛi.

¹⁷La túù le dɛnɛ vɔɔndo tosalanndo niaa pila tɛɛn vellaa-velle le. La yéémà mɛɛniannda lacòòvalan te. Kani dɛnnda lan kpede la nɛinun ya ni. Ya Mɛlɛka dimi lende ni.›»

¹⁸«Mí sɔɛi Mɛlɛka-Nɔ-Kpaayaa-Kpow-vo i dimulun ya aa:

¹⁹‹Nuaa Mɛlɛka-Nɔ-Kpaayaa-Kpow-vo dimi ni aa: ‹Sum paangii hiɔɔlundɔɛi, sum paangii ŋuɛɛnundɔɛi, sum paangii ŋɔmmɛwndɔɛi a sum paangii tɔ́ndɔɛi siŋnunnin palɛi kɔlkɛndɛi, palɛi ɲaalei a palɛi kafoei le polale Yuda len. Lelan, la kaola toɲaa a kɔlɲuloo!

²⁰Ya Mɛlɛka-Nɔ-Kpaayaa-Kpow-vo dimi ni aa: Vanaa súúla celennda a vanaa co icali o kobilan taw nin-nda hunnin vɛlɛ.

²¹Vanaa co icali o kobio pilɛ nin-nda cannin mà kɔɛ o kobio pilɔɔ nin, mà dimi aa: ‹N kɔnnun mì n kɔ tɛɛlun Mɛlɛka, n muungun Mɛlɛka-Nɔ-Kpaayaa-Kpow-vo o ibuŋ. Mì nda muli aa: Naa bɛɛ, n co lakɔ.

²²Nduyɛ, vanaa súúla celennda taw a vanaa-mangalaa-isɔaa kpaayaa hunnin yan Mɛlɛka-Nɔ-Kpaayaa-Kpow-vo o ibuŋ Yerusalɛm, mà hun tɛɛlun ya.

²³Ya Mɛlɛka-Nɔ-Kpaayaa-Kpow-vo dimi ni aa: O palɛi ken nin, n'van tɔ́ o vanaa-mangalaa-isɔɔa tɛɛn, a vanin sɔɔn mangalan yɛ́-yɛ́ɔn dimio-a, lɛɛndunnin o cɔcɔn doma Yuifnɔɔ o pilɛ, mà dimul ndu aa: ‹N yeema mi n kɔɛnnun naa niaa latulu, kani n tuei maa Hala co niaa ikɛi.›»