Read Kissi Malasi 1 Bible Online

Malasi 1 - Kissi bible

Malasi 1

¹Sɔɛi lusulɛi Mɛlɛka soo o Israɛlla lo a sondo Malasi-o-e.

²Mɛlɛka dimul vanaa ndɔa aa: «I kaola niaa.» Kɛ mí la va ɲunaa aa: «Yɛɛ cɔm yɛ maa a kaola naa?» Mí Mɛlɛka muli aa: «Vɛ̀ɛ̀ o co Esau le co bɛndoo Yakɔb-o le?» Kɛ Yakɔb ya kaola ni,

³mí kɛɛ Esau. Mí tuisi vanaa ndɔa co icali o pembon coo-a dɛnɛ palaa coo. Mí mal nda tivolaa co o lɛŋnde veselɛilen nin-nda o ba.

⁴Te Edɔmnda dimi pɛ aa: ‹A tɛɛmbuu naa, kɛ n co muungu mì n tangul vɛlɛ o bémbéla naalan coo›, Mɛlɛka-Nɔ-Kpaayaa-Kpow-vo dimi aa: ‹A mingi tangul tuŋ, o co vɛlɛ puusiaa.› Má ke lɛŋnde ndalen diolan aa lɛŋnde kɔlvesɛilen, lɛŋnde vanaa kɔltuw Mɛlɛka-o cuu kuee le-a pɛɛn.

⁵Niaa Israɛlla, la canin dɛnɛ kon a lehɔl ciŋ, mì niaa pila dimi aa: ‹Mɛlɛka cɔm kpaaya ndɔɔ hiovɔɔ o pɛɛngula lɛŋnde Israɛl-ten coo.›»

⁶Mɛlɛka-Nɔ-Kpaayaa-Kpow-vo dimi aa: «Poo bɛnda mò ke fuɲa ndɔ bɛɛlen, cɛɔ bɛɛ bɛnda mò ke vana ndɔ bɛndoo bɛɛlen. Vɛ̀ɛ̀ o co ya le co fuɲa niaa a vana niaa bɛndoo le? Kɛ le yɛɛ niko la co ya lebɛɛ ke le? La nɔ́ vɛlɛ siòòŋii ni le. La co ya ɲunaa aa: ‹Vɛ̀ɛ̀ naa n kɛɛ yɛ nɔm bɛɛlen ke?›

⁷La co hunɔɔ a ɲɛm dian nɔɔlɛiyon o fonda ni loamaa lasálàá coo, mì la va ɲunaa aa: ‹Vɛɛ nɛ naa n co yɛ nɔm kɔllo tɛɛmbuuo?› La co dimio aa: ‹Tabali Mɛlɛka-o[1] co ɲɛ sɔvɛ le.›

⁸La co hunɔɔ a cɔlua sumɛiya, a cɔlua lenamtaa a á cɔlua co a nààlan-nda le nda ya sálàá solullo. Vɛ̀ɛ̀ la ci ken dɛnɛ vɔɔn te? Te la ke pɛ masa ibunga niaa cɔlu vaa lende, vɛ̀ɛ̀ o naŋ pá kɔl a niaa, mò candu niaa? Ya Mɛlɛka-Nɔ-Kpaayaa-Kpow-vo co niaa ɲunaa nuaa ni.

⁹Mbɔ̀ la piɛi ya Mɛlɛka, mì ɲulul kɔl a niaa! Niaa ca ko aa mì ce niaa ɲia a laasiaa niaa co kon-ndo kpow? Ya Mɛlɛka-Nɔ-Kpaayaa-Kpow-vo ɲuna nuaa ni.

¹⁰Lelan, o co fisa mì vana pilɛ o niaa tɛɛn kɔ kiindiaa diola Cɛi-Hala-o. O kon, la kue lɛnin yinnden kiisuu o fonda-loamaa-lasálà nuu coo fondo fúú le. Ɲɛ-ɲɛ hɛnan ya le niaa cɔu le sálàla niaa co ya solullo lan la co ya hɛnan te. Ya Mɛlɛka-Nɔ-Kpaayaa-Kpow-vo dimi lende ni.

¹¹Kandɔɔ ba paalen le can-ndo, kɔlan tiiyaa háá ba le del-lo, vanaa-mangalaa-isɔɔa súúlan kpow a sina bɔɔbɔɔyɛi nii. A co ansan lomɔɔ o diola nilan a ya sálàlan solullo ɲɛm sɔvɛɔn. A toɲa, vanaa-mangalaa-isɔɔa sina bɔɔbɔɔyɛi nii. Ya Mɛlɛka-Nɔ-Kpaayaa-Kpow-vo soaa nuaa ni.

¹²Kɛ niaa co diola nilan solio o báà nin ni, mì la va dimio aa tabali Maalii-o[2] co o nɔɔlɛiyo, o co naa kpeku solul te.

¹³Mí la va dimio aa: ‹Sanga kuɛɛ!› La nɔ lebɛɛ oo lebɛɛ le ya le. Ya Mɛlɛka-Nɔ-Kpaayaa-Kpow-vo dimi lende ni. La co ya sálàlan solullo a cɔlua niaa ciimbuu-a a á cɔlua namtaa, lɔ́ɔ́ lepum yɛ á cɔluaa co a nààlan-nda. Vɛ̀ɛ̀ ya cɛl-lɛ niaa sálà vaa lende o ba? Ya Mɛlɛka ɲuna niaa nuaa ni.

¹⁴Dɛnɛ palaa co le vana kon, ó nɔ saa kóndóa kɛndɛ-kɛndɛa o cɔlua ndɔa tɛɛn, kɛ mó mɛi kan, mó kɔ bii o ɲavɛiyo le ndu ya sálàá solullo-o! Dɛnɛ palaa co le vana kon, kani Masa bɛndoo ya co ni. Vanaa-mangalaa-isɔɔa kpow a nɔ siòònde a diola nilan. Mɛlɛka-Nɔ-Kpaayaa-Kpow-vo dimi lende ni.»