Read Kissi Matie 1 Bible Online

Matie 1 - Kissi bible

Matie 1

¹Diola fuɲaa-mamaa Yeesu Krista, po David-o a po Abraham-ndo-a la co lan ni:

²Abraham violɔɔ Isaak, mí Isaak vialu Yakɔb, mí Yakɔb vialu Yuda a puapilɛa ndɔa.

³Yuda yɔŋnun fuɲaa Perɛs a Sera ni, Tamar yɔŋnun kala nda ni. Mí Perɛs vialu Hɛsrɔm, mí Hɛsrɔm vialu Aram.

⁴Aram yɔŋnun fuɲaa Aminadab ni, mí Aminadab vialu Nasɔn, mí Nasɔn vialu Salmɔn.

⁵Salmɔn yɔŋnun fuɲaa Boas ni, kalaa Boas kon va Rahab ni, mí Boas vialu Obɛd. Ruti yɔŋnun kalaa Obɛd kon ni, mí Obɛd vialu Yisai,

⁶mí Yisai vialu masaa David. Mí masaa David vialu Salomɔn, lanɔɔ Uri yɔŋnun kalaa Salomɔn ni.

⁷Salomɔn yɔŋnun fuɲaa Roboam ni, mí Roboam vialu Abia, mí Abia vialu Asa.

⁸Asa yɔŋnun fuɲaa Yosafat ni, mí Yosafat vialu Yoram, mí Yoram vialu Osias.

⁹Osias yɔŋnun fuɲaa Yotam ni, mí Yotam vialu Ahas, mí Ahas vialu Esekia.

¹⁰Esekia yɔŋnun fuɲaa Manase ni, mí Manase vialu Amon, mí Amon vialu Yosia.

¹¹Yosia yɔŋnun fuɲaa Yekonia nda puapilɛa ndɔa ni, telen nda kɔɛ a Israɛlla o biyɔɔ nin Babilɔn-ndo.

¹²O kɔla nda kɔɛ lan a nda Babilɔn-ndan kɔɔli, mí Yekonia vialu Sealtiɛl, mí Sealtiɛl vialu Sorobabɛl.

¹³Sorobabɛl yɔŋnun fuɲaa Abiud ni, mí Abiud vialu Eliakim, mí Eliakim vialu Asɔr.

¹⁴Asɔr yɔŋnun fuɲaa Sadɔk ni, mí Sadɔk vialu Ahim, mí Ahim vialu Eliud.

¹⁵Eliud yɔŋnun fuɲaa Eleasar ni, mí Eleasar vialu Matan, mí Matan vialu Yakɔb.

¹⁶Yakɔb yɔŋnun fuɲaa Yosɛf ni, pɔnɔɔ Mari, o velu Yeesu-o, Krista pɛɛn.

¹⁷Faw-faw, cɔnɔnndo a Abraham kɔ bii a David, lambilan tɔ́ a lahiɔɔlu la hiow ni. Cɔn vɛlɛ a David kɔ bii a telen nda kɔɛ a Israɛlla o biyɔɔ nin Babilɔn-ndo, lambilan tɔ́ a lahiɔɔlu la hiow ni. Cɔnɔnndo vɛlɛ telen nda kɔɛ kon a nda o biyɔɔ nin Babilɔn-ndo, háá a violɔn Krista-o, lambilan tɔ́ a lahiɔɔlu la hiow ni.

¹⁸Tofa vɔ mɛɛ dɛnɛ violɔn Yeesu Krista-o yɔŋnun yɛ. Yosɛf ndóò fula Mari kala ndɔ kɔɔli le ndu cuaa o nɔ̀u nin ni, kɛ lɔ́ɔ́ pá mí Yosɛf sina ndu vanalanɔ, mó cua folio a kpaaya Hala Kɔl-Diandaa.

¹⁹Nduyɛ, vana sandaa Yosɛf pɔnɔ ndɔ va ni. Ndóò yeema le Mari diolan tɛɛmbuu le, o kon mó yiyan le ndu kɛɔ o vionnɔnndo nin.

²⁰Telen o va yiyanndo a dɛnnda lan o kɔɔ-o, mí mɛlɛkanɔ Hala-o cɔmnun ndu o lɔma sɔlaan nin, mó dimul ndu aa: «Yosɛf po imama David-o, siòòŋii bii nɔm le Mari cuaa o nɔ̀u nin te, kani a kpaaya Hala Kɔl-Diandaa o cua foli hɔ́ɔ́ co ndu hoo o dembe-o ni.

²¹O co hunɔɔ hɔ́ɔ́ piaandoo violɔɔ, mà ke ndu diolan aa Yeesu, kani ndu ciindiaanin vanaa ndɔa ni, mò soli nda o hakila ndalan nin.»

²²Ken kpow tosan haliko mi sɔɛi Mɛlɛka ndóò dimi a sondo vana-tɛɛngaa-diom Hala-o-e peelun aa:

²³«Cuaambɔ lembu sina vɔ dɛnɛ vanapɔnɔ loo cuanin folio, mò velu hɔ́ɔ́ piaandoo, mà ke ndu diolan aa Emmanuɛl», kɔlɔ ndɔɔ co ni aa: «Hala co naa ikɛi».

²⁴Yosɛf tiondɔɔ, mó tosa mɛɛ mɛlɛkanɔ Hala-o dimul ndu yɛ. Mó kɔa a laa ndɔ o ndu lo.

²⁵Kɛ háá mí laa ndɔ vialu po kon, o sina ndu vanalanɔ le. Mó ke hɔ́ɔ́ kalaa diolan aa Yeesu.