Read Kissi Matie 10 Bible Online

Matie 10 - Kissi bible

Matie 10

¹O kon kɔɔli, mí Yeesu veelu kaandeŋaa ndɔa tɔ́ a à ŋiɔnda, mó ke nda kpaayaa le ɲinaa vɔɔnda tovɔɔ, le nààla súú-súù ka a namtale súú-súù ka singio.

²Diola kaandeŋaa tɔ́ a à ŋiɔŋaa kan la co lan ni: Vana tasoo Simɔn, o nda veelu vɛlɛ aa Piɛr-o, a Andre puapilɛ ndɔ. Nsaki po Sebedee-o a Nsaŋ puapilɛ ndɔ.

³Filipe a Bartelemi. Tomas a Matie vana biyaa muloo. Nsaki po Alfee-o a Tadee.

⁴Simɔn vana fulà diallon le lɛŋnde ndɔlen-ndo a Yuda Iskariɔt, o mal Yeesu vannda o ba-o.

⁵Yeesu vaa n'van tɔ́ a vanaa ŋiɔnda ha vomɔɔ, mó sila nda aa: «La kɔa o vanaa-mangalaa-isɔaa celennda lo le, la lúɛì o kobila Samaria nin te,

⁶kɛ la kɔ o saa laasian o cɛi Israɛl-lo nin-nda lo.

⁷La va pɛ kɔlan, la kei vannda diomndo ho tɛɛngul nɛi-tɛɛn maa masale halataala len le co nin le tiiyaa.

⁸La singí vanaa lanàá, la mingí vanvílɛ́iya yoomu, la singí vanaa nàà siaŋaa mi la tow ɲinaa vɔɔnda vannda kɔɔli. La sɔla a vɔngu le, niaa bɛɛ la yɔ́ngu a vɔngu le.

⁹La cua n'siani le, la cua volin humbu le, la vownun ivoli o bɔlɔ le,

¹⁰la cua bɔlɔ kelaa le, la cua domala bɛndula tiɔn te, la cua lasamta le, la cua lesion te, kani vana baalaa bɛnda mò sɔla balo ndɔɔ.

¹¹Kobi oo kobi, te kon te ciee oo ciee niaa tiiya pɛ, la ɲuna te vana bɛnda le niaa yiyaa-o co pɛ lon, la lo o ndu lo háá mì la cɛn le kɔnndan.

¹²Cɛi niaa luɛi pɛ, la yil nda aa: ‹Màá kɔlɲuloo va cɛinin nanu!›

¹³Te vanaa co cɛinin lon-nda caa pɛ niaa biyɔɔ, a sɔla kɔlɲulu kon. Kɛ taa cee niaa biyɔɔ le, kɔlɲulu kon muungun niaa pila o ba.

¹⁴Cɛi oo cɛi, te kon te kobi oo kobi nda bii niaa, mà yaŋ nilan o sɔɔn nian te, la va pɛ faŋanndo lon, la koŋ cundu vanin niaa o n'pelu-o, la kɔɛnnun.

¹⁵Mì dimul niaa toɲaa, paale kialaa iyamalen, lɛŋnde Sodɔm-nden a lɛŋnde Komɔr len le tiiyanin sangaa sɔlaa maa kobi kon te.»

¹⁶«I co niaa vomɔɔ maa n'saa tunaa yondoa tɛɛn. Lelan, la kiondu kɔltan maa n'kɛw, mì la vi kɔltan maa n'piin.

¹⁷La mandan a vannda, kani a lɔalunin niaa o fondala kialaa n'yamalan, mà lɔɔ niaa o cɛila ndala lekaanndan nin.

¹⁸A kɔanin a niaa o masaa n'bungaa lo a o masaa bɛndua lo le ya, mì la kɔ soli seilen nda o hɔl a vanaa-mangalaa-isɔɔa o hɔl.

¹⁹Kɛ telen nda kɔanin kon a niaa o fondala kialaa n'yamalan-ndo, la buulan le mɛɛ niaa soaanin yɛ le, la buulan vɛlɛ le ɲɛ niaa diminin-ndo le. O niaa bɛnda le dimio-o kennunnin niaa o telen kon.

²⁰Kani o venin niaa le soaanin te, Kɔl Fuɲa niaa-o soaanin niaa nin ni.

²¹Vanndo lɔalunin puapilɛ ndɔɔ le ndu diyɔɔ, mì fuɲaa lɔlu po ndɔɔ. Cuawva simulnin vanaa velu nda-a mà tosa mì vanaa velu nda kan-nda sɔla piɔ́mndo.

²²Vannda kpow nɔnin nɛyɔn niaa le diola nilan. Kɛ vana lonin lecoo háá o mɛɛlulan-ndo, ndu sɔlanin cindaa.

²³Te vannda tol pɛ niaa yɛlen o kobio pum nin, la ɲaanun mì la kɔɛnnun o kobi celen nin. Mì dimul niaa toɲaa, la ciinin kobila co o lɛŋnde Israɛl-ten nin-ndan balɔɔ le, mì Po vanacieo hin.»

²⁴«Kaandennɔɔ hiw vana ndɔ pɛɛkaa le. Cɛɔ bɛɛ hiw vana ndɔ bɛndoo le.

²⁵Kɛ kaandennɔɔ tiiya pɛ maa vana ndɔ pɛɛkaa, mì cɛɔ tiiya maa vana ndɔ bɛndoo, kon tiw. Nɛɛ nda veelu vɔ vana co cɛiyo bollen-ndo nuaa aa Beɛlsebul, vanaa co cɛinin-nda yɛ niko?

²⁶Lelan, siòòŋii bii niaa a nda le. Kani ɲɛ-ɲɛ co o kumbaa hun fulanin ceen, ɲɛ-ɲɛ co vɛlɛ o vianaa hun sinannin.

²⁷O ya co niaa dimullo o ɲumndan nin-ndo, la dimi ndu ipala déŋ. O niaa co tueinɔnndo o lani ɲiimu-ɲiimu-o, la yonda ndu o cɛilan coo.

²⁸La vò vanaa dii diallon kɛ a nɔla kɔllo diyɔɔ le-a le. Kɛ o niaa vo-o co Vana tosà mì kɔllo a diallon kɔɛ o ɲánndávàà-o ni.

²⁹Vɛ̀ɛ̀ o co tààngáà ndu pilɛ le nda pisi nɛ́ɛ̀nɛ́ɛ̀a nda ŋiɔn te? Nduyɛ hali o pilɛ del lɛŋ te, te Fuɲa niaa co o halataala-o sina ndi le.

³⁰Hali yiiŋii co niaa o lebol-le i co icɔmɛi kpede.

³¹Lelan, la buulan te, niaa la hiow nɛ́ɛ̀nɛ́ɛ̀a polon.»

³²«Lelan vana-vana sɔlɔlan pɛ sɔɛi nii vannda o hɔl, ya bɛɛ i sɔlɔlannin sɔɛi ndɔɛi Fuɲa ni co o halataala-o o hɔl.

³³Kɛ vana-vana viinun pɛ sɔɛi nii vannda o hɔl, ya bɛɛ i vuununnin sɔɛi ndɔɛi Fuɲa ni co o halataala-o o hɔl.»

³⁴«La yiyan maa kɔlɲulu le ya cuu o ceendo coo le, o co kɔlɲulu le ya cuu le, kɛ cɔwvo.

³⁵Kani i hin sɛyanndo luei poo nda fuɲa ndɔ tɛɛn, cuaa nda kala ndɔ tɛɛn, lanɔɔ nda kala-lɛɛ ndɔ tɛɛn.

³⁶Yaamɔaa vana-vana vanin vanaa nda co cɛinin-nda ni.

³⁷Vana kaola pɛ fuɲa ndɔ, te kon te kala ndɔ hiovɔɔ ya coo, mɛɛ ndu bɛnda mò va kaandennɔ ni le. Vana kaola pɛ po ndɔɔ, te kon te cua ndɔɔ hiovɔɔ ya coo, mɛɛ ndu bɛnda mò va kaandennɔ ni le.

³⁸Vana-vana cue yɔm singafilaa ndɔɔ mò del-la kɔɔli le, mɛɛ ndu bɛnda mò va kaandennɔ ni le.

³⁹Vana-vana kindin pɛ le yoomu ndɔɔ mandaa, o hɛlun ndu. Kɛ vana-vana yoomu ndɔɔ hɛlun pɛ le ya, ndu sɔlanin yoomu kpeekpeiyo.»

⁴⁰«Vana cɛl pɛ niaa, mɛɛ ya o cɛl ni. Vana cɛl-lɛ ya pɛ, mɛɛ vana vem ya-o o cɛl lende ni.

⁴¹Vana cɛl pɛ vana-tɛɛngaa-diom Hala-o le tùú o co vana-tɛɛngaa-diom Hala-o-o, ndu sɔlanin vɔ̀ngɔ̀ vana-tɛɛngaa-diom Hala-o. Vana cɛl pɛ vana sandaa le mɛɛ o co vana sandaa yɛ, ndu sɔlanin vɔ̀ngɔ̀ vana sandaa.

⁴²Mì dimul niaa toɲaa, vana-vana ke pɛ cuaambɔa ha o pilɛ hali mɛmma ɲuluan taala kólaa ca le tùú o co kaandennɔ nuu-o, vana kon folanin vɔ̀ngɔ̀ ndɔɔ le.»