Read Kissi Matie 11 Bible Online

Matie 11 - Kissi bible

Matie 11

¹Yeesu ciiyo kaandeŋaa ndɔa sɔɔn mun dimullo, mó faŋan le kɔlan vannda pɛɛkoo a sɔɛi Hala-e dimio o kobila va o tàndá kon nin-ndan nin.

²Nduyɛ, Nsaŋ lo o kaasoo, mó tuɛi a dɛnnda Krista lan o kɔɔ. Mó viam kaandeŋaa ndɔa le kɔlan ɲunaa aa:

³«Mò va maa nɔm co vana naa n tuei tɔ́ɔ́ le hunɔɔ-o ni, baa o bɛnda mì n cum vana celen?»

⁴Mí Yeesu mulul nda aa: «La kɔ dimul Nsaŋ dɛnnda niaa co tueyɔɔ lan a la niaa co cɔu lan:

⁵vanaa sumɛiya co cɔu, vanaa bɛvɛiya co cɔnɔnndo mà va kelaa, vanaa nàà siaŋaa co siongɔɔ, vanaa nila baŋulɛiya co tueyɔɔ, vanvílɛ́iya co muungoo yoomu, Yoongu Kɛndɔɔ co vanaa bala fondoa tiiyalanndo.

⁶Dɛnɛ kɛndɔɔ co le vana kon, o delnin o lapɔw nin le dɛnɛ nuu loo.»

⁷Tuma kaandeŋaa Nsaŋ-nda va kɔnndan-ndo, mí Yeesu mulin sɔɛi o vannda lo a Nsaŋ o kɔɔ aa: «Yɛɛ niáà kɔɛ yɛ tofaa o lɛŋnde vesɛilen nin? Vɛ̀ɛ̀ kpɛ̀ndɛ̀le hoeiye va hiiloo len niáà kɔɛ tofaa ni?

⁸Kɛ yɛɛ niaa kɔ cɔ yɛ? Mò va maa langbanɔ vownun volɔɔla cuɛinannda sɔvɛlan-ndo ni? Kɛ o cɛila masaa nin vanaa vownun volɔɔla sɔvɛlan-nda co ni.

⁹Yɛɛ niáà kɔɛ yɛ niko tofaa? Bàà vana-tɛɛngaa-diom Hala-o ni? I co niaa dimul, hiovɔɔ bɛɛ vana-tɛɛngaa-diom Hala-o coo.

¹⁰Kani a ndu Nsaŋ o kɔɔ o co o sɛvaa ni aa: ‹I co kiila nuu vomɔɔ nɔm laci, mò toosial pɔɔ nɔm nɛiyo.›

¹¹Mì dimul niaa toɲaa, o vanaa vanlaandua velu-a tɛɛn, vana-vana yɔŋnun maa ndu Nsaŋ Vana-yinaa le. Kɛ nduyɛ, vana hiow dɔɔnanndo o masale halataala len nin-ndo hiow ndu.

¹²Cɔn o paale Nsaŋ Vana-yinaa len háá hau, vannda co masale halataala len cɔlɔbaa, nduyɛ vanaa kɔlvesɛiya co len hiɔlɔ̀ɔ́ ni.

¹³Kani vanaa-tɛɛngaa-diom Hala-a kpow a tɔŋndo tɛɛnguu diom Hala-o a ndi o kɔɔ háá o telen Nsaŋ-ndo.

¹⁴Te la yeema pɛ le sɔɛi ken bilaa biyɔɔ, mɛɛ ndu Nsaŋ co Elii niaa tuei kon tɔ́ɔ́ le hunɔɔ-o ni.

¹⁵Vana nɔ pɛ nilan, mɛɛ ndú tueí!

¹⁶A nɛ̀ɛ̀ ya tuu yɛnin vanndacieea vaalio ho? A co ko kpen a cuaambɔa co icali o luŋ, mà va caaŋaa ndaa veeloo-a,

¹⁷má va dimio aa: ‹N hɔŋ sɛ̀ŋnden, kɛ la yi le. N soli condun biision, kɛ la ceŋ te.›

¹⁸Kani Nsaŋ hin, o ve dio le, o ve kolɔɔ le, mí vannda dimi aa: ‹Ɲina vɔɔndo co ndu nin ni.›

¹⁹Mí Po vanacieo hun, mó va dioo a kolɔɔ, mí vannda va dimio aa: ‹Hoo ndu vana lepuloo a vana kólaa mamɔiyo o co ni. Caaŋoo vanaa biyaa mulua a vanaa lahakia o co ni.› Kɛ o dɛnnda Kɔlkaloo co tosaa lan nin vannda sinà ni maa Kɔlkalu kalaa sandu.»

²⁰O kon kɔɔli, mí Yeesu kanalan kobila o tosa dɛnnda kaamaala bɔɔ-bɔɔ nin-ndan, kani kobila lan la mangalan te. Mó dimi aa:

²¹«Dɛnɛ palaa co le nɔm, nɔm Korasin! Dɛnɛ palaa co le nɔm, nɔm Bɛtsaida! Kani te dɛnnda kaamaala tosan o niaa lo lan láà tosan pɛ Tir a Sidɔn, maa o co lɛhau le ndáà vownun nin volɔɔla biisilan, mì ndáà deli o loolio nin, mì ndáà mangalan te.

²²Lelan mì dimul niaa, paale kialaa iyamalen, sɔɛi niɛi hiawnin ikalu a sɔɛi vannda Tir a haa Sidɔn.

²³Nɔm Kapɛrnaum yɛ, a helnin pá háá o halataala? Kɛì-kɛì bɛɛ! A sɔlanin tuisio háá ciee-piɔ́m. Kani te dɛnnda kaamaala tosan o nɔm ndo lan láà tosan pɛ lɔ́ɔ́ kon Sodɔm, maa kobi kon ndóò va vɔ hau.

²⁴Lelan mì dimul niaa, paale kialaa iyamalen, sɔɛi niɛi hiawnin ikalu a sɔɛi Sodɔm-nde.»

²⁵O telen kon, mí Yeesu soaa, mó dimi aa: «Pua, nɔm co Vana bɛndoo o halataala a o lɛŋnden coo-o, i mel nɔm balika, le tùú n vin vanaa dɛnɛ sinaa a vanaa kɔlkalua sɔɔn mun, má cɔm cuaambɔa mun-ndo.

²⁶A toɲa, Pua, i mel nɔm balika le tùú n cɛl mí i yɔŋnun lende-o.

²⁷Fuɲa nuu yɔngu ya ɲɔɔn kpow. Vana-vana sina Poo le, te o co Fuɲaa le. Vana-vana sina vɛlɛ Fuɲaa le, te o co Poo a vana Poo yeema le Fuɲa ndɔ cɔmndo-o le.

²⁸Niaa volɔɔlan la co o lebol mì la va o sangaa nin-nda kpow, la hun o ya lo, mì ke niaa pɛngio.

²⁹La siilun volɔɔla nilan, mì la sɔla pɛɛku nuu, kani vana vi kɔllo-o a vana tuisianndo ya co ni, la sɔlanin pɛngio o kɔlta niaalan nin.

³⁰Kani volɔɔla nilan la lusul te, bɔndii nuu connun fefele.»