Read Kissi Matie 13 Bible Online

Matie 13 - Kissi bible

Matie 13

¹Paale len, mí Yeesu fula cɛinin, mó kɔ cal o dalaa kɔngɔ.

²Vannda lo hunɔɔ sɛ́lɔ́ɔ́ o ndu lo tei, mó can, mó luɛi o dɛ̀ndɔ̀ɔ́ nin, mó cal. Mí sɛ́lɛ́ bɛndu kon sim o kɔngɔɔ coo.

³Mó viaw sɔɛi o nda lo lándán o talelan nin, mó va dimio aa: «Paale pilɛ, mí langbanɔɔ pum can le maalon saŋɔɔ.

⁴Telen o va saŋɔɔ-o, mí kullon pum deli o nɛiyo demullo, mí yowva toal, má dia mun.

⁵Mí n'pum deli o powtan nin, nɛɛ puulu bɔɔ ve le-a. Mí n keleŋa vulɔɔ, kani puulu bɔɔ ve lon te.

⁶Kɛ mɛɛ paalen le fula, mí n ɲɔfɔliaa, mí n vesa, kani puundun ve le.

⁷Mí n'tiŋ deli o yɔɔn nin, mí yɔɔn hindu, mí n mial mun.

⁸Mí n'pum deli o lɛŋnde kɛndɛlen, mí n koam, mí yasalan lapum la koam kullon kɛmɛ, lapum belaŋɔmpum, lapum yɛ beleyaa.

⁹Vana nɔ pɛ nilan, mɛɛ ndu tueí!»

¹⁰Mí kaandennda sɔɔnguu Yeesu ikɛi, má ɲuna ndu aa: «Le yɛɛ n soaa yɛ o vannda lo o talelan nin?»

¹¹Mí Yeesu mulul nda aa: «Niaa, la sɔla sinapɛngoo le dɛnnda viannanndan bilaa biyɔɔ a masale halataala len o kɔɔ, kɛ nda sɔla sinapɛngu vaa lende le.

¹²Kani vana nɔnin o ba-o sɔlanin cɔɔloo mo kui ndu o ba taw. Kɛ vana nɔ o ba loo ndu, hali o pɔmbɔ co ndu o ba-o hialunnin ndu.

¹³Lelan ya soaa o nda lo o talelan nin ni, kani a co tofaa, kɛ a co cɔ le, a co tueyɔɔ, kɛ a co bila biyɔɔ le.

¹⁴O kon mí sɔɛi Esai vana-tɛɛngaa-diom Hala-o dimi-e peelun nda coo aa: ‹La tuɛinin ɲɛkɛndɛi, kɛ la biinin bila le, la tofanin ɲɛkɛndɛi, kɛ la cinin te.

¹⁵Kani kɔlta vannda ha la laasian, a cii nilan baŋulɔn, má kinda hɔltan, yɔŋii nda cɔ a lahɔl, mà tuei a lani, mà bii bila a kɔlta ndalan, mà mangalan, o kon mì singi nda.›

¹⁶Kɛ niaa, dɛnɛ kɛndɔɔ co le niaa! Kani hɔlta niaalan la co cɔu, nila niaalan la co tueyɔɔ.

¹⁷I co niaa toɲaa dimul, vanaa-tɛɛngaa-diom Hala-a a vanaa sandaa bɔɔ-bɔɔ ndáà yeema mì ndáà ce ɲɛ niaa co cɔu-vo, kɛ a cí le, mì ndáà tuei ɲɛ niaa co tueyɔɔ-o, kɛ a tuí le.»

¹⁸«Lelan niaa, la yaŋ nilan, mì la tuei kɔlɔ tale vana saŋaa n'mallo ho.

¹⁹Kulun deli o nɛiyo demullo-on, mun co vanaa tuɛi sɔɛi masale Hala len, a bii ndi bila le-a ni. Vana vɔɔndo hin pɛ, o soli nda sɔɛi saŋnun ken nda o lakɔl-le o lakɔl.

²⁰Kulun deli o powtan nin-ndon, mun co tɔɔmasele vana tuei sɔɛi Hala-e, mó cɛl ndi fɔ́ɔ́fɔ̀, a ɲaaloo-o ni,

²¹kɛ ndu pila nɔ n'puundu le. Vana cɛl sɔɛi le telen bingi-o o co ni. Kɛ te dɛnɛ palaa, te kon te yɛle tolaalen le komal ndu dɔ́ɔ́ pɛ le sɔɛi Hala-i ken, o mal nɛiyo.

²²Kulun deli o yɔɔn nin-ndon, mun co tɔɔmasele vana tuei sɔɛi Hala-e, kɛ mí buulannda ceenndan a yeemɛi bolofaa hialu fondaa ndu o kɔl kpede-o ni. O kon sɔɛi Hala-i co ndu o kɔl-le kum te.

²³Kulun deli yɛ o lɛŋnde kɛndɛlen-ndon, mun co tɔɔmasele vana tuei sɔɛi Hala-e, mó bii ndi bila-o ni. Vana kon ndu nɔla mò kom, mì yasala ndɔlan lapum la soli kullon kɛmɛ, lapum kullon belaŋɔmpum, lapum yɛ kullon beleyaa.»

²⁴Mí Yeesu dimul nda vɛlɛ tale celen aa: «Masale halataala len le co maa langbanɔ saŋ malun kɛndɔn o ciɛi ndɔɛi nin-ndo.

²⁵Kɛ telen vannda va o lɔan-ndo, mí yaamɔɔ ndɔɔ kɔ saŋ bil vɔɔndo o malun ndɔn mun nin, mó kɔannun.

²⁶Telen malun kɛndɛn o saŋ-ndon vil mi n koam-ndo, mí bil vɔɔn kon bɛɛ vul.

²⁷Mí vanaa baalaa vana iciɛɔ hun dimul ndu vana iciɛɔ aa: ‹Fallo, o co malun kɛndɔn te n saŋ o ciɛi nɔmnde nin te? Kɛ kuɛɛ bil vɔɔndo ho ndu fula yɛ niko kpeekpei?›

²⁸Mó mulul nda aa: ‹Yaamɔɔ tosa ken ni.› Má ɲuna ndu aa: ‹A yeema mì n kɔ hɔɔnuu ndu?›

²⁹Mó mulul nda aa: ‹Ɛ-ɛ, yɔŋii niaa lo o ndu sungɔɔ mì la sungu a maalon latulu.

³⁰La mal lende mò sul latulu vellaa-velle háá o telen koavaa. Te kovɔɔ tiiya pɛ, i dimulnin vanaa koavaa mà sungu fɔlɔn bil vɔɔn kalaa, mà yiw ndu kpɔŋndan le ndu lomɔɔ, o kon à mɔɔsiaa niko maalon, a vow mun o konda.›»

³¹Mí Yeesu dimul nda vɛlɛ tale celen aa: «Masale halataala len le co ko kpen a kulii mutarde, i vanndo pum cua mó tɔal o nakɔ ndɔɔ nin-nde.

³²Ndi hiow dɔɔnanndo o kullon kpow tɛɛn ni. Kɛ ndíì vulɔɔ, mí i hiaw tɔlɔɔla va o nakɔ kon nin-ndan kpow bandei, mí i siŋnun yɔm bɛndu-bɛndoo, mí yowva coocoo a hun tangul o lɛvun ndɔn.»

³³Mí Yeesu dimul nda vɛlɛ tale celen aa: «Masale halataala len le co ko vɛlɛ kpen a lɛvɛnndo, o vanalanɔɔ pum cua mó vow o kpeyan kilo leyáá-o nin-ndo. Mí lɛvɛn kon tosa mí kpeyan kon kpow hindu hindɔɔ pila.»

³⁴Sɔɔn mun kpow, o talelan nin Yeesu dimul vannda mun ni, ndóò dimul nda isɔɔ-sɔɔ mí ndóò kɛɛ taloo vow lenin te,

³⁵haliko mi sɔɛi vana-tɛɛngaa-diom Hala-o ndóò dimi-e ndíì peelun aa: «I kumbinin sondoo mì soo o talelan nin, mì soo a dɛnnda viannannda co kabi ceendo cɔwnun ndan o kɔɔ.»

³⁶O kon mí Yeesu faŋan nɛɛ sɛ́lɔ́ɔ́ va-a, mó luɛi cɛinin. Mí kaandeŋaa ndɔa sɔɔnguu ndu ikɛi, má dimul ndu aa: «Tɛɛsial naa tale bil vɔɔn nda saŋ o ciɛi nin-ndo.»

³⁷Mó mulul nda aa: «Vana saŋ malun kɛndɔn-ndo, ndu co Po vanacieo ni.

³⁸Ciɛi, ndi co ceendo ni. Malun kɛndɔn, mun co vanaa co masale halataala len cɛlɔɔ-a ni. Bil vɔɔndo yɛ, ndu co buɛyaa Vana vɔɔndo ni.

³⁹Yaamɔɔ saŋ ndu-o, ndu co masa ɲinaa vɔɔnda ni. Telen kovɔɔ, ndu co mɛɛlula ceendo ni. Vanaa koavaa, nda co mɛlɛkaa ni.

⁴⁰Nduyɛ, mɛɛ vana suingi bil vɔɔndo le ndu malɔɔ o yin nuaa yɛ, lende koni mɛɛlula ceendo la vanin ni.

⁴¹Po vanacieo viamnin mɛlɛkaa ndɔa, mà hun suingi vanaa co caanda lueiyo o pɔwlan nin-nda a vanaa tosaa dɛnnda vɔɔnda,

⁴²mà viow nda o tóndó leyinndo nin, nɛɛ caŋndan a ciŋndon sɔmndo vanin-nda.

⁴³O telen kon, vanaa sandaa vanin tengaa maa lepala o masale Fuɲa nda len nin. Vana nɔ pɛ nilan, mɛɛ ndu tueí!»

⁴⁴«Masale halataala len le co vɛlɛ ko kpen maa bolofaa co o vianaa yondoo pum nin-ndo. Vanndo saalɔnndo ndu, mó cɔɔlu ndu vionɔɔ. O lo ɲaale kon dɔwnɔnndo tei, mó pisi ɲɛm ndɔn kpow, mó kɔ piandu yondo kon.

⁴⁵Masale halataala len le co ko vɛlɛ kpen a yulanɔ co kela yɔɔvala báà kalalan-ndo.

⁴⁶Mɛɛ o komal o pilɛ, mó kɔ piisuu ɲɛm ndɔn kpow, mó piandu yɔɔva kon.»

⁴⁷«Masale halataala len le co ko vɛlɛ kpen a yala yɔɔyaa nda vuu o dalaa nin, mó kɔandu suvaa súú-súù ka-o.

⁴⁸Mɛɛ o pɛ, má nan ndu o kɔngɔ. Má cal, má hɛli a kɛndɛa, má vow kan o kayalan nin, má viaw a vɔɔnda.

⁴⁹Lende koni o vanin o ceendo mɛɛlulan ni. Mɛlɛkaa kɔanin mà kɔ soli vanaa vɔɔnda vanaa sandaa tɛɛn,

⁵⁰mà viow nda o tóndó leyinndo nin, nɛɛ caŋndan a ciŋndon sɔmndo vanin-nda.»

⁵¹Mí Yeesu ɲuna nda aa: «La bii pá mun kpow bila?» Má mulul ndu aa: «Oi!»

⁵²Mó dimul nda aa: «Lelan vana sɛvaa latɔŋ kɛ́-kɛ̀ sɔla pɛ pɛɛkoo a masale halataala len o kɔɔ, ndu vel simlacinɔ cɛi soli sɔɔn sɛnɛiyon a n'paandon o bolofaa ndɔɔ nin-ndo.»

⁵³Yeesu ciiyo talelan ndan dimio kpow, mó faŋan.

⁵⁴Mó kɔa o lɛŋnde ndɔlen nin, mó kandu vannda pɛɛkoo o cɛila lekaanndan nin, mí kɔndɔfillo bii nda. Má va dimio aa: «Kuɛɛ o fula yɛ a kɔlkaloo ho a á kaamaala o co lan tosaa lan?

⁵⁵O co macoaa po langbanɔ cuaa layindɔɔ ho le? O co kala ndɔ le co Mari le? O co macoaa pɔmbɔa ndɔa le co Nsaki, Yosɛf, Simɔn a Yude le?

⁵⁶Yemaa ndɔa co macoaa naa tɛɛn kpede le? Kuɛɛ ndu fula yɛ nin a kpaayaa ho?»

⁵⁷Ken kpeekpei yɔŋ ni a laalan ndu le. Kɛ mí Yeesu dimul nda aa: «Vana-tɛɛngaa-diom Hala-o fola biiloo nɛɛ-nɛɛ celen te, fɔ o lɛŋnde ndɔlen nin a o ndu lo cɛinin.»

⁵⁸Le laalan nda lepɛŋndo, Yeesu tosa dɛnnda kaamaala bɔɔ lon te.