Read Kissi Matie 14 Bible Online

Matie 14 - Kissi bible

Matie 14

¹A boondii ken, mí Herɔde va masaa Kalile-o tuɛi Yeesu tɔ́ɔ́.

²Mó dimul vanaa ndɔa baalaa aa: «Nsaŋ Vana-yinaa ni, o tendul mó fula vanvílɛ́iya tɛɛn. Lelan o nɔ kpaayaa le dɛnnda kaamaalan tosaa nuaa ni.»

³Kani Herɔde ndóò bii nin Nsaŋ, mí ndóò baa ndu yɔlɔn, mí ndóò mal ndu o kaasoo le sɔɛi Herodiade lanɔɔ Filipe puapilɛ ndu Herɔde-e.

⁴Kani Nsaŋ va ndu dimullo maa o nɔ dí, mò cua Herodiade kon, mò va laa ndɔ le.

⁵Ndóò yeema le Nsaŋ diyɔɔ, kɛ siòònde va ndu a vannda, kani nda kpow a va cɔu maa vana-tɛɛngaa-diom Hala-o Nsaŋ va ni.

⁶Nduyɛ, o kafo paale vialannde Herɔde len coo, mí cua Herodiade-o ya vanaa va o kafo kon coo-a o hɔl. Mɛɛ ɲɔɔ hɛnan Herɔde tei,

⁷mó mɛnalan cuaambɔɔ maa ɲɛ-ɲɛ o ɲuna ndu pɛ o kenin ndu.

⁸Mí kala cuaambɔɔ soaa cuaambɔ kon o lani, mó dimi aa: «Ke ya bolle Nsaŋ Vana-yinaa len o sɛtio nin nanu!»

⁹Mí mɔnɛi bii masaa, kɛ le tùú ndóò cii nin mɛnan-ndo, a le tùú vanaa o veelu le dioo-a va lon-ndo, mó cɛl le ndu bolle Nsaŋ Vana-yinaa len yɔngoo.

¹⁰Mó viam vanndo le kɔlan Nsaŋ bollen kiolɔɔ nɛɛ o va o kaasoo-a.

¹¹Má hun a bolle ndɔlen o sɛtio nin, má yɔngu cuaambɔɔ, mó yoo kala ndɔ.

¹²Mí kaandeŋaa Nsaŋ-nda cua Nsaŋ kalaa, má kɔ kumbu ndu. Má kɔ downun Yeesu kona.

¹³Yeesu tueyɔɔ sɔɔn mun, mó luɛi o dɛ̀ndɔ̀ɔ́ nin, mó kɔannun o fonda pum nɛɛ yililia. Sɛ́lɔ́ɔ́ tueyɔɔ lende, má can o kobilan nin, má kɔa ndu kɔɔli a n'pelu.

¹⁴Ndóò fulaa o dɛ̀ndɔ̀ɔ́ nin, mó ca vannda sɛ́lɛ́ bɛndoo, mí ɲííye bii ndu a nda, mó singi namtaa va lon-nda.

¹⁵Paalen yɔngɔnndo, mí kaandennda sɔɔnguu ndu ikɛi, má dimi aa: «Fondaa ho co bɔɔ yilili! Nduyɛ telenndo kɔɛnnun nihau. Mingi vannda o cieon, mà kɔ piinduu ɲɛm dian.»

¹⁶Mí Yeesu mulul nda aa: «A kɔa le! Niaa pila ke nda ɲɛdiaa.»

¹⁷Kɛ má dimul ndu aa: «Bululan tan ŋuɛɛnu a suwva nda ŋiɔn daama naa n nɔ nanu ni.»

¹⁸Mó dimi aa: «La cuu ya ɲɛm mun nanu!»

¹⁹Mó dimul sɛ́lɔ́ɔ́ le calle o billo coo. Mó cua bulula ŋuɛɛnula lan a suvaa ŋiɔŋaa kan, mó heelu hɔlla o halataala, mó dɔaw duaa. O kon mó yimiyimi buloo, mó yɔngu kaandennda, mí kaandennda piɔw sɛ́lɔ́ɔ́ ndu.

²⁰Mí vannda kpow dia, má pum ca. Mí o bingi-bingi lo-o pia kambɛilan tɔ́ a latiɔn.

²¹Vanaa de bulu kon-nda va vanpiaandua vàálan laŋuɛɛnu, a cɔm vanlaandua a cuaambɔa le.

²²O kon kɔɔli, mí Yeesu dimul kaandennda le luɛyɔɔ o dɛ̀ndɔ̀ɔ́ nin, mà hiow ndu laci le muungoo o kɔngɔɔ pilɔɔ. O telen kon, mó dimul vannda le muungoo o la nda lo.

²³Ciiyo vannda mingio o la nda lo, mó kɔa landɔ o pembei coo le piɛilen. Mí ɲumndan ma tul ndu lon ndu pilɛ kpé.

²⁴Dɛ̀ndɔ̀ɔ́ ndóò faŋan nin o kɔngɔɔ, mó kɔa lándán o mɛnndan coo. Mí mɛnndan ma va ndu ɲiinduuo taw, kani hoeiye ve hɔŋ kpengii ndáà yeema-e le.

²⁵A di-tɛɛn paale siaa, mí Yeesu toal, mó kɔa o mɛmma ihɛllan coo le tiiyaa kpengii kaandennda va-e.

²⁶Kaandennda cɔu ndu kɔlan o mɛmma ihɛllan coo, mí kɔltan la laasian-nda, má dimi aa: «Ɲinaa co hoo ni!» Má mɛli yeelan a siòònde.

²⁷Fɔ́ɔ́fɔ̀, mí Yeesu dimul nda aa: «La ɲulul kɔltan, ya ni, siòòŋii bii niaa le!»

²⁸Mí Piɛr dimul ndu aa: «Maalii, te nɔm ni, dimul-la mì kɔɛ o mɛnndan coo nɛɛ n co-a.»

²⁹O kon mó dimul ndu aa: «Hun!» Mí Piɛr fula o dɛ̀ndɔ̀ɔ́ nin, mó va kɔlan o mɛnndan coo nɛɛ Yeesu va-a.

³⁰Kɛ ndóò cɔu mɛɛ hoeiye va hɔŋndo fúkù-fùkù yɛ, mí siòònde bii ndu, mó kandu tolɔɔ o mɛnndan bɛngu. Mó yonda aa: «Maalii, ciindiaa ya!»

³¹Fɔ́ɔ́fɔ̀, mí Yeesu siɛndi baa, mó saa ndu, mó dimul ndu aa: «Laalan nɔmndo dɔɔnan bɔɔ, le yɛɛ n kiisan yɛ?»

³²Má muungu helɔɔ o dɛ̀ndɔ̀ɔ́ nin, mí hoeiye cal.

³³Mí vanaa va o dɛ̀ndɔ̀ɔ́ nin-nda baŋ vulan Yeesu o labɛngunin, má dimi aa: «Po Hala-o lekɛ́ndɛi n co ni.»

³⁴Ndáà taŋɔɔ, má kɔ tiiya o lɛŋnde Kenesarɛt len.

³⁵Mí vanaa va o lɛŋnde len nin-nda sina Yeesu, má viam kiilaa o tàndá kon nin kpow, mí vannda hun a vanaa lanàá o ndu lo.

³⁶Má ɲɔɔlu ndu, haliko mi ndóò cɛl mi vanaa lanàá ndáà pilan bɔɔle doma ndɔɔ daama. Nduyɛ, vanaa pilan ndu domaa-a kpow, má sɔla siongɔɔ.