Read Kissi Matie 17 Bible Online

Matie 17 - Kissi bible

Matie 17

¹Palɛi ŋɔmpum o kon kɔɔli, mí Yeesu cua Piɛr, Nsaki a Nsaŋ puapilɛ ndɔ, mó kɔa a nda o pembii vilɛiye pum coo.

²Mó mangalan nda o hɔl, mí hɔlla muungu ndu volio maa lepala, mí volɔɔla va ndu lekɔɔ lan la muungu lahumbu maa ɲɛ-tengaa.

³Mí Moise nda Elii fula nda o hɔl, má va suukanndo a Yeesu.

⁴Mí Piɛr cua sɔɛi, mó dimul Yeesu aa: «Maalii, o naŋ bɔɔ mì n vannun nanu! Taa cɛl pɛ, i tondu cɛila kolalan tan yáá, o pilɛ le nɔm, o pilɛ le Moise, o pilɛ le Elii.»

⁵O lo sɔɛi, mí yumbuyumbu ɲɛ-tengaa pum kumbu nda. Mí diomndo pum soaa o yumbuyumbu kon nin aa: «Po ni ya kaola taw-vo co hoo ni, o ya hɛli a kɔlkɛndɔɔ-o. La bíí ndu diom.»

⁶Kaandennda tueyɔɔ diom kon, má deli lɛŋ a kuumbuan, mì siòònde bii nda taw.

⁷Kɛ mí Yeesu sɔɔnguu, mó piilian nda, mó dimi aa: «La cɔn, siòòŋii bii niaa le!»

⁸Má cua hɔlla, kɛ Yeesu ndu pilɛ kpé nda ce ni.

⁹Tuma nda va pembei tolɔɔ-o, mí Yeesu sila nda aa: «Háá mi Po vanacieo tendul fulaa vanvílɛ́iya tɛɛn, La dímul vana-vana a vundule niaa ce len-nden o kɔɔ le.»

¹⁰O kon kɔɔli, mí kaandennda ɲuna Yeesu aa: «Le yɛɛ vanaa pɛɛkaa latɔŋnda co yɛ niko dimio maa Elii co fɔlɔn hunɔɔ ni?»

¹¹Mó muli aa: «I co toɲa maa Elii co hunɔɔ, mò hun mingi ɲɛ-ɲɛ o fonda ndɔɔ.

¹²Kɛ mì dimul niaa maa Elii hin nin, kɛ vannda sina ndu le, má tosal ndu mɛɛ ndáà yeema yɛ. Lende koni nda saangiaanin Po vanacieo ni.»

¹³Mí kaandennda bii dɔ́ɔ́ bila maa sɔɛi Nsaŋ Vana yinaa-e o va nda dimullo ni.

¹⁴Ndáà tiiyaa nɛɛ sɛ́lɔ́ɔ́ va-a, mí langbanɔɔ pum sɔɔnguu Yeesu ikɛi, mó baŋ vulan ndu o labɛngunin,

¹⁵mó dimi aa: «Maalii, tuinun po nuu iɲíí, naa ɲinaa co ndu ni, lɔ́ɔ́ pum o del o yin, lɔ́ɔ́ pum o del o mɛnndan nin.

¹⁶I yoo kaandeŋaa nɔmnda ndu, kɛ a nɔla ndu singi le.»

¹⁷Mí Yeesu muli aa: «Éé, niaa vanaa nila kalua a vanaa laasiannda ha! Háá telen kuɛɛ nɛ ya lo yɛnin niaa ikɛi? Vɛ̀ɛ̀ kpɛ́ ya lo yɛnin biwnɔnndo a niaa? La cuu ya ndu nanu.»

¹⁸Mí Yeesu soaa ɲina vɔɔn kon, mó fula poombɔ kalaa nin, mí poombɔɔ siangun bɛɛ o foofo kon.

¹⁹O kon mí kaandennda sɔɔnguu Yeesu ikɛi, má ɲuna ndu sɔɔsɔɔ aa: «Le yɛɛ naa n bumba yɛ ɲina vɔɔndo ho tovɔɔ?»

²⁰Mí Yeesu mulul nda aa: «Kani la nɔ laalan bɔɔ le. I co niaa toɲaa dimul, niáà nɔ pɛ laalanndo maa kulii mutarde, niáà nɔla mi niáà dimul pembei he aa: ‹Faŋan o fondaa ho, mà kɔɛ o nda›, mì ndíì faŋan. Ɲɛ-ɲɛ niáà bumbanin tosa le.

²¹Kɛ ɲina vɔɔn vaa nuaa nɔla vanndo faŋan kɔɔli le, te o co a piɛilen a á sumndo biyɔɔ le.»

²²Tuma nda va kelaa o tàndá Kalile-o nin-ndo, mí Yeesu dimul kaandeŋaa ndɔa aa: «A malnin Po vanacieo vannda o ba,

²³mà dii ndu, kɛ mò tendul, mò fula vanvílɛ́iya tɛɛn o paale yàándɔlen.» Mí kaandennda buulan taw.

²⁴Mɛɛ Yeesu nda kaandeŋaa ndɔa tiiya Kapɛrnaum, mí vanaa va mulu Cɛi-Hala-o biyɔɔ-a soaa o Piɛr lo, má dimul ndu aa: «Mò va maa vana niaa bɛndoo ndu sala mulu Cɛi-Hala-o le?»

²⁵Mí Piɛr muli aa: «O salà.» Piɛr luɛyɔɔ cɛinin, mí Yeesu keleŋa sɔɛi cua, mó ɲuna ndu aa: «Simɔn, vɛ̀ɛ́ n yiyan yɛ a sɔɛi he: nɛ̀ɛ̀aa masaa co o lɛŋnden coo-a bii yɛ muloo o ba, pilacieea baa mialla?»

²⁶Mó mulul ndu aa: «Mialla o ba nda bii ni.» Mí Yeesu dimul ndu aa: «Mɛɛ kon co dimio ni maa pilaciea nda co lecoo le!

²⁷Kɛ yɔŋii naa n tɛɛmbuu nda kɔltan, kɔ o dalaa nin, mà kɔ landu dolinnde, suw tase n cuanin-ndo, a kumbi ndu sondoo, a soli volii n saalunnin ndu o sondo-e, a hun yɔngu le naa ŋiɔn.»