Read Kissi Matie 18 Bible Online

Matie 18 - Kissi bible

Matie 18

¹Tuma kon, mí kaandennda sɔɔnguu Yeesu ikɛi, má ɲuna ndu aa: «Nɛ̀ɛ́ hiow yɛ vaa o bɔɔ o masale halataala len nin?»

²Mí Yeesu veelu cuaambɔ pɔmbɔɔ pum, mó simi ndu nda tɛɛn,

³mó dimi aa: «I co niaa toɲaa dimul, te la mangalan mì la muungu maa cuaambɔa pɔmbɔa le, la lueinin o masale halataala len nin te.

⁴Lelan, vana-vana tuisin pɛ maa poombɔ pɔmbɔɔ ho, ndu hiawnin vaa o bɔɔ o masale halataala len nin ni.

⁵Nduyɛ vana-vana cɛl pɛ cuaambɔ pɔmbɔɔ maa hoo o diola nilan, mɛɛ ya pila o cɛl ni.»

⁶«Kɛ vana yɔŋnun pɛ sabu le cuaambɔ laalan ya-o lueiyo o pɔwlan nin, o co fisa le vana kon, mà baa ndu pow bɛndoo o labolo, mà viow ndu o mɛmma ihɛllan bɛngu di.

⁷Dɛnɛ palaa co le ceendo, le tùú o co vannda pelon lueiyo o pɔwlan nin-ndo. I co toɲa maa fɔ mí pɔwlan la yɔŋnun, kɛ dɛnɛ palaa co le vana co yɔŋnɔn sabu le pɔwla lan yɔŋnɔnndo-o.

⁸Te ba nɔmndo, te kon te pelii nɔmnde co tosa ni ma del o pɔwlan nin, mɛɛ kiolu ba kalaa, te kon te pelii kalɛi, ma viow ndi polon. Kani o co fisa ma sɔla yoomu fɛɛn-fɛɛndo a baa ndu pilɛ, te kon te a pelei ndii pilɛ, a balan tan tiɔn te kon te pelon mún miun kpow nɔu, mà viow nɔm o yinnde fɛɛn-fɛɛnnden nin.

⁹Te hɔlte nɔmnden le co yɛ tosa ni ma del o pɔwlan nin, mɛɛ kala hɔlte len ma viow len polon. Kani o co fisa ma sɔla yoomu fɛɛn-fɛɛndo a hɔlten le pilɛ a á hɔltan nɔu latiɔn kɛ ma viow nɔm o ɲánndávàà.

¹⁰La mandan le cuaambɔa pɔmbɔa vaa nuaa o pilɛ pɛɛsaa. Kani i co niaa dimul, mɛlɛkaa ndaa co Fuɲa ni co o halataala-o hɔlla tofaa o halataala tuŋ-tuŋ.

¹¹Bau Po vanacieo hin le o lo-o ciindiaa[9].»

¹²Mí Yeesu dimi taloo aa: «Vɛ̀ɛ̀ niaa yiyan yɛ? Te vanndo pum nɔ pɛ saa kɛmɛ, mì o pilɛ o nda tɛɛn o lo, vɛ̀ɛ̀ o mɛi saa belaŋɔmahiɔɔlu a à ŋɔmahiɔɔlua o pembei coo mò kɔɛ o lo-o nuwviaa le?

¹³I co niaa toɲaa dimul, te o saalun pɛ ndu, o dɔwnun ɲaale le saa pilɛ kon hiovɔɔ ɲaale o dɔawnun le saa belaŋɔmahiɔɔlu a à ŋɔmahiɔɔlua lo le-a-o.

¹⁴Lende koni, Fuɲa niaa co o halataala-o yeema mì cuaambɔa pɔmbɔa ha o pilɛ bɛɛ lo le.»

¹⁵«Te puapilɛ nɔmndo cua pɛ hakio, kɔ ma soo o ndu lo niaa ndu ŋiɔn kpé. Te o tuei pɛ nɔm diom, mɛɛ o siŋnun vɛlɛ puapilɛ nɔmndo.

¹⁶Kɛ te o tui nɔm diom te, veelu vana pilɛ, te kon te vanaa ŋiɔn le sɔɛi kalɛi kpede toosiaa seiya a ŋiɔn, te kon te a yaa o hɔl.

¹⁷Te o kɛɛ pɛ le nda nilan yaŋɔɔ, a cɔm kunda vanaa laalannda sɔɛi kalɛi, te o kɛɛ nin pɛ kunda vanaa laalannda diom, mɛɛ cɔ ndu maa vana-mangalaa-isɔɔ celen, maa vana biyaa mulu.

¹⁸Mì dimul niaa toɲaa, ɲɛ-ɲɛ niaa yii pɛ o lɛŋnden coo, ndu yiinunnin o halataala, ɲɛ-ɲɛ niaa timbi vɛlɛ pɛ o lɛŋnden coo, ndu timbinnin o halataala.

¹⁹Mì dimul niaa vɛlɛ toɲaa maa te vanaa ŋiɔn o niaa tɛɛn a cɛlan pɛ o lɛŋnden coo le ɲɛ-ɲɛ ɲunaa o piɛilen nin, Fuɲa ni co o halataala-o kenin nda ndu.

²⁰Kani nɛɛ vanaa ŋiɔn, te kon te vanaa yaa cuungian pɛ o diola nilan, i co nda tɛɛn.»

²¹O kon mí Piɛr sɔɔnguu, mó dimi aa: «Maalii, te puapilɛ nuu cua pɛ hakio a ya, vɛ̀ɛ̀ kpɛ́ ya bɛnda yɛ mì mal ndu haki? Vɛ̀ɛ̀ bɛmbɛ leŋɔmmɛw ni?» Mí Yeesu mulul ndu aa:

²²«I dimul nɔm te aa bɛmbɛ leŋɔmmɛw. Kɛ háá belaŋɔmmɛw bɛmbɛ leŋɔmmɛw.»

²³Lelan masale halataala len le co maa masa ndóò yeema le vanaa ndɔa baalaa konaa ɲunaa-o.

²⁴Ndóò kandɔɔ sɔɔn yaasiaa, má cuu ndu langbanɔ pilɛ fulaa o vanaa ndɔa baalaa tɛɛn, mí volion hel ndu taw-taw.

²⁵Le tùú ndóò nɔ ɲɛ le mun salaa loo, mí vana ndɔ bɛndoo dimi le ndu pila, laa ndɔ, cuavaa ndɔa a ɲɛ-ɲɛ ndóò ndɔ pisio, le kuee ndɔ kon salaa.

²⁶Mí vana baala kon del lɛŋ ndu o labɛngunin, mó dimi aa: «Biwnun a ya, i co nɔm volin nɔmndon salal kpede!»

²⁷Mí ɲííye bii vana ndɔ bɛndoo a ndu, mó mal ndu haki le kuee kon, mó mal ndu kɔnndan.

²⁸Vana baala kon fulaa, mó komal caan ndɔ pilɛ, ndu bɛɛ vana baalaa o va ni maa ndu, o kuee ndɔɔ va volion ɲɛ-pɔmbɔ daama-o. Mó bii ndu, mó ŋɔaw ndu bololan, mó dimi aa: «Fɔ ma sala kuee nuu.»

²⁹Mí caan ndɔ kon del ndu o labɛngunin, mó ɲɔɔlu ndu aa: «Biwnun a ya, i co kuee nɔmndo sala kpede!»

³⁰Kɛ mó kɛɛ, mó kɔ mal caan ndɔ kon o kaasoo, mó lo lon háá mó cii kuee ndɔɔ sala.

³¹Caaŋaa ndɔa cɔu sɔɛi ken, mí mɔnɛi bii nda taw-taw. Má kɔ downun vana nda bɛndoo kona.

³²Le hee, mí vana ndɔ bɛndoo veelu vana baala kon, mó dimul ndu aa: «Éé, nɔm vana baala kɔlvesɛiyo ho! Kuee ni va nɔm-ndo kpow, mí mal nɔm haki le ndu le tùú n tɛɛlun ya-o.

³³Nɔm bɛɛ, nɔm óò bɛnda mì nɔm óò tuinun caan nɔm iɲíí mɛɛ ya tuinun nɔm iɲíí yɛ.»

³⁴Mí vana ndɔ bɛndoo tuulu kɔllo taw, mó mal ndu vanaa saangiaa vannda-a o ba háá mó cii kuee pilaa sala kpede.

³⁵Mí Yeesu dimi vɛlɛ aa: «Lende koni Fuɲa ni co o halataala-o tosanin a niaa ni, te la mel puapilɛa niaa haki a kɔlta niaalan kpow le.»