Read Kissi Matie 2 Bible Online

Matie 2 - Kissi bible

Matie 2

¹O paale Herɔde len[1] Yeesu velun Bɛtlɛhɛm o tàndá Yuda-o nin ni. Mí vanaa kɔlkalua sina loeon kɔlɔɔ-a can a ba paalen le can-ndo, má tiiya Yerusalɛm,

²má ɲuna aa: «Kuɛɛ masa Yuifia co yɛ, o langa volun-ndo pɛɛn? Kani n lo a ba paalen le can-ndo, mí n ca loei ndɔɛi. Le ndu biiloo naa n hin ni.»

³Masaa Herɔde tueyɔɔ sɔɛi ken, mó voolu nda Yerusalɛmnda kpow.

⁴Mí masaa mɔɔsiaa bolii vanaa-solia-lasálàá kpow a vanaa pɛɛkaa latɔŋnda, mó ɲuna nda nɛɛ Krista ndóò bɛnda le volɔnndo-a.

⁵Má mulul ndu aa: «Bɛtlɛhɛm o tàndá Yuda-o nin. Kani ɲɛ vana-tɛɛngaa-diom Hala-o dimi-o co hoo ni aa:

⁶‹Nɔm Bɛtlɛhɛm yɛ, nɔm co hoo o tàndá Yuda-o nin-ndo, a toɲa, o co nɔm te hiow dɔɔnanndo o kobila co o tàndá Yuda-o nin-ndan tɛɛn te. Kani o nɔm ndo masaa tosanin vanaa nia masalen coo-o fulanin ni, Israɛlla pɛɛn›».

⁷O kon mí Herɔde veelu vanaa kɔlkalua sina kan loeon kɔlɔɔ-a o vionnɔnndo nin, mó ɲuna nda telen loei ndíì fula kpeekpei-yo.

⁸O kon kɔɔli, mó viam nda Bɛtlɛhɛm, mó dimul nda aa: «La kɔ ɲuuniaa sɔɛi poombɔ kalaa tɛɛ-tɛɛ. La saalun pɛ ndu, la tosa mì sina, haliko mi ya bɛɛ i kɔ biilu ndu».

⁹Masaa ciiyo vanaa kɔlkalua kan congɔnndo lende, má kɔa. Má cannun dɔ́ɔ́ loei ndáà ce ken a ba paalen le can-ndo-e kɔlan nda laci. Ndíì tiiyaa o fonda cɛlɛkpɔɔ va-o, mí i sim.

¹⁰Ndáà cɔu mí loei sim, má dɔawnun ɲaale taw.

¹¹Má luɛi cɛinin, má ca cɛlɛkpɔɔ nda Mari kala ndɔ, má baŋ vulan, má biilu ndu. O kon kɔɔli, má kumbi volɔɔla ndalan, má ke ndu ɲɛm ndáà yoo ndu-on: sianion, ansan a mir.

¹²O kon kɔɔli, mí Hala dimul nda o lɔma sɔlaan nin maa a muungu lɛ Herɔde o ibuŋ te. Le hee, má keinun a nɛi celen, má muungun o lɛŋnde ndalen nin.

¹³Vanaa kɔlkalua kɔnndan, mí mɛlɛkanɔ Hala-o cɔmnun Yosɛf o lɔma sɔlaan nin, mó dimul ndu aa: «Cɔn ma cua cɛlɛkpɔɔ nda kala ndɔ, mì la ɲaanun o lɛŋnde Esipte len nin. La kɔ lo lon háá telen ya dimulnin nɔm le muungoo-o, kani Herɔde nuwviaanin cɛlɛkpɔɔ ho le ndu diyɔɔ.»

¹⁴Mí Yosɛf can icɔllo, mó cua cɛlɛkpɔɔ nda kala ndɔ, mó kɔ viannun a nda Esipte.

¹⁵Mó kɔ lo lon háá mí Herɔde vu. Ken tosan haliko mi o Mɛlɛka ndóò dimi a sondo vana-tɛɛngaa-diom Hala-o-o ndóò peelun aa: «Mí veelu po nuu, mó faŋan Esipte.»

¹⁶Herɔde cɔu maa vanaa kɔlkalua hui ndu, mó tuulu kɔllo taw-taw. Mó viam vannda le kɔlan cuaambɔa ndáà hiw-vɔ vɔsila tiɔn te-a kpede diwvo, kandɔɔ Bɛtlɛhɛm kɔlan a cieon balu ndu-on kpow, maa mɛɛ vɔsila vanaa kɔlkalua ndáà dimul ndu lan la va yɛ.

¹⁷O kon mí sɔɛi Yeremi vana-tɛɛngaa-diom Hala-o dimi-e i peelun aa:

¹⁸«Yéélan la co sɔɛi Rama, Koŋullo a caŋnda fúkpàà-fùkpààlan la co sɔɛi lon, Rasɛl co cuavaa ndɔa caŋndo ni, o kɛɛ ɲɔɔlu nda co ndu-o, kani cuavaa ndɔa cuu.»

¹⁹O piɔ́m Herɔde-o kɔɔli, mí mɛlɛkanɔ Hala-o fulal Yosɛf o lɔma sɔlaan nin Esipte,

²⁰mó dimul ndu aa: «Cɔn ma cua poombɔɔ nda kala ndɔ, mà muungu o lɛŋnde Israɛl-ten nin, kani vanaa va poombɔɔ kɔɔli le ndu diyɔɔ-a vi.»

²¹Mí Yosɛf can, mó cua poombɔɔ a kala ndɔ, má muungu o lɛŋnde Israɛl-ten nin.

²²Kɛ ndóò tueyɔɔ maa Arkelaus va masaa o tàndá Yuda-o coo, o fonda Herɔde fuɲa ndɔ-o ni, mí siòònde bii ndu le muungoo lon. Mí Hala soaa vɛlɛ o ndu lo o lɔma sɔlaan nin, mó kɔa o tàndá Kalile-o nin,

²³mó kɔ cal o kobi nda veelu aa Nasarɛt-o nin, haliko mi sɔɛi vana-tɛɛngaa-diom Hala-o dimi-e ndíì peelun aa: «A veelunin ndu aa Nasarɛtenɔɔ.»