Read Kissi Matie 20 Bible Online

Matie 20 - Kissi bible

Matie 20

¹«Masale halataala len le velan a dɛnɛ vana bɛndu cɛiyo pum, o fula idiiyo púŋ le vanvalla yɔɔ o nakɔ n'rɛsɛn ndɔɔ nin-ndo.

²Má cɛlan nda ndaa le nda salaa volii támái i pilɛ le paalen. Mó yaa nda o nakɔ ndɔɔ nin.

³O lɛɛlɛ ŋɔmahiɔɔlundɔɔ, mó fula, mó saalun a pum o ifal, a ve ɲɛ-ɲɛ tosa le.

⁴Mó dimul nda aa: ‹Niaa bɛɛ la kɔ tosa vallo o nakɔ nuu nin, dɔ́ɔ́ i ke niaa sala bɛnda-o.›

⁵Má kɔa. A paalen o pol, mó fula vɛlɛ. A lɛɛlɛ yàándɔɔ o kon kɔɔli, mó tosa vɛlɛ ɲɛ pilɛ kon.

⁶A lɛɛlɛ ŋuɛɛnundɔɔ, mó fula vɛlɛ, mó saalun a pum, a vannun isisi lon. Mó ɲuna nda aa: ‹Le yɛɛ niaa niinu yɛ hau nanu kpɛŋ, la tosa ɲɛ-ɲɛ le?›

⁷Má mulul ndu aa: ‹Vana-vana cue naa le baala le.› Mó dimul nda aa: ‹Mɛɛ niaa bɛɛ la kɔ o nakɔ nuu nin.›

⁸Paalen delɔɔ, mí vana nakɔɔ dimul vana ndɔ mandaa bolofaa aa: ‹Veelu vanaa baalaa mà sala nda. A kandu pɛ a vanaa mɛɛlu lakɔ-a a kɔ mɛɛlu a vanaa tasea kɔɛ-a.›

⁹Mí vanaa kɔɛ a lɛɛlɛ ŋuɛɛnundɔɔ-a sɔla vana-vana volii támái i pilɛ.

¹⁰Mí vanaa tasea hun o kon kɔɔli, a va yiyanndo maa a hiawnin sɔlaa lende. Kɛ mí nda bɛɛ vana-vana sɔla volii táamái ndii pilɛ.

¹¹Ndáà sɔlaa mun, má soaa sɔɔn pɔmbɔn a vana nakɔɔ.

¹²Má dimi aa: ‹Lɛɛlɔɔ ndu pilɛ kpé vanaa mɛɛlu haa hunɔɔ-a tosa vallo ni, a muungu naa ɲɛ pilɔɔ keo naa ndaa? Naa yɛ, nanu naa n niinu ni, hangullo niinu naa palaa kpɛŋ.›

¹³Mó mulul vana pilɛ o nda tɛɛn aa: ‹Caan nuu sei! I tosal nɔm lakafa le. Vɛ̀ɛ̀ o co le nɔm salaa volii támái i pilɛ le naa n cɛlan te?

¹⁴Bii sala nɔmndo mà kɔɛnnun. I yeema mì ke vana mɛɛlaa mɛɛ ya ke nɔm yɛ.

¹⁵Mò va maa i nɔ dí le ɲɛ ya yeema-o tosaa a ɲɛm nun te? Bàà te i tosa pɛ dɛnɛ kɛndɔɔ, ken luei nɔm paŋalaa o kɔl?›

¹⁶O kon kɔɔli, mí Yeesu dimi maa lelan, vanaa mɛɛlaa vanin vanaa tasea, mì vanaa tasea siŋnun vanaa mɛɛlaa.»

¹⁷Tuma Yeesu va helɔɔ Yerusalɛm-ndo, mó veelu kaandeŋaa ndɔa tɔ́ a à ŋiɔnda o fondaa pum, mó dimul nda nɛi-tɛɛn aa:

¹⁸«Má cè naa helɔɔ Yerusalɛm! À kɔ malnin Po vanacieo bolii vanaa-solia-lasálàá a vanaa pɛɛkaa latɔŋnda o ba, mà yaala ndu le piɔ́mndo sɔlaa.

¹⁹A malnin ndu vɛlɛ vanaa-mangalaa-isɔɔa o ba le ndu mamɔɔ, mà soŋ ndu, mà baŋ ndu o yɔm singafilaa coo. Kɛ mò tendul o paale yàándɔlen.»

²⁰Paale pilɛ, mí kalaa poaa Sebede-a sɔɔnguu Yeesu ikɛi a poaa ndɔa, mó baŋ vulan ndu o labɛngunin le ndu sɔɛi pum ɲunaa.

²¹Mí Yeesu ɲuna ndu aa: «Yɛɛ nɛ n yeema yɛ?» Mó mulul ndu aa: «Cɛl mì poaa nia ŋiɔnda ha kɔ va icali nɔm ikɛi o masale nɔmnden nin, o pilɛ nɔm o ba kɛndɔɔ coo, o pilɔɔ nɔm o ba mɛllo coo.»

²²Mí Yeesu mulul ndu aa: «La sínà ɲɛ niaa co piɛiyo-o le. La nɔla pá kolɔɔ a taala kólaa ya co kolɔ̀ɔ̀-o?» Má muli aa: «N nɔla!»

²³O kon mó dimul nda aa: «Ì co toɲa maa la kolnin a taala kólaa nuu. Kɛ le calle ya o ba kɛndɔɔ coo a o ba mɛllo coo, o co ya le yɔngu vana fondala lan te, le vanaa Fuɲa nuu toosiaa lan-nda la co ni.»

²⁴Kaandeŋaa tɔ́a tɔ̀a tueyɔɔ sɔɛi ken, má tambu kɔl a puapilɛa ŋiɔnda.

²⁵Mí Yeesu veelu nda, mó dimul nda aa: «La sinà maa simlacia vanaa-mangalaa-isɔɔa-a co vanaa-mangalaa-isɔaa kan masalen tosaa coo a paa-kala, maa vanaa ndaa bɛndua bɛɛ a co nda kindilaa.

²⁶Kɛ o co lende le i vanin niaa tɛɛn te. Vana-vana yeema pɛ le vaa vana bɛndoo niaa tɛɛn, ndu bɛnda mò siŋnun buɛi niaa.

²⁷Vana-vana yeema pɛ le vaa vana tasoo niaa tɛɛn, ndu bɛnda mò siŋnun cɛ niaa.

²⁸Lende Po vanacieo hin ni. O hín mì vana tosal ndu baala le, kɛ le vannda baalaa tosallo a le yoomu ndɔɔ yɔngoo le vanaa bɔɔ-bɔɔ baŋaa.»

²⁹Tuma nda va faŋanndo Yeriko-o, mí sɛ́lɛ́ bɛndoo del Yeesu kɔɔli.

³⁰Vanaa sumɛiya pum a va icali o nɛiyo dangalaa nda ŋiɔn. Ndáà tueyɔɔ maa Yeesu co hiovɔɔ ni, má yonda aa: «Maalii, Po David-o, tuinun naa iɲíí!»

³¹Sɛ́lɔ́ɔ́ va nda yaalianndo haliko mi ndáà mei, kɛ má cɔɔlu yonda aa: «Maalii, Po David-o, tuinun naa iɲíí!»

³²Mí Yeesu sim, mó veelu nda, mó dimul nda aa: «Yɛɛ niaa yeema yɛ mì tosal niaa?»

³³Má dimul ndu aa: «Maalii, n yeema mì hɔltan la kumbin naa.»

³⁴Mí ɲííye bii ndu a nda, mó pilan nda hɔltan. Fɔ́ɔ́fɔ̀, má ca, má del ndu kɔɔli.