Read Kissi Matie 21 Bible Online

Matie 21 - Kissi bible

Matie 21

¹Tuma nda kandu sɔɔnguuo Yerusalɛm ikɛi, má tiiya Bɛtfase ciee-lekɔɔ o Pembii oliviei ikɛi-yo, mí Yeesu viam kaandennda nda ŋiɔn.

²Mó dimul nda aa: «La kɔ o ciee co niaa laci-o. La tiiya dɔ́ɔ́ pɛ, la komalnin sofɛlɛ laandoo o baa a sofɛlɛ téndóó ndu ikɛi. La kɔ timbi nda, mì la cuu ya nda.

³Te vanndo ɲuna pɛ niaa, la mulul ndu aa: ‹Maalii nɔ makoo a nda ni.› O kon a malnin niaa hunɔɔ a nda.»

⁴Dɛnɛ kon yɔŋnun haliko mi sɔɛi vana-tɛɛngaa-diom Hala-o dimi-e peelun aa:

⁵«La dimul vannda Siɔn aa: ‹La tofa vɔ masa niaa hunɔɔ o niaa lo. O co vana kɛndɛ bɛndu. O co icali o sofɛlɔɔ coo, sofɛlɛ téndóó pɛɛn, o sofɛlɛ laandoo kom-ndo.›»

⁶Mí kaandeŋaa kan kɔa, má kɔ tosa mɛɛ Yeesu ndóò dimul nda yɛ.

⁷Má hun a sofɛlɛ laandu kon a cuale ndɔlen, má hɛɛnduu domala ndala bɛndulan nda o lakɔɔ, mí Yeesu cal lecoo.

⁸Mí vannda taw o sɛ́lɛ́ kon tɛɛn a pɛngɛliaa domala ndala bɛndulan o nɛi. Mí a pum a va lɛvun yɔmnde kilio, má va mun yɛɛmbuuo o nɛi.

⁹Mí sɛ́lɛ́ bɛndu va ndu laci a ndu kɔɔli-o va kɔlan a yondaa aa: «Biiloo co le Po David-o! Biiloo co le vana co hunɔɔ o diola Mɛlɛka lan-ndo! Biiloo co le Hala o halataala!»

¹⁰Tuma Yeesu luɛi Yerusalɛm ciee-o, mí cieo kpow biiŋun. Mí vannda va ɲuunianndo aa: «Nɛ̀ɛ́ co yɛ hoo?»

¹¹Mí sɛ́lɔ́ɔ́ va mulio aa: «Yeesu ni, vana-tɛɛngaa-diom Hala-o, o fula Nasarɛt o tàndá Kalile-o nin-ndo!»

¹²Mí Yeesu luɛi o Cɛi-Hala-o nin, mó toaw vanaa va ɲɔɔn pisio-a a vanaa va ɲɔɔn piondɔɔ-a kpow, mó ɲiinduu tabalila vanaa singaa n'volia a kpɛŋɛla vanaa va kangboa pisio-a.

¹³O kon kɔɔli mó dimul nda aa: «O co o sɛvaa aa: ‹Cɛi nuu veelunnin aa Cɛi lepiɛiyo.› Cɛi kon niaa niaa siinguu buulula vuiya nuaa ni.»

¹⁴Mí vanaa sumɛiya a namtaa a sɔɔnguu ndu ikɛi o Cɛi-Hala-o nin, mó singi nda.

¹⁵Kɛ bolle vanaa-solia-lasálàá a vanaa pɛɛkaa latɔŋnda cɔu dɛnnda kɔndɔfilta o tosa lan a mɛɛ cuaambɔa va yoondiaa o Cɛi-Hala-o nin yɛ aa: «Biiloo co le Po David-o», má tambu kɔl.

¹⁶Má dimul ndu aa: «Vɛ̀ɛ̀ a co pá ɲɛ nda co dimio-o tueyɔɔ?» Mí Yeesu dimul nda aa: «Oi. Vɛ̀ɛ̀ kabi bɛɛ la dimi vɔ o co o sɛvaa-o le aa: ‹A toosiaa lisa nɔmndo cuaambɔa pɔmbɔa a á sondola cɛlɛkpɛa co vɔɛiyo-a o lasondo?›»

¹⁷O kon mó mɛi nda, mó faŋan ciee lon, mó kɔannun Betani, mó kɔ lɔl lon.

¹⁸Idiiyo púŋ, telen o va muungoo o kobio nin-ndo, mí yiaan ma va ndu nɛiyo.

¹⁹Mó ca voosu tumndo o nɛiyo lekɔɔ, mó sɔɔnguu, kɛ o komal ɲɛ-ɲɛ lecoo le, fɔ pei daama. O kon mó dimul ndu aa: «Nɔm a kum-ndɛ fɛɛn a fɛɛn te!» Fɔ́ɔ́fɔ̀, mí voosu kon vesa.

²⁰Kaandennda cɔu dɛnɛ kon, mí kɔndɔfili bɛndoo bii nda. Má ɲuna aa: «Vɛɛ voosu tumndo ho looku yɛ dɔ́ɔ́ vesaa ho fɔ́ɔ́fɔ̀?»

²¹Mí Yeesu mulul nda aa: «I co niaa toɲaa dimul, te la nɔ pɛ laalanndo, mì la kiisan te, la tosanin dɛnɛ tosalan hoo a voosu tumndo-o, kɛ la dimulnin vɛlɛ pembei he aa: ‹Sungun ndon mà kɔ del o mɛmma ihɛllan nin›, mì kon tosan.

²²Ɲɛ-ɲɛ niaa piɛi pɛ a laalanndo, la sɔlanin ndu.»

²³Mí Yeesu kɔa o Cɛi-Hala-o nin. O lo pɛɛkoo, mí bolii vanaa-solia-lasálàá a kaasoŋaa kɔlkalua lelɛŋnda hun ɲuna ndu aa: «Nɛ̀ɛ́-nɛ̀ vem yɛ nɔm dɛnndan ndan tosaa? Nɛ̀ɛ́ ke yɛ nɔm di kon?»

²⁴Mí Yeesu mulul nda aa: «Ya bɛɛ i co niaa isɔɔ ɲuna, sɔɛi ndii pilɛ kpé. Te la mulul-la pɛ, i cɔm niaa vana vem ya dɛnndan ndan tosaa-o.

²⁵Yinɔɔ Nsaŋ van vannda-o, nɛ̀ɛ́ óò vem yɛ ndu? Hala bàà vanndacieea?» Kɛ mí nda pila yiyan, má dimi aa: «Te n muli pɛ aa: ‹Hala óò vem ndu ni›, o co naa ɲuna aa: ‹Kɛ le yɛɛ niaa kɛɛ yɛ niko ndu laalan?›

²⁶Te n muli yɛ vɛlɛ pɛ aa: ‹Vanndacieea óò vem ndu ni›, siòònde bɛnda mì i bii naa a sɛ́lɔ́ɔ́ ho, kani nda kpow a ce maa vana-tɛɛngaa-diom Hala-o Nsaŋ yɔŋnun ni.»

²⁷O kon má kɔ mulul Yeesu aa: «N sina le.» Mí ndu bɛɛ dimul nda aa: «Mɛɛ ya bɛɛ, i cɔmnin niaa vana vem ya dɛnndan ndan tosaa-o le.»

²⁸Mí Yeesu dimul nda aa: «Vɛɛ niaa yiyan yɛ? Langbanɔ pilɛ ndóò nɔ poaa nda ŋiɔn, mó dimul o tasoo aa: ‹Po nuu, kɔ tosal-la hau baalaa o nakɔ n'rɛsɛn nuu nin!›

²⁹Mí po kon mulul ndu aa: ‹I co lakɔ le.› Kɛ o kon kɔɔli, mó mangala yiyanndo, mó kɔa.

³⁰Mó soaa o ò diinndɔɔ lo, mó dimul ndu sɔɛi pilɛi ken. Mí kon ndu muli aa: ‹I cɛl Pua, i co lakɔ.› Kɛ o kue le.

³¹O vanaa ŋiɔŋaa kan nin, ɔ́ɔ̀ o tosa hɛnan fuɲa ndɔ-o-o» Má muli aa: «O tasoo!» Mí Yeesu dimul nda aa: «Mì dimul niaa toɲaa, vanaa biyaa mulua a vanaa suundaa hiawnin niaa laci o masale Hala len nin.

³²Kani Nsaŋ hin o niaa lo, mó hun cɔm niaa nɛi sandaa, kɛ la laalan ndu le, kɛ mí vanaa biyaa mulua a vanaa suundaa laalan ndu. La ce dɛnnda lan kpow, kɛ la mel yɔŋ vɔɔndo mì la laalan ndu le.»

³³«La yaŋ vɛlɛ nilan o tale celen. Simlaci yungoo pum tɔl nakɔ n'rɛsɛnndo ni, mó kunga ndu pindo, mó toaw doolaa lenin, mó tangul cɛi cumulaa lenin. Ciiyo, mó sɔɔa vanaa tósà baalaa o nakɔ n'rɛsɛnndo nin-nda nakɔ kon o ba. O kon kɔɔli, mó kɔannun kelaa o lɛŋnde celen nin.

³⁴Telen kiandaa n'rɛsɛnndo tiiyaa, mó viam buɛyaa ndɔa o vanaa tósà baalaa o nakɔ n'rɛsɛnndo nin-nda lo haliko mi ndóò sɔla tɔnɔ fula o nakɔ kon nin-ndo[11] o ndɔɔ.

³⁵Kɛ mí vanaa tósà baalaa o nakɔ n'rɛsɛnndo nin-nda bii buɛyaa ndɔa kan, má lɔaa o pilɛ, má dii o pilɔɔ, má vii o yàándɔɔ a powtan.

³⁶Mó viam vɛlɛ buɛyaa celen, nda va sɛ́lɛ́ hiovɔɔ a tasea. Mí vanaa tósà baalaa o nakɔ n'rɛsɛnndo nin-nda tosa vɛlɛ a kan mɛɛ nda tosa a à tasea yɛ.

³⁷O mɛɛlulan, mó vim nda po ndɔɔ. Mó dimi aa ‹Po nuu ndu a kenin ndu bɛɛlen.›

³⁸Kɛ vanaa tósà baalaa o nakɔ n'rɛsɛnndo nin-nda cɔu po ndɔɔ, má dimulan aa: ‹Vana nɔ kɛ́ɔ-vo co hoo ni. La hun n diinun ndu, mí n loo kɛ́ ndɔɔ.›

³⁹Má bii ndu, má soli ndu o nakɔɔ kɔɔli, má dii ndu.

⁴⁰Te vana nakɔɔ hin niko pɛ, vɛ̀ɛ̀ o tosa yɛnin a vanaa tósà baalaa o nakɔ n'rɛsɛnndo nin-nda?»

⁴¹Má mulul ndu aa: «O diwnin vanaa diuvaa n'vanndacieaa kan o venin a iɲíí le, mò yɔngu vanaa baalaa celen nakɔ kalaa le mandaa, á kenin ndu tɔnɔ nakɔɔ o telen bɛnda-o-a.»

⁴²O kon mí Yeesu dimul nda aa: «Kabi bɛɛ la ci vɔ sɔɛi he isɛvaa le aa: ‹Pow vanaa tangulaa cɛiya viow-vo, pow kon siŋnun pow lebollo ni? Mɛlɛka o ba dɛnɛ kon fula ni. Dɛnɛ kaamaa bɛndoo co kon naa o hɔl ni.›

⁴³Lelan, i co niaa dimul, à hialunin masale Hala len niaa o ba, mà sɔɔ len vanaa-mangalaa-isɔaa celen o ba, mì nda tosa mì le kom mì le nɛŋi makoo.

⁴⁴Vana-vana del pɛ o pow kon coo, o yomiyomi. Vana-vana pow kon del pɛ coo, o cui ndu.»

⁴⁵Bolii vanaa-solia-lasálàá a Faliisia tueyɔɔ sɔɔn mun, má bii bila maa le nda Yeesu va sɔɛi ken dimio ni.

⁴⁶Má va nɛilan nuwviaa le ndu biyɔɔ, kɛ mí siòònde bii nda a sɛ́lɔ́ɔ́, kani a va ndu cɔu maa vana-tɛɛngaa-diom Hala.