Read Kissi Matie 23 Bible Online

Matie 23 - Kissi bible

Matie 23

¹O kon kɔɔli, mí Yeesu dimul sɛ́lɔ́ɔ́ a kaandeŋaa ndɔa aa:

²«Vanaa pɛɛkaa latɔŋnda a Faliisia bɛnda ni mà tɛɛsiaa tɔŋnda Moise lan ni.

³Lelan, la bii sɔɔn nda co niaa dimullo-on kpow, mì la kela lecoo, kɛ la del kela ndaa kɔɔli le. Kani dimio nda caa ni, kɛ a tosa ɲɛ nda dimi-o le.

⁴À co volɔɔla lusulaalan yiiyo mà siiluu vannda o lacongú, kɛ nda pila cɛl bɛɛ mà hiiluu lan a isu le.

⁵Dɛnnda nda co tosaa lan kpow, haliko mi vannda ce nda nda co lan tosaa ni. A cɛn pɛ, a tongu boofiaala ndalan, a bɛndi kpengun domala ndala bɛndulan.

⁶À yeema calle o fondala taselan o ɲɛdiaa kafoo dioo, à yeema calle o kpɛŋɛla taselan coo o cɛila lekaanndan nin.

⁷À yeema mì vannda va keiyo nda yilɔɔ o bɛ́ɛ̀la bɛndulan. À yeema vɛlɛ mì vannda va nda veeloo aa: ‹Kɔɔfa›.

⁸Kɛ niaa niaa, la tosa mì vannda veelu niaa Kɔɔfa lan te, kani Kɔɔfanɔɔ ndu pilɛ kpé niaa nɔ ni. Niaa kpede, puapilɛa niaa co ni.

⁹La veelu vana-vana o lɛŋnden coo aa ‹Fuɲa› niaa le, kani vanndo ndu pilɛ kpé co Fuɲa niaa ni, Fuɲa co o halataala-o pɛɛn.

¹⁰La tosa mì vannda veelu niaa aa: ‹Vana kúndaa› le, kani Vana kúndaa ndu pilɛ kpé niaa nɔ ni, Krista pɛɛn.

¹¹O hiow niaa kpow-vo bɛnda mò va buɛi niaa.

¹²Vana-vana heelun pɛ, ndu sɔlanin tuisio tootoo. Kɛ vana-vana tuisin pɛ, ndu sɔlanin heeloo.»

¹³«Dɛnɛ palaa co le niaa, niaa vanaa pɛɛkaa latɔŋnda a niaa Faliisia muuluannda ha! Kani la co vannda dio masale halataalaa kindallo. Niaa pila co luɛyɔɔ le, la co vɛlɛ cɛlɔɔ mì vanaa yeema le luɛyɔɔ-a luɛi le. [

¹⁴Dɛnɛ palaa co le niaa, niaa vanaa pɛɛkaa latɔŋnda a niaa Faliisia muuluannda ha! Kani la co ɲɛm vanlaandua piaandaa ndaa vi-a kpow poondiaa, mì la muungu vɛlɛ piɛile vilɛi-vilɛilen tosaa, haliko mi vannda dɔw niaa taasi. Lelan, yamɛi kilulunnin niaa teengen, ɲíí venin te[12]].

¹⁵Dɛnɛ palaa co le niaa, niaa vanaa pɛɛkaa latɔŋnda a niaa Faliisia muuluannda ha! Kani la co heeloo a tuusoo o lɛŋnden coo a o mɛmma ihɛllan coo, le vanndo sɔlaa mò handun niaa coo. O cuu yɛ pɛ handɔn, la cɔm maa o bɛnda mò kɔɛ o ɲánndávàà, maa ndu hiow niaa vɔwlen bɛmbɛ lediin.

¹⁶Dɛnɛ palaa co le niaa, niaa simlacia sumɛiya! La co dimio aa: ‹Vana mɛnan bɛɛ a Cɛi-Hala-o, kon co isɔɔ le. Kɛ te vanndo mɛnan pɛ a sianin co o Cɛi-Hala-o nin-ndon, mɛɛ mɛnan kpeekpeiyo co kon ni.›

¹⁷Niaa vanaa sumɛiya bii ha dɛnɛ bila le-a! Sianion a Cɛi-Hala co sianion dindio-o, yɛɛ hiow yɛ?

¹⁸La co vɛlɛ dimio aa: ‹Te vanndo mɛnan pɛ a fonda-loamaa-lasálàá, kon co isɔɔ le, kɛ te o mɛnan pɛ a sálà co o fonda-loamaa-lasálàá coo-o, mɛɛ mɛnan kpeekpeiyo co kon ni.›

¹⁹Niaa vanaa sumɛiya ha, sálàá a fonda-loamaa-lasálà co sálàá dindi-o, yɛɛ hiow yɛ?

²⁰Vana mɛnan pɛ a fonda-loamaa-lasálà, mɛɛ ndu cii mɛnan a ɲɛ-ɲɛ co lecoo.

²¹Vana mɛnan pɛ a Cɛi-Hala-o, mɛɛ ndu cii mɛnan a Cɛi-Hala kalaa a á vana co lenin-ndo.

²²Vana mɛnan pɛ vɛlɛ a halataalaa, mɛɛ ndu cii mɛnan a kpɛŋɛ lemasa Hala-o a á vana co icali lenin-ndo.

²³Dɛnɛ palaa co le niaa, niaa vanaa pɛɛkaa latɔŋnda a niaa Faliisia muuluannda ha! Kani la co o-tɔ́ndɔɔ solio o tɔlɔɔwlan lapum nin maa mɛnte, anɛt a kumin, kɛ mì la va dɛnnda hiow vaa lasɔvɛ o tɔŋndo nin-ndan malɔɔ: lan la co dɛnɛ sandaa, vannda ɲííye tuinɔnndo a laalanndo ni. Dɛnnda lan niáà bɛnda le tosaa ni handɔɔ niko o dɛnnda tɔ̀lan coo.

²⁴Niaa simlacia sumɛiya, la co mɛmma niaama kolan yueiyo le pengia pɔmbɔa solio lenin, mì la va ɲɔɔmɛɛa misio o man kolɔɔ.

²⁵Dɛnɛ palaa co le niaa, niaa vanaa pɛɛkaa latɔŋnda a niaa Faliisia muuluannda ha! Kani la co taala kólaa a hɛngɛiyo tueiyo o kɔɔ, mì la va leninndo mɛiyo o nɔɔlɛiyo a ɲɛm niaa poondiaa vannda o laba-on a á ɲɛm niaa sɔla a yeemɛi bɛnduei-yon.

²⁶Niaa Faliisia, vanaa sumɛiya niaa co ni. La dindi fɔlɔn lenin taala kólaa a hɛngɛiyo, haliko mi lekɔɔlio bɛɛ dendu.

²⁷Dɛnɛ palaa co le niaa, niaa vanaa pɛɛkaa latɔŋnda a niaa Faliisia muuluannda ha! Kani la maa sɛila nda kɛɛmiaa mì la naŋ taw o kɔɔ lan niaa co ni, kɛ nduyɛ leninndo co o piaa cá a paala vanvílɛ́iya a á ɲɛm siovɛi súú-súù ka.

²⁸Lende koni niaa bɛɛ co ni, vana tofa pɛ niaa, a ce niaa maa vanaa sandaa. Kɛ nduyɛ o kpeekpeiyo nin, la co a piaa a sondo yeelaa a á dɛnnda vɔɔnnda súú-súù ka.

²⁹Dɛnɛ palaa co le niaa, niaa vanaa pɛɛkaa latɔŋnda a niaa Faliisia muuluannda ha! Kani la co sɛila vanaa-tɛɛngaa-diom Hala-a cɔvɔɔ, mì la va sɛila vanaa sandaa kɛɛmiaa,

³⁰mì la muungu dimio aa: ‹Te náà n va pɛ o paale fuɲaa naa, n ve cɛlan naa ndaa le vanaa-tɛɛngaa-diom Hala-a diwvo le.›

³¹La co cɔmndo o kon vakpa maa poaa vanaa diw vanaa-tɛɛngaa-diom Hala-a niaa co ni.

³²La siow niko dɛnɛ fuɲaa niaa mamaa kandu-o!

³³Niaa kɛwva ha, niaa hɔ̀ɔ̀lɔ́a! Vɛ̀ɛ̀ niaa ɲaanun yɛnin yamɛi co niaa hunɔɔ kilulɔn le kɔlan o ɲánndávàà-e?

³⁴Lelan i co niaa vanaa-tɛɛngaa-diom Hala-a, vanaa kɔlkalua a vanaa pɛɛkaa latɔŋnda vim. La diwnin a pum, mì la baŋ a pilla o yɔmii singafilɛi coo, mì la koŋ a tɔ̀a o cɛila lekaannda niaalan nin, mì la tol nda yɛlen o kobi oo kobi nin,

³⁵haliko mi dɛnɛ piɔ́m vanaa tɛɛmbuu isɔɔ le-a del niaa o lebol, vanaa nda diw o lɛŋnden coo-a pɛɛn. Kandɔɔ a piɔ́m Abɛl vana sandaa-o, kɔ bii háá a piɔ́m Sakari, po Berekia-o-o, ò niaa dii Cɛi-Diandaa a fonda-loamaa-lasálàá tɛɛn-ndo.

³⁶I co niaa toɲaa dimul, sɔɔn mun kpow n toalnin vanndacieea vaalio coo.»

³⁷Mí Yeesu dimi aa: «Kpòkóó Yerusalɛm! Yerusalɛm, nɔm diw hoo vanaa-tɛɛngaa-diom Hala-a, má vii vanaa nda vim nɔm-nda a powtan-ndo! I kindin o nɛi oo nɛi coo le cuavaa nɔmnda mɔɔsiaa mɛɛ sɔɔ komsaa mɔɔsiaa cuavaa ndɔa o kumbanndan bɛngu nuaa yɛ, kɛ à cɛl te.

³⁸Lelan, cɛi niaa lonin fondo fúú.

³⁹Kani i co niaa dimul, la ci lɛnin ya le, háá mì la dimi aa: ‹Biiloo co le vana co hunɔɔ o diola Mɛlɛka lan-ndo!›»