Read Kissi Matie 28 Bible Online

Matie 28 - Kissi bible

Matie 28

¹Paale pɛngiaalen hiovɔɔ, a paale siaalen o kundɛiyo coo, mí Mari fula Makdala-o nda Mari-o pilɔɔ a kɔa tofaa o sɛiyo.

²Fɔ́ɔ́fɔ̀, mí lɛŋnden le ɲiiya taw, kani mí mɛlɛkanɔ Hala-o toal fulaa o halataala, mó hun ɲindu powvo, mó cal lecoo.

³Vanáà ce ndu pɛ aa piɔɔ-volia ni, volɔɔla va ndu lekɔɔ lan la va lahumbu few-few.

⁴Mí siòòŋii bɛnduei bii kpalilla, má vow, má muungu maa n'vanvílɛ́i.

⁵Kɛ mí mɛlɛkanɔɔ cua sɔɛi, mó dimul vanlaandua aa: «Niaa, siòòŋii bii niaa le. Kani i sina maa Yeesu nda baŋ o yɔm singafilaa coo-o niaa co nuwviaa ni.

⁶O co nanu le, kani o tendul maa mɛɛ ndóò dimi yɛ. La hun tofa fonda o va o yambaa-o.

⁷La kɔ dimul kaandeŋaa ndɔa cɔ́-cɔ́ maa o tendul. Maa o hiow nda laci Kalile, lon nda canin ndu ni. Hee yáà nɔ le niaa dimullo ni.»

⁸O kon má keleŋa faŋan o sɛiyo, má muungu a siòònde a á ɲaale bɛndoo, má ɲaanun, má kɔ dimul kaandennda yoongu kon.

⁹Fɔ́ɔ́fɔ̀, mí Yeesu hun nda o ibuŋ, mó yil nda aa: «Lavosɛ!» Má sɔɔnguu, má saa ndu pelon, má biilu ndu.

¹⁰O kon mí Yeesu dimul nda aa: «Siòòŋii bii niaa le, la kɔ dimul puapilɛa nia le kɔlan Kalile, lon nda canin ya ni.»

¹¹A va vɔ nɛi-tɛɛn, mí vanaa pum o vanaa cɔvaa va sɛiyo cumullo-a tɛɛn a luɛi o kobio nin, má kɔ downun simlacia vanaa-solia-lasálàá dɛnnda yɔŋnun-ndan kpow kona.

¹²Mí simlacia vanaa-solia-lasálàá a simlacia lelɛŋnda kɔ tundu, má luɛi vanaa cɔvaa kan nin a volion taw,

¹³má dimul nda aa: «La dimul vannda aa: ‹Icɔllo, n va o lɔan, mí kaandeŋaa ndɔa hun ciimbuu dialun ndɔn.›

¹⁴Sɔɛi ken i del bɛɛ masa ibungaa o lani, n sina mɛɛ naa n co ndu dimul haliko la sɔla isɔɔ le yɛ.»

¹⁵Mí kpalilaa cumulaa kan a bii volin mun, má tosa mɛɛ nda cɔm nda le tosaa yɛ. Mí sɔɛi ken tiw Yuifia tɛɛn háá paalen nden hau.

¹⁶Mí kaandeŋaa tɔ́ a ò pilɛa kɔa Kalile, o pembii Yeesu ndóò cɔm nda-e coo.

¹⁷Ndáà cɔu ndu, má biilu ndu. Kɛ mí vanaa pum a sika.

¹⁸Mí Yeesu sɔɔnguu, mó dimul nda aa: «Kpaayaa kpow yɔngun ya o halataala a o lɛŋnden coo.

¹⁹La kɔ mì la siinguu vanaa-mangalaa-isɔɔa súúlan kpow kaandennda, mì la yin nda o diola Fuɲaa, Poo a Kɔl-Diandaa,

²⁰mì la pɛɛku nda ma manda sɔɔn ya dimul niaa-on kpow. I co niaa ikɛi lepalaa-lepala háá a ceendo mɛɛlulan.»