Read Kissi Matie 6 Bible Online

Matie 6 - Kissi bible

Matie 6

¹«La caa dɛ, la tosà dɛnɛ kɛndɔɔ vannda o hɔl haliko ma candu niaa le, yɔŋii niaa fola vɔ̀ngɔ̀ niaa bɛnda le sɔlaa-o Fuɲa niaa co o halataala-o o ba.

²Lelan, taa va pɛ vana bala fondoo ɲɛ pum keo, tosà mì vannda kpow muli hɔlla o nɔm ndo maa mɛɛ vanaa muuluannda tosà o cɛila lekaanndan nin a o nɛilan coo yɛ le. Kani nda, le vannda nda sangalaa nda tosà lende ni. Mì dimul niaa toɲaa, a cii vɔ̀ngɔ̀ ndaa sɔla.

³Kɛ taa va pɛ vana bala fondoo ɲɔɔ keo, ba mɛl nɔmndo sina ɲɛ ba kɛndɛ nɔmndo co tosaa-o le,

⁴haliko ma ke vana bala fondoo ɲɛ n co ndu keo-vo o vionnɔnndo nin, mì Fuɲa nɔm co cɔu o vionnɔnndo nin-ndo mingul nɔm.»

⁵«La va pɛ Hala piɛiyo, la va maa vanaa muuluannda le, á yeema piɛilen isisi o cɛila lekaanndan nin a o nɛilan coo le vannda cɔmnɔnndo-a. Mì dimul niaa toɲaa, a cii vɔ̀ngɔ̀ ndaa sɔla.

⁶Kɛ nɔm, a va pɛ Hala piɛiyo, luɛi o nɔmndo cɛinin di-di, mà kindan dioo kɔɔli, mà piɛi Fuɲa nɔm o vionɔnndo nin-ndo. Fuɲa nɔm ca o vionnɔnndo nin-ndo yɔngunin nɔm ɲɛ n piɛi-yo.

⁷La va pɛ Hala piɛiyo, la kui sɔɔn fondon maa vanaa súúla celennda le. Nda nɔ o lakɔl maa a kui pɛ sɔɔn, a sɔla mulio le lan.

⁸La vial nda le, kani Fuɲa niaa ndóò cii nin ɲɛ niaa nɔ makoo-o sina, lɔ́ɔ́ pá niáà ɲuna ndu.

⁹Lelan mɛɛ niaa bɛnda mì la piɛi yɛ co hoo ni aa: ‹Fuɲa naa co o halataala-o, màá vana-vana sina maa ladiandaalan diola nɔmndan la co ni!

¹⁰Màá masale nɔmnden le hun! Màá hɛnan nɔmndo tosan o lɛŋnden coo, mɛɛ o co tosanndo o halataala yɛ!

¹¹Yɔngu naa n diaa lepalaa-lepala-o le paalen nden hau.

¹²Mal naa haki le tɛɛmbuula naalan, mɛɛ naa bɛɛ n mal vanaa tɛɛmbuu a naa-a haki yɛ.

¹³Mal naa mì n del o tɔɔndan nin te, kɛ baŋa naa masa ɲinaa vɔɔnda o ba. [Kani nɔm nɔ masalen, kpaayaa a biiloo le fɛɛn a fɛɛn ni. Amiina!›][5]

¹⁴Kani te la mal pɛ vannda haki le tɛɛmbuula ndalan, Fuɲa niaa co o halataala-o bɛɛ malnin niaa haki.

¹⁵Kɛ te la mel caanda haki le, mɛɛ Fuɲa niaa bɛɛ melnin niaa haki le tɛɛmbuula niaalan te.»

¹⁶«Telen niaa co va o sumndo nin-ndo, la yii hɔlla maa vanaa muuluannda le. Kani nda, a cɛn pɛ a ɲaandiaa hɔlla le vannda cɔmndo maa o sumndo nin nda co ni. Mì dimul niaa toɲaa, a cii vɔ̀ngɔ̀ ndaa sɔla.

¹⁷Kɛ nɔm, taa va pɛ sumndo biyɔɔ, pulu hɔlla, mà suinun cuɛima cun kɛndɛan o lebol,

¹⁸haliko vannda sina maa o sumndo nin te n co le, fɔ Fuɲa nɔm vana co o vionnɔnndo nin-ndo. O kon, Fuɲa nɔm ca kon sɔɔn viannanndon-ndo dɔawnin nɔm vɔ̀ngɔ̀.»

¹⁹«La cúúngiaa bolofaa o ceendo coo le. Kani o ceendo coo, o nɔla mò sɔva, kaangoa nɔla vɛlɛ mà tɛɛmbuu ndu, te kon te mì vuiya yem dioo, mà ciimbuu ndu.

²⁰Kɛ la cuungiaa bolofaa o halataala, kani lon ndu, o nɔla mò sɔva le, kaangoa tɛɛmbùù ndu le, vui yim vɛlɛ dio le ndu ciimbuu le.

²¹Kani nɛɛ bolofaa nɔmndo co-a, lon koni kɔl nɔmndo vanin ni.»

²²«Hɔltan la co lamboo le diallon ni. Te hɔlta nɔmndan la co pɛ lakɛndɛ, dialun nɔmndon kpow n tenga,

²³kɛ te hɔltan la ve nɔm lakɛndɛ le, dialun nɔmndon kpow n luɛi o ɲumndan nin. Te ɲɛ-tengaa co nɔm niŋ-ndo siŋnun pɛ ɲumndan, mɛɛ ɲumma man ma và ma bɔɔ dɛ!»

²⁴«Vana-vana tiwba mò tosal vanaa bɛndua nda ŋiɔn baalaa o lepilɔɔ le. Kani o pilɛ nɛinunnin ndu, mò kaola o pilɔɔ, te kon te o yiinunnin a ò pilɛ, mò mulul o pilɔɔ kɔɔ. Lá tiwba mì la tosal Hala a volion baalaa o lepilɔɔ le.»

²⁵«Lelan ya co niaa dimullo ni maa la buulan le yoomu niaa a le ɲɛ niaa dianin-ndo le. La buulan vɛlɛ le dialun niaan a le ɲɛ niaa cuɛinunnin-ndo le. Vɛ̀ɛ̀ yoomoo hiw baloo le? Vɛ̀ɛ̀ diallon co fisa a ɲɛ cuɛinanndo le?

²⁶La tofa vɔ yowva coocoo: a seŋ te, a kuw le, a cuungiaa ɲɛ-ɲɛ o lakonda le. Kɛ Fuɲa niaa co o halataala-o co nda baloo dɔvɔɔ. Vɛ̀ɛ̀ niaa la hiw yowva polon te?

²⁷O niaa tɛɛn, nɛɛ nɔla yɛ mò cɔɔlu yoomu ndɔɔ bɛndi hali ɲɛ-pɔmbɔ a buulannda ndɔlan?

²⁸Le yɛɛ niaa co yɛ niko buulanndo le ɲɛ cuɛinanndo? La mɛɛndan-ndɔ mɛɛ billo hindu yondoo nin yɛ, o tosa baala le, o vomul te.

²⁹Kɛ nduyɛ, mì dimul niaa, hali Salomɔn a biilu bɛndu ndóò nɔ-o kpow, o tiiya cuɛinɔnndo maa fula lan o pilɛ le.

³⁰Te Hala cuɛi-yɔ pɛ billo yondoo nin, o co hau kɛ mò hun va siɔdii viowɔn o yin-ndo, vɛ̀ɛ̀ o kɛɛ yɛnin niaa vanndacieea cuɛyɔɔ hiovɔɔ billo coo? Mbɔ̀ laalan niaa dɔɔnan bɔɔ!

³¹Lelan, la buulan mì la ɲunan te aa: ‹Yɛɛ naa n dia yɛnin?›, ‹Yɛɛ naa n kol-lɛnin?›, te kon te aa: ‹Yɛɛ kpeekpei naa n cuɛinun yɛnin?›.

³²Kani vanaa sina Hala le-a co fafaláà ɲɛm mun nuwviaa ni. Kani Fuɲa niaa co o halataala-o sina maa la nɔ makoo a ɲɛm mun.

³³La nuwviaa vɔ fɔlɔn masale Hala len a dɛnɛ sandaa ndɔɔ. O kon, ɲɛm mun kpow n hendulun niaa lecoo.

³⁴Lelan la buulan le siɔdiio le, siɔdiio buulannin le ndu pila. Lepalaa-lepala le nɔ bahavɛi ndɔ.»