Read Kissi Marke 15 Bible Online

Marke 15 - Kissi bible

Marke 15

¹Ɲɔɔ tengaa, mí bolii vanaa-solia-lasálàá tundu nda simlacia, vanaa pɛɛkaa latɔŋnda a vanaa bɛndua tɔ̀a kpow. Má viam vannda, má yii Yeesu, má kɔa a ndu, má kɔ mal ndu Pilate o ba.

²Mí Pilate ɲuna ndu aa: «Vɛ̀ɛ̀ nɔm co masa Yuifia ni?» Mí Yeesu mulul ndu aa: «Nɔm pila cii dimi.»

³Mí simlacia vanaa-solia-lasálàá hɛɛnduu Yeesu sɔɔn bɔɔ-bɔɔ coo.

⁴O kon mí Pilate ɲuna ndu vɛlɛ aa: «Vɛ̀ɛ̀ a co ɲɛ-ɲɛ muli le? Tuei-yɔ sɔɔn nda co nɔm hɛɛnduuo coo-on.»

⁵Kɛ Yeesu mulul lɛ ndu ikɛ́-kɛ̀ le. Mí Pilate dɔawnun kɔndɔfili.

⁶Nduyɛ, telen oo telen kafo-hiavaa-coo ndóò tiiya pɛ, mɛɛ mì Pilate ndóò soli vana kaasoo o pilɛ, mì ndóò mal ndu, o vannda ndáà yeema-o pɛɛn.

⁷Langbanɔɔ pum va o kaasoo diolan Barabas, le vanaciee ndóò dii fondo fúú o paale vɔkɔ-vɔkɔɔlen lepum coo-o ndáà mal ndu o kaaso kon ni.

⁸Mí vannda sɛ́lɛ́ bɛndoo komal Pilate le nda ɲɛ o dema nda tosal-lo tosallo.

⁹Mí Pilate mulul nda aa: «Vɛ̀ɛ̀ la yeema mì mel niaa masa Yuifia?»

¹⁰Kani ndóò sina nin maa le nɛyɔn simlacia ndáà nɔ a Yeesu-o nda hun lɔlu ndu ni.

¹¹Kɛ mí simlacia vanaa-solia-lasálàá pei vannda sɔɔn niŋ le Pilate dimullo maa o co fisa mò mel nda Barabas.

¹²Mí Pilate cua vɛlɛ sɔɛi, mó ɲuna nda aa: «Mi vɛ̀ɛ̀ ya yɔŋ yɛ niko a o niaa co hoo veeloo aa masa Yuifia-o?»

¹³Má deŋul ndu aa: «Baŋ ndu o yɔm singafilaa coo!»

¹⁴Mí Pilate ɲuna nda aa: «Dɛnɛ vɔɔn yɛɛ o tosa yɛ?» Kɛ má cɔɔlu deŋi kpélén aa: «Baŋ ndu o yɔm singafilaa coo!»

¹⁵Mí Pilate cɛl sɛ́lɔ́ɔ́ diom, mó mal Barabas. O kon kɔɔli, mó viam vannda, má lɔaa Yeesu. Ndáà ciiyo ndu lɔɔ a kɔluei, má baŋ ndu o yɔm singafilaa coo.

¹⁶Mí vanaa cɔwva kɔa a Yeesu o cɛi lemasa Pilate-o nin. Má veelu vanaa cɔwva kpow.

¹⁷Má vow ndu doma bɛndu lemasa siaŋa sɔɔtɔtɔɔ. Má lɔa mɔsil lemasaa a yɔɔn, má vow Yeesu ndu o lebol.

¹⁸O kon kɔɔli má va ndu mamɔɔ aa: «Masa Yuifia isɛ!»

¹⁹Má va ndu bollen lɔɔ a kpɛ̀ndɛ̀len, má va ndu lɔluan tuufuuo coo a ndu vulan beŋndo.

²⁰Ndáà ciiyo ndu sɔɔlɛmaa suiyo lende, má soli ndu doma bɛndu kon lekɔɔ, má mingi ndu volɔɔla ndɔlan vow. O kon kɔɔli, má kɔa a ndu le ndu baŋɔɔ o yɔm singafilaa coo.

²¹Mɛɛ nda va kɔlan le ndu baŋɔɔ o yɔm singafilaa coo, má bɔŋan a langbanɔɔ pum fulaa Sirɛne. O va cɔnɔnndo o ciɛɔn nin, mó kei a lon, diolan ndu Simɔn, fuɲa Alɛksandre nda Rufis. Mí vanaa cɔwva baŋ ndu kangalan le kɔlan a yɔm singafilaa Yeesu-o.

²²Má kɔa a Yeesu o fondaa pum diolan Kɔlkota (kon co dimio ni aa fonda lakpokpoo).

²³Má yɔngu ndu mɔima nda bingulan a bil lolɛiyo pum-ndan le kolɔɔ, kɛ Yeesu cɛl le man kolɔɔ le.

²⁴Má baŋ ndu o yɔm singafilaa coo, má mal siondei le volɔɔla ndɔla cuɛinanndan piɔvanndo, le sinaa la vana-vana sɔlanin-ndan.

²⁵A telen yɛnnde kalaa nda baŋ ndu o yɔm singafilaa coo ni.

²⁶Sɔɔn va n'sɛvaa le kɔlɔ nda dii ndu-o cɔmndo-on va mun ni aa: «Masa Yuifia.»

²⁷Má baŋ ndu latulu nda vanaa yɔŋ vɔɔnda pum nda ŋiɔn, hoo o ba ndɔ kɛndɔɔ coo, o pilɔɔ o ba ndɔ mɛllo coo.

²⁸O kon mí sɔɛi co i sɛvaa o Sɛbɛ Hala-o nin-nde peelun aa: «Má cɔm ndu nda vanaa yɔŋ vɔɔnda latulu.»

²⁹Mí vanaa va hiovɔɔ-a va ndu yeowlan a bolle hiiloo, má va dimio aa: «Nɔm dimi ni aa a co Cɛi-Hala-o tɛɛmbuu, mà mingi ndu tangul o palɛi ndii yáá bɛngu,

³⁰mɛɛ ciindian-ndɔ hau nɔm pila, mà tol o yɔm singafilaa coo!»

³¹Mí bolii vanaa-solia-lasálàá a vanaa pɛɛkaa latɔŋnda bɛɛ a va ndu mamɔɔ, ma va dimulanndo aa: «O ciindiaa caaŋaa celen, vɛ̀ɛ̀ mo bumba ndu pila ciindian!

³²Ndu masa Israɛlla, o tol-lɔ hau o yɔm singafilaa coo, mì n ce, mì n laalan ndu.» Vanaa ndáà baŋ ndu ikɛi-ya bɛɛ va ndu yeowlan.

³³Paalen tiiyaa o pol, mí ɲumndan ma toal o lɛŋnden kpow coo, mí ma lo lende háá o lɛɛlɛ yàándɔɔ.

³⁴A lɛɛlɛ yàándɔɔ, mí Yeesu deŋi coocoo kpélén aa: «Elohi, Elohi, lama sabatani?» Kon co dimio ni aa: «Hala nuu, Hala nuu, le yɛɛ nɛ n kɛɛ yɛ ya?»

³⁵Vanaa va lon-nda a pum tueyɔɔ lende, má dimi aa: «La tuei-yɔ ndu Elii veeloo.»

³⁶Mí vanndo pum ɲaanun, mó kɔ cua ɲɛ fuɛn-fuɛɛndo pum, mó mal ndu o mɔima vaalan nin, mó sɔaa ndu o kpɛ̀ndɛ̀len, mó cɔm Yeesu ndu le kolɔɔ. Mó dimi aa: «La mɛi-yɔ hau, mì n tofan-ndɔ, te Elii hun tuisinin ndu.»

³⁷Kɛ mí Yeesu deŋi kpélén. O kon kɔɔli, mó malnun kɔl.

³⁸Mí kola landaa va o Cɛi-Hala-o nin-ndo tɛnda tɛɛn, kandɔɔ coocoo háá mo tiiya lebɛngu di.

³⁹Bolle vanaa cɔvaa kɛmɛa va isisi Yeesu laci, ndóò cɔu mɛɛ Yeesu looku kɔllo malnɔn yɛ, mó dimi aa: «Po Hala-o lekɛ́ndɛi langbanɔɔ ho va ni.»

⁴⁰Vanlaandua pum bɛɛ va isisi tofaa kɔɔli-kɔɔli lándán, Mari fula Makdala-o a Mari velu Nsaki pɔmbɔ, Yose a Salome-o.

⁴¹Yeesu va Kalile, má del ndu kɔɔli, má lo ndu balɔɔ kɔɔli le ndu malaa o makolan nin. Vanlaandua celen bɛɛ aa kɔɛ ndu kɔɔli Yerusalɛm.

⁴²Paalen léè del nin, nduyɛ paale pɛngiaalen le va diimandɔɔ ni,

⁴³mí Yosɛf hun fulaa Arimatee, vana vannda ndáà ke bɛɛlen taw o kunda vanaa kialaa n'yamaa lelɛŋnda tɛɛn-ndo o va ni. Ndu bɛɛ va vana pilɛ le masale Hala len cumndo. Mó veesiaa hɔlla, mó kɔa o Pilate lo, mó ɲuna ndu le dialun Yeesu-on cuaa.

⁴⁴Mí kɔndɔfillo bii Pilate le keleŋa Yeesu keleŋa vu-o, mó veelu bolle vanaa cɔvaa kɛmɛa le ndu ɲunaa te vu Yeesu-o ndóò viow nin lándán.

⁴⁵Tuu o sɔla muli bolle vanaa cɔvaa kɛmɛa-o, mó yɔngu Yosɛf dialun Yeesu-on.

⁴⁶Mí Yosɛf piandu kola fengbɔɔ, mó tuisi dialun Yeesu-on o yɔm singafilaa coo, mó simbul mun o kola fengbɔ kalaa nin, mó kɔ kɛsi mun o sɛi townun o powvo nin-ndo nin. O kon, mó mingi powvo ɲindɔɔ o sɛiyo sondoo.

⁴⁷Mí Mari Madelɛn nda Mari kalaa Nsaki a ca nɛɛ nda va Yeesu kɛsio-a.