Read Kissi Marke 16 Bible Online

Marke 16 - Kissi bible

Marke 16

¹Paale pɛngiaalen hiovɔɔ, mí Mari Madelɛn, Mari kalaa Nsaki a Salome a piandu ɲɛm cun kɛndɔn le kɔlan Yeesu suiyo.

²O kundɛiyo coo idiiyo púŋ, má kɔa o sɛiyo.

³Má va ɲuunianndo aa: «Ko nɛ̀ɛ́ pimbulul-lɛnin naa powvo le ndu faŋaa o sɛiyo sondoo?»

⁴Ndáà tofaa, má ca maa pow bɛndu va o sɛiyo sondoo-o va o pimbulaa.

⁵Má luɛi o sɛiyo nin, má ca langbanɔɔ pum icali o ba kɛndɔɔ coo, doma bɛndu humboo va ndu lekɔɔ, mí siòònde bii nda.

⁶Mó dimul nda aa: «Siòòŋii bii niaa le, Yeesu Nasarɛt niaa co nuwviaa ni, o ndáà baŋ o yɔm singafilaa coo-o. O tendu fulaa vanvílɛ́iya tɛɛn, o co nanu le, la tofa vɔ fonda ndáà yambu ndu-o.

⁷Kɛ la kɔ dimul kaandeŋaa ndɔa a Piɛr maa o hiow nda laci Kalile: ‹lon niaa canin ndu ni, maa mɛɛ o dimul niaa yɛ.›»

⁸Má fula o sɛiyo nin, má ɲaanun, má va ɲiiyaa a siòònde, kɛ a dimul vana-vana ɲɛ-ɲɛ le, kani siòònde va nda. [

⁹[2] Yeesu tendullo fulaa vanvílɛ́iya tɛɛn o paale co paale taselen o lɔ́ɔ́ nin-nden coo, mó cɔmnun fɔlɔn Mari fula Makdala-o, Mari o soli ɲinaa vɔɔnda nda ŋɔmmɛw nin-ndo pɛɛn.

¹⁰Mí Mari kon kɔ dimul vanaa va ndu Yeesu kɔɔli, má va caŋndo le vu ndɔɔ-a sɔɛi ken.

¹¹Ndáà tueyɔɔ maa o co yoomu, maa Mari ce ndu, a laalan te.

¹²O kon kɔɔli, mí Yeesu cɔmnun vanaa ŋiɔn o nda tɛɛn a hɔlaa celen, a va nɛi-tɛɛn le kɔlan o sɔndɔkɔlɔ.

¹³Mí nda bɛɛ muungu, má kɔ dimul vanaa celen, nda bɛɛ laalan nda le.

¹⁴O mɛɛlulan, mí Yeesu cɔmnun kaandeŋaa tɔ́ a ò pilɛa telen nda va dioo-o. Mó soaa nda le laalan lepɛŋ ndaa a le nila kalula ndalan, a le tùú nda kɛɛ vanaa ce ndu, telen o muungu yoomu-o laalan-ndo.

¹⁵O kon kɔɔli mó dimul nda aa: «La kɔ o ceendo coo nɛɛ-nɛɛ ka, mì la kɔ yonda Yoongu Kɛndɔɔ o ɲɛm cɔwnun-ndon kpede lo.

¹⁶Vana-vana laalan pɛ mò sɔla yinɔɔ, ndu sɔlanin cindaa, kɛ vana laalan te, ndu sɔlanin yaalaa.

¹⁷Kaamaala tosannin vanaa laalannin-nda o ba lan la co lan ni: A toawnin ɲinaa vɔɔnda o diola nilan, a soaanin sɔɔn mangalan sɛnɛi n celen,

¹⁸a cuanin kɛwva a laba. A kol bɛɛ ɲɛ dii vana-o, ɲɛ-ɲɛ yɔŋnunnin nda le, a handunin vanaa lanàá balan coo, mà piɛi Hala le nda, mà sengu.»

¹⁹Yeesu ciiyo nda sɔɔn mun dimullo, mó hel o halataala, mó kɔ cal Hala o ba kɛndɔɔ coo.

²⁰Má kɔannun a sɔɛi Hala-e dimio nɛɛ-nɛɛ ka. Yeesu va latulu a nda o baala kon nin, mó va nda kpaayaa keo le dɛnnda kaamaalan tosaa. Cɔmndo va kon ni maa toɲaa kaandennda va dimio ni.]