Read Kissi Marke 2 Bible Online

Marke 2 - Kissi bible

Marke 2

¹Palɛi pum o kon kɔɔli, mí Yeesu muungu Kapɛrnaum. Mí vannda tuɛi maa o va cɛinin.

²Mí sɛ́lɛ́ bɛndoo kɔ pia lon ca, fonda kɛ́-kɛ̀ ve lɛ hali o dio le. O va sɔɛi o nda lo.

³Má cuu ndu vana falun vílɛ́iyo pum, vannda nda hiɔɔlu cua ndu ni, má hun a ndu.

⁴Kɛ ndáà nɔla luɛyɔɔ le tiiya a ndu o Yeesu lo le, kani sɛ́lɔ́ɔ́ va o dio taw. Má kumbi yindɔɔ o fonda Yeesu va-o kpafii, má tuisi vana falun vílɛ́i kon ihini o ɲɛ ndɔ hinia coo.

⁵Yeesu cɔu laalan ndaa, mó dimul vana falun vílɛ́i kon aa: «Po nuu, hakila nɔmndan la malnun haki.»

⁶Vanaa pɛɛkaa latɔŋnda pum a va icali lon, ma va diminndo o kɔl nin aa:

⁷«Le yɛɛ langbanɔɔ ho co yɛ sɔɛi nuaa? Sɔɔn tanan o co dimio a Hala nuaa ni. Nɛ̀ɛ́ nɔla yɛ vana hakilan malɔɔ, te o co Hala ndu pilɛ kpé le?»

⁸Fɔ́ɔ́fɔ̀, mí Yeesu sina dɔ́ɔ́ yiyan ndaa. Mó dimul nda aa: «Le yɛɛ niaa co yɛ yiyanndo o kɔlta niaalan nin lende?

⁹Vana falun vílɛ́iyo dimullo aa: ‹Hakila nɔmndan la malnun haki›, a ndu dimullo aa: ‹Cɔn, cua ɲɛ nɔm hinia mà kɔɛnnun›, ɔ́ɔ̀ o hiow va bɛɛn-bɛɛn ndo?

¹⁰I yeema mi la sina maa Po vanacieo nɔ kpaayaa o lɛŋnden coo le hakilan malɔɔ.» O kon mó dimul vana nàà aa:

¹¹«Cɔn, cua ɲɛ nɔm hinia, mà kɔɛnnun o nɔm ndo cɛinin.»

¹²Fɔ́ɔ́fɔ̀, mó can vannda kpow o hɔl, mó cua ɲɛ ndɔ hinia, mó fulan. Mí kɔndɔfili bɛndoo bii nda, má biilu Hala a dimio aa: «Kabi bɛɛ, n ci vɔ dɛnɛ vaa nuaa le.»

¹³Mí Yeesu fula vɛlɛ, mó kɔa o mɛmma ihɛllan kɔngɔ. Mí sɛ́lɔ́ɔ́ va ndu hunɔɔ kɔɔli, mó va nda pɛɛkoo.

¹⁴O lo hiovɔɔ, mó ca Levii po Alfee-o, o va icali o cɛi biyaa muloo. Mó dimul ndu aa: «Del-la kɔɔli!» Mí Levii can, mó kɔa ndu kɔɔli.

¹⁵Yeesu calle ɲɛdiaa dioo o Levii lo cɛinin, mí vanaa biyaa mulua a vanaa lahakia kɔ cal ndu ikɛi nda kaandeŋaa ndɔa, kani vanaa va ndu kɔɔli-a a va taw.

¹⁶Vanaa pɛɛkaa latɔŋnda a Faliisia cɔu ndu ɲɛdiaa dioo nda vanaa biyaa mulua a vanaa lahakia latulu, má ɲuna kaandeŋaa ndɔa aa: «Le yɛɛ o co yɛ dioo latulu nda vanaa biyaa mulua a vanaa lahakia?»

¹⁷Mí Yeesu tuɛi sɔɛi ken, mó dimul nda aa: «O co vanaa connun kɛndia-a le a nɔ makoo a vana singiaa le, kɛ a co a nààlan-nda. O co vanaa sandaa le ya hin veelu le, kɛ vanaa lahakia.»

¹⁸Kaandeŋaa Nsaŋ-nda a Faliisia va sumndo biyɔɔ. Má hun ɲuna Yeesu aa: «Le yɛɛ nɛ kaandeŋaa Nsaŋ-nda a kaandeŋaa Faliisia co yɛ sumndo biyɔɔ, mì kaandeŋaa nɔmnda nda va kɛɔ le kon tosaa?»

¹⁹Mí Yeesu mulul nda aa: «Caaŋaa vana yil lanɔɔ sɛnɛi-yo nɔla pá sumndo biyɔɔ telen vana lanɔ sɛnɛi kon co nda ikɛi-yo? Taa co vɔ pɛ latulu nda vana lanɔ kon, a nɔla sumndo biyɔɔ le.

²⁰Kɛ paale vanin mì vana lanɔɔ faŋan nda tɛɛn, o telen kon nda co sumndo biyɔɔ ni.

²¹Vana-vana beŋul tɛɛngei o doma paandoo a pɛngɛi kola sɛnɛiye le. Vana baŋul a ndi pɛ, telen pɛngɛi kola sɛnɛiye co ŋɔwnɔn-ndo, doma paandoo cɔɔlu sɛɛsa.

²²Vana-vana vow vɛlɛ mɔima sɛnɛiyan o bɔlɔla yáwla paandulan nin te. Vana vow pɛ mɔiyan, ma buuluu lan. O kon mɔima man a bɔlɔla lan la tambu kpow. Kɛ o bɔlɔla yáwla sɛnɛilan nin vana vow mɔima sɛnɛiyan ni.»

²³Paale pɛngiaalen lepum, mí Yeesu va keiyo o ciɛɔn n'mallon nin. Mí kaandeŋaa ndɔa va kɔlan a yasalan kilio.

²⁴Mí Faliisia dimul Yeesu aa: «Le yɛɛ nɛ nda co yɛ dɛnɛ kuunan o paale pɛngiaalen coo-o tosaa?»

²⁵Mí Yeesu mulul nda aa: «Kabi bɛɛ la dimi vɔ o sɛbɔɔ nin, ɲɛ David tosa telen o hawba mí yiaan ma va ndu nɛiyo nda langbaa ndɔa-o le?

²⁶Mó kɔ luɛi o Cɛi-Hala-o nin, Abiatar va telen kon bolle vanaa-solia-lasálàá. Mí ndu David dia bulu vanaa-solia-lasálàá kínɛí ndáà bɛnda le dioo-o, mó ke vɛlɛ langbaa ndɔa.»

²⁷O kon mó dimul nda aa: «Paale pɛngiaalen le toosian le vanacieo ni, kɛ o co vanacieo le toosian le paale pɛngiaalen te.

²⁸Lelan bɛɛ kpeekpei Po vanacieo co paale pɛngiaalen bollen ni.»