Read Kissi Marke 5 Bible Online

Marke 5 - Kissi bible

Marke 5

¹Má tiiya o dalaa kɔngɔɔ pilɔɔ, o lɛŋnde Seraseniia nin.

²Yeesu fulaa dɔ́ɔ́ o dɛ̀ndɔ̀ɔ́ nin, mí langbanɔ ɲina vɔɔndo pum va kɔɔli-o fula nɛɛ nda kumbu vanvílɛ́iya-a, mó hinul ndu sanaa.

³O sɛila lan lɔlta ndɔlan la va ni. Vana-vana ndóò nɔla lɛ ndu yiiyo le, hali a yɔlɔn,

⁴kani ndáà baa nin ndu cilinndon o n'pelu, má yii ndu a yɔlɔn, kɛ mó kilikili yɔlɔn mun, mó yimiyimi ciliŋun mun, vana-vana ndóò nɔla lɛ ndu biyɔɔ le.

⁵Paalen a ɲumndan, o va kelaa yoondiaa o sɛilan nin a o pembon coo, ndu pila va boolɔnndan a powtan.

⁶Ndóò cɔu Yeesu lándán, mó ɲaanun, mó baŋ vulan ndu o labɛngunin,

⁷mó deŋi kpélén aa: «Le yɛɛ n co yɛ ya kɔɔli, nɔm Yeesu po Hala-Hiow-Ɲɔɔn-Kpow-vo? I co nɔm ɲɔɔlu, tosa le Hala, luei ya imɔnɔ le.»

⁸Kani nuaa Yeesu va ndu dimullo ni aa: «Ɲina vɔɔndo, fula langbanɔɔ ho nin!»

⁹Mí Yeesu ɲuna ndu aa: «Vɛɛ n nɔ yɛ diolan?» Mó mulul ndu aa: «Diola nilan aa Sɛ́lɔ́ɔ́, kani n co sɛ́lɛ́.»

¹⁰O kon, má ɲɔɔlu ndu taw maa o soli nda o lɛŋnden nin te.

¹¹Nduyɛ, pevaa kundaa pum va diólan o pembei ikɛi lon.

¹²Mí ɲinaa vɔɔŋaa kan a ɲɔɔlu Yeesu aa: «Yɔɔ naa pewva ha tɛɛn, haliko mi n kɔ luɛi nda nin.»

¹³Mó cɛl nda diom. Mí ɲinaa vɔɔŋaa kan a fula, má kɔ luɛi pewva nin. Mí pevaa kundaa kan a can nɛɛ feke-fekea, má kɔ deli o mɛmma ihɛllan nin. A va le pewva vàála tiɔn, mí nda kpow a miisuu.

¹⁴Mí vanaa va nda mandaa-a ɲaanun, má kɔ tiw sɔɛi ken o kobio a o sɔndɔkɔltan kpede. Mí vannda va kɔlan dɛnɛ yɔŋnun kon-ndo tofaa.

¹⁵Má kɔa nɛɛ Yeesu va-a, má komal langbanɔ ɲinaa vɔɔŋaa sɛ́lɛ́a kan va nin-ndo icali a volɔɔlan lekɔɔ, ndóò muungu nin o ndu pila nin. Mí siòònde bii nda taw.

¹⁶Mí vanaa ce dɛnnda lan o tosanndo-a tɛɛsial nda mɛɛ langbanɔ ɲinaa va kon kɔɔli-o looku baŋaa sɔla yɛ, a mɛɛ i tosan a pewva yɛ.

¹⁷O kon, má mulin Yeesu tɛɛlɔnndo, haliko mo faŋan o lɛŋnde ndalen, mo kɔɛnnun.

¹⁸Tuma Yeesu va luɛyɔɔ o dɛ̀ndɔ̀ɔ́ nin-ndo, mí vana ɲinaa va kon kɔɔli-o tɛɛlun ndu le lou nda ndu.

¹⁹Yeesu cɛl ndu le lou nda ndu le, kɛ mó dimul ndu aa: «Kɔ o nɔm ndo, o vanaa nɔmnda lo, mà kɔ tɛndal nda ɲɛ-ɲɛ Mɛlɛka tosal nɔm a mɛɛ o tuinun nɔm iɲíí yɛ.»

²⁰Mó kɔannun a dɛnɛ Yeesu tosal ndu-o yondaa o tàndá kobila tɔ́-o nin. Mí kɔndɔfillo bii vannda kpow.

²¹Mí Yeesu taŋ o kɔngɔɔ pilɔɔ o dɛ̀ndɔ̀ɔ́ nin. Mɛɛ o taŋ lɛhau dɔ́ɔ́, mí sɛ́lɛ́ bɛndoo cuungian ndu ikɛi. A va o mɛmma ihɛllan kɔngɔ.

²²O kon mí vana pilɛ o simlacia va o cɛi lekaanndo nin-nda hun, diolan Sairus. Mó ca Yeesu, mó hun del ndu o labɛngunin,

²³mó tɛɛlun ndu aa: «Cua ni pɔmbɔɔ co tendu-piɔ́m. Hun handu ndu balan coo, haliko mo cinda, mo muungu yoomu.»

²⁴Má kɔa latulu nda Yeesu. Sɛ́lɛ́ bɛndoo va ndu kɔlan kɔɔli, a va ndu ŋɔvɔɔ.

²⁵Nduyɛ vanalanɔɔ pum va lon, naa pulɔn ivanalanɔyaa va ndu, ndóò cii nin vɔsilan tɔ́ a latiɔn a nàà kon.

²⁶Ndóò sanga nin taw dɔtɔlɔa bɔɔ-bɔɔ kɔɔli, mó pisi ɲɛm ndóò nɔ-on kpow, kɛ siongɔɔ bɛɛ o sɔla le, naa va hiovɔɔ laci a vɔwlen tuŋ.

²⁷Vuɛɛndo ho tueyɔɔ ɲɛ vannda va dimio a Yeesu o kɔɔ-o, mó hun a makɔɔ o sɛ́lɔ́ɔ́ tɛɛn, mó pilan Yeesu domaa.

²⁸Kani o va diminndo o kɔl nin aa: «Hali domaa daama ya pilan ndu ni, i sɔlanin siongɔɔ.»

²⁹O telen pilɛ kon, mí pulɔn ivanalanɔya va ndu-o siangu, mó sinan o dialun ndɔn nin maa naa ndɔɔ sengu lekɛ́ndɛi.

³⁰Mí Yeesu sinan dɔ́ɔ́ fɔ́ɔ́fɔ̀, maa kpaayaa pum fula ndu nin. Mó mulin o sɛ́lɔ́ɔ́ tɛɛn, mó ɲuna aa: «Nɛ̀ɛ́ pilan yɛ ya domaa?»

³¹Mí kaandeŋaa ndɔa dimul ndu aa: «A co cɔu mɛɛ sɛ́lɔ́ɔ́ co nɔm ŋoviŋovio yɛ, a muungu ɲunaa aa ‹Nɛ̀ɛ́ pilan yɛ ya?›»

³²Mó mɛɛndian vanáà balu ndu-a le vana pilan ndu-o sinaa.

³³O kon mí vuɛɛndo ɲiiya a siòònde, kani ndóò sina ɲɛ yɔŋnun o dialun ndɔn nin-ndo, mó hun del Yeesu o labɛngunin, mó dimul ndu toɲaa kpendekele.

³⁴Kɛ mí Yeesu dimul ndu aa: «Cua nuu, laalan nɔmndo cii nɔm ciindiaa, kɔ va kɛndɛ, naa nɔmndo sengu!»

³⁵O lo sɔɛi, mí vannda hun fulaa o simlacinɔ cɛi lekaanndo lo, má dimi aa: «Cua nɔmndo vinnun, le yɛɛ n co yɛ vɛlɛ vana bɛndoo saangiaa?»

³⁶Kɛ Yeesu yeŋ bɛɛ sɔɔn ndan mun lani le, mó dimul simlacinɔ cɛi lekaanndo aa: «Siòòŋii bii nɔm te, laalan daama.»

³⁷O cɛl mì vana celen liila ndu le, fɔ Piɛr, Nsaki a Nsaŋ puapilɛ Nsaki-o.

³⁸Má tiiya o simlacinɔ Cɛi-Hala-o lo bɛɛ, mí Yeesu komal vɔkɔ-vɔkɔɔ, vannda va vaandianndo a caŋndan.

³⁹Mó luɛi, mó ɲuna nda aa: «Le yɛɛ niaa co yɛ ivɔkɔ-vɔkɔɛi he a caŋndan ndan? Cuaambɔɔ vi le, o lɔan o co ni.»

⁴⁰Má muungu ndu mamɔɔ. O kon, mó soli nda, mó cua fuɲaa a kalaa cuaambɔɔ, mó cua vɛlɛ vanaa o hin kɔɔli-a, mó luɛi a nda nɛɛ cuaambɔɔ va-a.

⁴¹Mó bii cuaambɔɔ baa, mó dimul ndu aa: «Tabita, kuumi!» Kon co dimio ni aa «Cuaambɔɔ, i co nɔm dimul, cɔn!»

⁴²Fɔ́ɔ́fɔ̀, mí cuaambɔɔ can, mó kɔa, kani vɔsilan tɔ́ a latiɔn ndóò nɔ ni. Mí kɔndɔfili bɛndoo bii nda.

⁴³Kɛ mí Yeesu dimul nda ndi kpendekele maa vana-vana sina dɛnɛ yɔŋnun-ndo le. O kon kɔɔli mó dimul nda le cuaambɔɔ ɲɛdiaa keo.