Read Kissi Marke 9 Bible Online

Marke 9 - Kissi bible

Marke 9

¹Mí Yeesu dimul nda vɛlɛ aa: «I co niaa toɲaa dimul, vanaa pum o niaa tɛɛn nanu a vinin te, fɔ mà ce fɔlɔn masale Hala len hunɔɔ a kpaayaa.»

²Palɛi ŋɔmpum o kon kɔɔli, mí Yeesu can nda Piɛr, Nsaki a Nsaŋ, má kɔa o pembii bɛnduei pum coo. Mí hɔlla mangalan ndu nda o hɔl.

³Mí volɔɔla va ndu lekɔɔ lan la muungu lahumbu few-few, vana tɔaa lavolɔɔ co o lɛŋnden coo mò dindi tɔɔ lende le.

⁴Mí Elii nda Moise fula nda o hɔl, má va suukanndo a Yeesu.

⁵Mí Piɛr cua sɔɛi, mó dimul Yeesu aa: «Kɔɔfa, o naŋ mì n vannun nanu. N simin cɛila-kolala-toandaalan tan yáá, nɔm o pilɛ, Moise o pilɛ, o pilɛ vɛlɛ le Elii.»

⁶Ndóò nɔ mɛɛ dimia le, kani siòònde pila va nda ni.

⁷Mí yumbuyumboo toal, mó kumbu nda, mí diomndo fula o yumbuyumbu kon nin aa: «Po ni ya kaola taw-vo co hoo ni, la yaŋ ndu nilan.»

⁸Fɔ́ɔ́fɔ̀, mì kaandennda mɛɛndian nda pila balɔɔ sɔ́, kɛ a ci lɛ vana celen te, Yeesu kínɛí va nda ikɛi ni.

⁹Tuma nda va pembei tolɔɔ-o, mí Yeesu dimul nda maa a dimul vana-vana dɛnɛ nda ce kon-ndo le, háá mì Po vanacieo tendul, mò fula vanvílɛ́iya tɛɛn.

¹⁰Má bii sɔɛi o dimul nda ken-nde, kɛ má va ɲuunianndo nda pila tɛɛn aa: «Kɔlɔ yɛɛ co yɛ tendullo fulaa vanvílɛ́iya tɛɛn?»

¹¹Mí kaandennda ɲuna ndu aa: «Le yɛɛ vanaa pɛɛkaa latɔŋnda a co yɛ dimio maa fɔ mì Elii hin?»

¹²Mó mulul nda aa: «Kani Elii co fɔlɔn hunɔɔ, mò mingi dɛnndan kpow o fonda ndɔɔ. Vɛ̀ɛ̀ o co yɛ o sɛvaa a Po vanacieo o kɔɔ, o co hunɔɔ, mò sanga taw, mì vannda ce ndu vana fondoo-o?

¹³Kɛ i co niaa dimul, Elii hin, má tosa a ndu mɛɛ ndáà yeema yɛ, maa mɛɛ o sɛvan a ndu o kɔɔ yɛ.»

¹⁴Ndáà tiiyaa kaandennda ikɛi, má cannun sɛ́lɛ́ bɛndoo nda o balaa sɔ́, a vanaa pɛɛkaa latɔŋnda nda va suukanndo-a.

¹⁵Sɛ́lɔ́ɔ́ cɔu dɔ́ɔ́ Yeesu, mí kɔndɔfili bɛndoo bii nda, má ɲaanun le ndu kɔlan yilɔɔ.

¹⁶Mó ɲuna nda aa: «O yɛɛ coo niaa co yɛ suukanndo niaa ndaa?»

¹⁷Mí langbanɔɔ pum mulul ndu o sɛ́lɔ́ɔ́ tɛɛn aa: «Kɔɔfa, i cuu nɔm po nuu, ɲina vɔɔndo co ndu nin, ndu kuuna ndu sɔɛi ni.

¹⁸Nɛɛ-nɛɛ o bii ndu pɛ, o mal ndu lɛŋ, landìlandìo fula ndu o sondo, o sɔm ciŋndon, o kon o biondu, o kendu pen. I ɲuna nihau kaandeŋaa nɔmnda le ɲina kalaa tovɔɔ, kɛ a nɔla le.»

¹⁹Mí Yeesu mulul nda aa: «Kpòkóó, niaa vanaa nila kalua ha! Háá lɔ́ɔ́ kuɛɛ ya lo yɛnin niaa ikɛi? Háá lɔ́ɔ́ kuɛɛ ya lo yɛnin niaa biuvɔnndo? La cuu ya poombɔ kalaa!» O kon má yoo ndu ndu.

²⁰Poombɔɔ delɔɔ dɔ́ɔ́ Yeesu hɔlten, mí ɲinaa cua ndu, mó biondu, mó del lɛŋ, mó va pimbullo, mí landìlandìo fula ndu o sondo.

²¹Mí Yeesu ɲuna fuɲaa poombɔɔ aa: «Vɛ̀ɛ̀ kpɛ́ naa ho viow yɛ nin ndu coo?» Mí fuɲaa muli aa: «Kabi o icɛlɛkpɛya.

²²Lɔ́ɔ́ lepum mì ɲina kalaa ɲindu ndu o yin te kon te o mɛnndan nin le ndu diyɔɔ. Kɛ taa nɔla pɛ, tuinun naa iɲíí mà mala naa fɔ́!»

²³Mí Yeesu mulul ndu aa: «A dimi aa ‹Taa tiw pɛ ba.› Dɛnndan kpede la nɔla tosanndo le vana laalanndo.»

²⁴Fɔ́ɔ́fɔ̀, mí fuɲaa poombɔɔ yonda aa: «I laalan! Mala ya o laalan ni lepɛŋndo nin!»

²⁵Yeesu cɔu sɛ́lɛ́ bɛndoo dengelanndo, mó soaa a ɲina vɔɔn kon, mó dimul ndu aa: «Ɲina vɔɔn kuuna vana tueyɔɔ a sɔɛi-yo, i co nɔm dimul, fula poombɔɔ ho nin, muungu lɛ ndu nin te dɛ!»

²⁶O kon mí ɲina kon mɛli yeelan, mó yɔliyɔli poombɔɔ, mó fula. Mí poombɔɔ muungu maa vana vílɛ́i. Mí vannda taw a va bɛɛ dimio maa o vi.

²⁷Kɛ mí Yeesu saa ndu baa, mó cua ndu, mó sim.

²⁸Telen Yeesu luɛi cɛinin-ndo, mí kaandeŋaa ndɔa veelu ndu yunyen, má ɲuna ndu aa: «Le kɔlɔ yɛɛ nɛ naa n bumba yɛ ɲina vɔɔndo ho tovɔɔ?»

²⁹Mó dimul nda aa: «Ɲina vɔɔn súú vaa nuaa tuwnun vanndo kɔɔli le, te o co a piɛilen te.»

³⁰Má faŋan ndon, má kei o tàndá Kalile-o nin. Yeesu ndóò yeema mì vannda ndáà ciiku ndu le.

³¹Kani o va kaandeŋaa ndɔa pɛɛkoo mò va nda dimullo aa: «Po vanacieo malnunnin vannda o ba, mà dii ndu. Palɛi ndii yáá o kon kɔɔli, o tendulnin mò fula vanvílɛ́iya tɛɛn.»

³²Kɛ kaandennda ve sɔɛi ken bila biyɔɔ le, nduyɛ má sika le ndu ɲunaa.

³³Má kɔa Kapɛrnaum. Ndáà luɛyɔɔ cɛinin, mí Yeesu ɲuna nda aa: «O sɔɛi yɛɛ coo niaa va yɛ baltan nɛi-tɛɛn?»

³⁴Kɛ má mei, kani le vana co vana bɛndoo-o sinaa nda va sɛɛŋianndo nɛi-tɛɛn ni.

³⁵O kon mí Yeesu cal, mó veelu kaandeŋaa tɔ́ a à ŋiɔnda, mó dimul nda aa: «Vana yeema pɛ le vaa vana tasoo, ndu siŋnun vana mɛɛlaa kpɔŋ mo va vɛlɛ buɛi vannda kpow.»

³⁶Mó cua cuaambɔ pɔmbɔɔ, mó simi ndu nda tɛɛn. Ndóò kɔmanndo ndu, mó dimul nda aa:

³⁷«Vana-vana bii pɛ cuaambɔa pɔmbɔa ha o pilɛ o diola nilan, mɛɛ ya pila o bii lende ni. Vana-vana bii yɛ ya pɛ, mɛɛ o co ya pila le o bii lende le, kɛ vana vem ya-o.»

³⁸Mí Nsaŋ dimul ndu aa: «N saalun langbanɔɔ pum, o va ɲinaa vɔɔnda tovɔɔ o diola nɔmndan, mí n kuuna ndu, kani o ve o kunda naa coo le.»

³⁹Mí Yeesu dimi aa: «La kuuna ndu le, kani vana-vana cii dɔ́ɔ́ dɛnɛ ni vɔɔndo dimi, mò mulin vɛlɛ fɔ́ɔ́fɔ̀, le dɛnɛ kaamaa tosaa o diola nilan te.

⁴⁰Kani vàná co yaamɔɔ naa le, mɛɛ le naa o co ni.

⁴¹Vana-vana ke pɛ niaa mɛmma kolan taala kólaa ca o diola nilan le tùú niaa co vanaa Krista-a o, mì dimul niaa toɲaa, vana kon ndu folanin vɔ̀ngɔ̀ ndɔɔ le.

⁴²Vana-vana yɔŋnun pɛ sabu le cuaambɔa pɔmbɔa laalan ya haa o pilɛ lueiyo o pɔwlan nin, o co fisa mà baa vana kon pow bɛndoo o labolo, mà viow ndu o mɛmma ihɛllan nin.

⁴³Te ba nɔmndo co tosa mà mal nɛiyo ni, mɛɛ kiolu ndu, kani o co fisa mà sɔla yoomu fɛɛn-fɛɛndo a baa ndu pilɛ, a balan nɔu tan tiɔn, mà kɔɛ o ɲánndávàà, o yinnde ɲum lɔ́ɔ́-lɔ́ɔ̀ le len nin.

⁴⁴[Lon ndu, dɛlua vanin nda dioo-a vinin te, yinnde nda vanin nin-nden le ɲumnin te].

⁴⁵Te pelii nɔmnde co tosa mà mal nɛiyo ni, mɛɛ kiolu ndi, kani o co fisa mà sɔla yoomu fɛɛn-fɛɛndo a pelei ndii pilɛ, a pelon nɔu mun miuun mà viow nɔm o ɲánndávàà, o yinnde ɲumnin te len nin.

⁴⁶[Lon ndu, dɛlua vanin nda dioo-a vinin te, yinnde nda vanin nin-nden le ɲumnin te].

⁴⁷Te hɔlte nɔmnden le co tosa mà mal nɛiyo ni, mɛɛ kala len, kani o co fisa mà luɛi o masale Hala len nin a hɔlten len pilɛ, a hɔltan nɔu tan tiɔn mà viow nɔm o ɲánndávàà.

⁴⁸[Lon ndu, dɛlua vanin nda dioo-a vinin te, yinnde nda vanin nin-nden le ɲumnin te].

⁴⁹Kani yinnden le tiwnin ɲinkon vana-vana maa ihɛl.

⁵⁰Ɲɛ kɛndɔɔ hɛlle co ni, kɛ te yeelaa fulan pɛ o hɛlle, a yɛɛ niaa mingi yɛnin ndi yeeliaa? La nɔ́ hɛlle niaa nin, mì la va o kɔlɲuloo nin vellaa-velle.»