Read Kissi Luke 1 Bible Online

Luke 1 - Kissi bible

Luke 1

¹Teofil kɛndɔɔ sei[1]! Vanaa bɔɔ-bɔɔ sɛva dɛnnda yɔŋnun naa tɛɛn-ndan,

²má tiiyal vannda lan mɛɛ seyaa ce sɔɔn mun a lehɔl kabi o tasendɔ-a a dimul naa yɛ, aa sɔla kan dio le sɔɛi Hala-e dimio-a pɛɛn.

³Lelan, ya vɛlɛ bɛɛ, kabi o kandɔɔ, mí yaasiaa ɲɛ-ɲɛ yɔŋnun ɲɛkɛndɛi, mí ca maa o naŋ mì sɛval nɔm ndan o polalen, nɔm Teofil vana bɛndoo pɛɛn,

⁴haliko ma sina toɲa sɔɔn nda pɛɛku nɔm-ndon.

⁵Telen Herɔde va masaa Yuda-o, vana-solia-lasálàá pum va lon, diolan Sakari, fulaa o polale Abia len nin. O polale Aarɔn-nden nin laa ndɔ bɛɛ ndóò fula ni, lanɔ kon diolan Elisabɛt.

⁶Vanaa sandaa vanaa ŋiɔŋaa kan kpow a yɔŋnun Hala o hɔl ni, a va vɛlɛ tɔŋndan a tanala Mɛlɛka lan biyɔɔ ɲɛkɛndɛi.

⁷Kɛ nduyɛ, ndáà nɔ n'cuaw le, kani Elisabɛt ve vana vialaa le, ndáà yuuva nin vɛlɛ taw.

⁸Paale pilɛ, Sakari va baala solia lasálà ndɔɔ Hala o hɔl, kani telen polale ndɔlen léè bɛnda le baala kon tosaa-o va kon ni.

⁹Mí sionnden le bii ndu mɛɛ naamu solia lasálàá va yɛ le luɛyɔɔ o Cɛi-Hala-o nin le ansan lomɔɔ.

¹⁰Nduyɛ, aa va pɛ ansan lomɔɔ, vannda taw aa piɛi Hala o dio ni.

¹¹O kon mí mɛlɛkanɔ Maalii-o cɔmnun Sakari, o va isisi o fonda-loamaa-lasálàá ndáà loam ansan-ndo o ba kɛndɔɔ coo.

¹²Sakari cɔu ndu, mí kɔllo muungu ndu yulan-yulan, mí siòònde bii ndu.

¹³Kɛ mí mɛlɛkanɔɔ dimul ndu aa: «Siòòŋii bii nɔm te Sakari, kani piɛile nɔmnden le mulin. Elisabɛt laa nɔm vilulnin nɔm hɔ́ɔ́ piaandoo, mà ke ndu diolan aa Nsaŋ.

¹⁴A naŋnin kɔl mà dɔwnun ɲaale le ndu, mì vanaa bɔɔ-bɔɔ dɔwnun ɲaale le violɔn ndɔɔ.

¹⁵Kani vana tɔ́ɔ́ bɛndoo o vanin Mɛlɛka o hɔl ni. O kolnin mamɔi te kon te ɲɛ-ɲɛ hiŋ vana lahɔl te. O lonin kala ndɔ o dembe mò pɛ a Hala Kɔl-Diandaa.

¹⁶O minginin Israɛlaa bɔɔ-bɔɔ Mɛlɛka Hala ndaa o ibuŋ.

¹⁷O hunnin maa kiilanɔ Hala vem-ndo a yiyanndo a á kpaayaa maa Elii vana-tɛɛngaa-diom Hala-o. O lueinin kɔlɲuloo fuɲaa a cuawva tɛɛn. O mangalanin vanaa bii sɔɛi Hala-e le-a kɔltan, mà sɔla yiyanndo maa vanaa sandaa, haliko mo bɛɛndiaa vannda ɲɛkɛndɛi le Mɛlɛka.»

¹⁸Mí Sakari ɲuna mɛlɛkanɔɔ aa: «Vɛ̀ɛ̀ ya sina yɛnin kon? Kani i yuuva, laa nuu bɛɛ nɔnin vɔsilan taw.»

¹⁹Mí mɛlɛkanɔɔ mulul ndu aa: «Ya co Kabriɛl ni. I co isisi Hala o hɔl le ndu baalaa tosallo. O vem ya, mì soo o nɔm ndo, mì dimul nɔm Yoongu kɛndɔɔ ho.

²⁰Kɛ a laalan sɔɔn nun te, n peelunnin o telen Hala keluo-ndo pɛɛn. Lelan a co hunɔɔ siŋnɔn bobonɔɔ, a tiwnin ba sɔɛi le, háá mì dɛnndan ndan la peelun.»

²¹O telen kon yɛ, vannda va Sakari cumndo, a va buulanndo le viovɔɔ o va o fonda diandaa nin-ndo.

²²Ndóò fulaa, o tiwba sɔɛi o nda lo le, o kon mí vannda sina maa vundulen o kɔ cɔ o fonda-diandaa nin ni. Mó muungu sɔɛi o tuulialan nin, mó siŋnun bobonɔɔ.

²³Palɛi baalɛi ndɔɛi cuvɔɔ, mó muungun o ndu lo.

²⁴Telen pum o kon kɔɔli, mí Elisabɛt laa ndɔ cua folio. Mó viannun o paangon mún ŋuɛɛnu bɛngu. Mó va dimio o kɔl nin aa:

²⁵«Tofa vɔ dɛnɛ Mɛlɛka tosal-la-o! O soli ya o siɛmbulan nin vanndacieea tɛɛn.»

²⁶O paangii ŋɔmpumndɔɛi, mí Hala viam mɛlɛkanɔɔ Kabriɛl o kobio pum nin diolan Nasarɛt, o tàndá Kalile-o nin,

²⁷o cua felengoo pum-ndo, o vana pum va kɔɔli le nɔu-vo, vana kon diolan Yosɛf. O polale masaa David len nin Yosɛf kon fula ni, cua kon diolan Mari.

²⁸Mí mɛlɛkanɔɔ luɛi o ndu lo, mó dimul ndu aa: «Dɔwnun ɲaale, nɔm sɔla hoo dɛnɛ kɛndɔɔ fulaa Hala o ba-o, Mɛlɛka co nɔm ikɛi.»

²⁹Mɛɛ Mari tuei sɔɔn mun, mí kɔllo laasian ndu taw, mó yiyan le yilɔɔ ho kɔlɔɔ sinaa.

³⁰O kon mí mɛlɛkanɔɔ dimul ndu aa: «Yɔŋ isiòòn te Mari, kani Hala ce nɔm ɲia.

³¹Tofa vɔ, a cuanin folio, mà velu poo, mà ke ndu diolan aa Yeesu.

³²O vanin vana bɛndoo, a veelunin ndu aa Po Ó-Hiow-Ɲɔɔn-Kpow-vo. Mɛlɛka, o co Hala-o yɔngunin ndu kpɛŋɛ lemasa David fuɲa ndɔ mamaa-o.

³³O vanin masalen tosaa polale Yakɔb len coo le fɛɛn a fɛɛn, masale ndɔle len le nɔnin lamɛɛlu le.»

³⁴Mí Mari ɲuna mɛlɛkanɔɔ aa: «Vɛ̀ɛ̀ ken i yɔŋnun yɛnin, kani i sina vɔ dɛnɛ vanapɔnɔ le?»

³⁵Mí mɛlɛkanɔɔ mulul ndu aa: «Hala Kɔl-Diandaa hunnin nɔm coo, mì kpaaya Ó-Hiow-Ɲɔɔn-Kpow-vo kuumbun nɔm coo maa levundu. Lelan, o diandaa n vialunin-ndo sɔlanin veeloo aa Po Hala-o.

³⁶Tofa vɔ, Elisabɛt vana nɔm, o ndáà dimi aa o vilu loo bɛɛ cua pulei o yuuvɛi nin. Paangii ŋɔmpumndɔɛi co hee nin nuaa ni.

³⁷Kani ɲɛ-ɲɛ kindu a Hala le.»

³⁸Mí Mari muli aa: «Vana baala Mɛlɛka-o ya co ni. Màá i yɔŋnun mɛɛ n dimi yɛ!» O kon, mí mɛlɛkanɔɔ faŋan ndu ikɛi.

³⁹O telen kon, mí Mari kɔa cɔ́-cɔ́ o lɛŋnde n'pembulen nin, o kobio pum, o tàndá Yuda-o nin.

⁴⁰Mó kɔ luɛi o Sakari lo cɛinin, mó yil Elisabɛt.

⁴¹Lɔ́ɔ́ Elisabɛt tuei yilɔɔ Mari-o-o, mí cɛlɛkpɔɔ biiŋun ndu o dembe. O kon mó pia a Hala Kɔl-Diandaa,

⁴²mó heelu diomndo, mó dimi aa: «Hala dɔw nɔm duaa hiovɔɔ vanlaandua kpow coo, o dɔw vɛlɛ cɛlɛkpɛ n nɔ o dembe-o duaa!

⁴³Bɛɛle súú yɛɛ ya sɔla yɛ len, mì kalaa vana ni bɛndoo hin o ya lo?

⁴⁴Kani yáà tueyɔɔ dɔ́ɔ́ yilɔɔ nɔmndo diom, mí cɛlɛkpɔɔ biiŋun ya o dembe a ɲaaloo.

⁴⁵Vanalanɔ dɛnɛ kɛndɔɔ n co ni, a laalan maa sɔɛi dimulun nɔm fulaa Mɛlɛka o sondo-e co hunɔɔ peelɔn!»

⁴⁶O kon mí Mari dimi aa: «Kɔl nuu co Mɛlɛka sangalaa,

⁴⁷i dɔwnun ɲaale le Hala, Vana Ciindiaa nuu,

⁴⁸kani o mulul-la hɔlla, ya buɛi ndɔ co hoo o sɔvɛ loo. Nduyɛ kandɔɔ sunsun, vanndacieea kpow a vanin ya veeloo aa vanalanɔ dɛnɛ kɛndɔɔ.

⁴⁹Kani Vana-Kpaayaa-Kpow tosal-la dɛnnda kaamaala bɛndulan. Diola ndɔlan aa O-Diandaa.

⁵⁰Ɲíí ndɔɛi co le fɛɛn a fɛɛn le vanaa co ndu bɛɛlen keo-va.

⁵¹O tosa dɛnndan a kpaaya ndɔɔ kpow, mó puusiaa vanaa nɔ yiyannda yongalan o lakɔl-la.

⁵²O faŋa masaa o kpɛŋɛla lemasalan coo, mó heelu vanaa tuisin tootoo-a.

⁵³O yɔngu vanaa yiaan ma va nɛiyo-a ɲɛ-sɔlaa taw, mó mingi vanaa bolofaa vanaa bala fondoa.

⁵⁴O mala Israɛlla, vanaa baala ndɔa, mó yiyan le ɲíí ndɔɛi bɛnduei,

⁵⁵maa mɛɛ ndóò dimul fuɲaa naa mamaa, a Abraham a á polale ndɔlen le fɛɛn a fɛɛn yɛ.»

⁵⁶Mí Mari lo o Elisabɛt lo háá le paangon n yaa. O kon kɔɔli, mó muungu o ndu lo.

⁵⁷Telen Elisabɛt ndóò bɛnda le violɔɔ-o tiiyaa, mó vialu hɔ́ɔ́ piaandoo.

⁵⁸Mɛɛ vanaa va ndu ikɛi-ya a vanayan ndɔn tuɛi maa Mɛlɛka tosal ndu dɛnɛ kɛndɛ bɛndoo, má dɔawnun ɲaale a ndu latulu.

⁵⁹O paale ŋɔmaandɔlen, má kɔa le hɔ́ɔ́ kalaa tooma diyɔɔ. Ndáà yeema mì ndáà ke ndu diola fuɲa ndɔlan aa Sakari.

⁶⁰Kɛ mí kala ndɔ cua sɔɛi, mó dimi aa: «Ɛ-ɛ, Nsaŋ o nɔnin diolan ni.»

⁶¹Má dimul ndu aa: «Vana-vana nɔ diola lan o vanaa nɔmnda tɛɛn te.»

⁶²O kon má tuulial fuɲa ndɔ a laba le sinaa mɛɛ ndóò yeema mì ndóò ke po ndɔɔ diolan yɛ.

⁶³Mí Sakari ɲuna pɛngɛi, mó sɛva lecoo aa: «Diola ndɔlan Nsaŋ.» Mí vannda kpow dɔawnun kɔndɔfili.

⁶⁴Fɔ́ɔ́fɔ̀, mí sondoo kumbin Sakari, mí diɛɛmule ndɔlen le timbin, mó soaa, mó candu Hala.

⁶⁵Mí siòònde bii vanáà balu nda-a kpow, mí tɔ́ɔ́ kon tiw o lɛŋnde n'pembule Yuda len nin sɔ́.

⁶⁶Vanaa va sɔɔn mun tueyɔɔ-a a va mun biinɔnndo o lakɔl, má va ɲunanndo aa: «Vana súú yɛɛ poombɔɔ ho va yɛnin?» Kani ba Mɛlɛka-o va ndu coo.

⁶⁷Mí Hala Kɔl-Diandaa pia Sakari fuɲa ndɔ nin, mó va sɔɔn siɔdii lacion dimio aa:

⁶⁸«Biiloo co le Mɛlɛka, Hala Israɛlla pɛɛn, kani o mala vanaa ndɔa, mó baŋa nda.

⁶⁹O yɔngu naa vana ciindiaa bɛndoo fulaa o polale David len nin, David vana baala ndɔɔ pɛɛn.

⁷⁰Maa mɛɛ ndóò dimi sɔɛi ken a sondola vanaa-tɛɛngaa-diom Hala-a diandaa ndɔa kabi paandu yɛ maa:

⁷¹o baŋanin naa yaamɔaa naa o ba, mò baŋa vɛlɛ naa vanaa nɔ nɛyɔnndo a naa-a o ba.

⁷²O tuinun fuɲaa naa mamaa iɲíí, mó yiyan le kpema diandaa o yii-yo.

⁷³Nduyɛ, kpema ndóò yiilu Abraham fuɲa naa mamaa-o yɔŋnun kon ni aa:

⁷⁴le naa baŋaa yaamɔaa naa o ba, haliko mi n tosal ndu baalaa, o ve a isiòòn te,

⁷⁵haliko mi n va vanaa diandaa a vanaa sandaa ndu o hɔl o palɛi naa n co yoomu-e nin kpow.

⁷⁶Nɔm poombɔɔ ho, a veelunin nɔm aa vana-tɛɛngaa-diom Hala Hiow-Ɲɔɔn kpow-vo, kani Mɛlɛka nɔnin nɔm hɔlten coo, mà hiow laci, mà toosiaa nɛila ndɔlan

⁷⁷le vanaa ndɔa pɛɛkoo maa Hala mal nda haki, mà sɔla cindaa.

⁷⁸A toɲa, Hala naa nɔ bɔɔ dɛnɛ kɛndɔɔ, o solinin ɲɛ-tengaa fulaa coocoo, mò dindi naa maa ɲɛ-tengaa paale siaa,

⁷⁹le vanaa co o ɲumndan nin-nda a vanaa co o vunduma piɔ́mndan bɛngu-a teengiaa, a le naa yɔɔ o nɛi kɔlɲuloo coo.»

⁸⁰Poombɔɔ va hindɔɔ, o va vɛlɛ hiovɔɔ laci a kɔlkaloo sɔlaa. Mo lo o lɛŋnde veselɛilen nin háá telen o kandu Israɛlla sɔɛi o hɔl-lo.