Read Kissi Luke 10 Bible Online

Luke 10 - Kissi bible

Luke 10

¹O kon kɔɔli, mí Maalii hɛli vɛlɛ kaandennda belaŋɔmmɛw a ŋiɔn, mó viam nda a ŋiɔn-ŋiɔn ndu laci o kobilan nin a o fondala ndu pila ndóò nɔ o kɔl le kɔlan-ndan kpow.

²Mó dimul nda aa: «Kovɔɔ co o bɔɔ, kɛ vanaa koavaa co sɛ́lɛ́ le. Lelan la tɛɛlun vana iciɔɔ mò cuu vanaa baalaa le kovɔɔ.

³La kɔ! I co niaa vomɔɔ maa saa cuawva tunaa yondoa tɛɛn.

⁴La kɔa a n'voli le, la kɔa a bɔlɔ le, la kɔa vɛlɛ a lasamta le. La yilan niaa vana o nɛi le.

⁵Cɛi niaa luɛi pɛ, la dimi fɔlɔn aa: ‹Màá kɔlɲuloo va cɛinin nanu!›

⁶Te vana kɔlɲuloo co pɛ lon, o sɔla kɔlɲulu niaa, kɛ te o ve lon te, o muungu le niaa pila.

⁷La lo o cɛi nda yiya niaa kon-ndo nin, mì la de, mì la kol ɲɛ nda kenin niaa-o, kani vana baalaa nɔ dí mò sɔla sala ndɔɔ. La balu cɛilan nin te.

⁸Te la tiiya pɛ o kobio pum nin, mì vanaa co lon-nda bii niaa, la dio ɲɛdiaa nda kenin niaa-o.

⁹La singi vanaa lanàá co lon-nda, mì la dimul nda aa: ‹Masale Hala len le sɔɔnguu niaa ikɛi.›

¹⁰Kɛ te la luɛi pɛ o kobio pum nin, mì vana bii niaa le, la fula o nɛilan coo mì la dimi aa:

¹¹‹Cundu co o niaa lo ciee nanu-o bɛɛ, n co ndu koŋɔɔ mò faŋan naa o n'pelu. Nduyɛ, la sina maa Masale Hala len le sɔɔnguu niaa ikɛi.›

¹²Mì dimul niaa, paale len, yamɛi Hala kilulnin Sodɔm-nde vanin fisa a i kilulunnin vanaa co o kobi kon nin-nda-e.»

¹³Dɛnɛ palaa co le nɔm, nɔm kobio Korasin! Dɛnɛ palaa co le nɔm, nɔm kobio Bɛtsaida! Kani dɛnnda kɔndɔfilta tosan o niaa lo lan láà tosan pɛ Tir a Sidɔn, mì vanaa kan ndáà cii nin volɔɔla biisilan vownɔn, mì ndáà cii nin lɔngɔlian o loolio nin.

¹⁴Lelan, paale yamɛi vanin kiolɔn-ndo len, dɛnɛ niaa hiawnin ikalu a dɛnɛ Tir a Sidɔn-ndo.

¹⁵Nɔm Kapɛrnaum yɛ, a helnin pá háá o halataala? Kɛì-kɛì bɛɛ! A sɔlanin tuisio háá ciee-piɔ́m.

¹⁶Mí Yeesu dimul vɛlɛ kaandeŋaa ndɔa aa: «Vana-vana tuei pɛ niaa diom, mɛɛ ya o tuei diom ni, vana kɛɛ pɛ niaa, mɛɛ ya o kɛɛ ni. Nduyɛ, vana-vana kɛɛ ya pɛ, mɛɛ vana vem ya-o o kɛɛ lende ni.»

¹⁷Mí kaandeŋaa belaŋɔmmɛw a à ŋiɔnda muungu a ɲaaloo, má dimi aa: «Maalii, hali ɲinaa vɔɔnda bii sɔɛi nɛi o diola nɔmndan.»

¹⁸Mí Yeesu dimul nda aa: «I ce Setana delɔɔ fulaa o halataala maa piɔɔ-volia.

¹⁹La tofa vɔ, i cii niaa kpaayaa ke le keiyo kɛwva a ngeemaa coo, mì la tɛɛmbuu kpaaya ɲina vɔɔndo, ɲɛ-ɲɛ yɔŋnunnin niaa le.

²⁰Kɛ nduyɛ, la naŋ kɔl le tùú ɲinaa vɔɔnda co niaa diom tueyɔɔ-o le, kɛ la naŋ kɔl le tùú diola niaalan la co lasɛvaalan o halataala-o.»

²¹O telen kon, mí Yeesu dɔawnun ɲaale a kpaaya Kɔl-Diandaa, mó dimi aa: «I mel nɔm balika, Pua, Mɛlɛka co o halataala a o lɛŋnden coo-o, kani a vin vanaa kɔlkalua a vanaa sinaa dɛnɛa dɛnndan ndan, má cɔm cuaambɔa. Lende i co ni Pua, hɛnan nɔmndo n tosa nuaa ni.

²²Fuɲa nuu mal ɲɔɔn kpow ya o ba. Nduyɛ, vana-vana sina o co Poo-o le, fɔ Fuɲaa, vana-vana sina vɛlɛ o co Fuɲaa-o le, fɔ Poo a vanaa Poo hɛli le nda mun cɔmndo-a.»

²³O kon kɔɔli, mó mulin a ba kaandeŋaa ndɔa, mó dimul nda aa: «Dɛnɛ kɛndɔɔ co le niaa co dɛnndan ndan cɔu-va!

²⁴Kani mì dimul niaa, vanaa-tɛɛngaa-diom Hala-a bɔɔ-bɔɔ a masaa bɔɔ-bɔɔ ndáà yeema mì ndáà ce dɛnndan ndan, kɛ a ci lan te. Ndáà yeema mì ndáà tuei ɲɛ niaa co hoo tueyɔɔ-o, kɛ a tui ndu le.»

²⁵Mí vana pɛɛkaa latɔŋndo pum can le Yeesu kɔlɔɔ solio, mó ɲuna ndu aa: «Kɔɔfa, yɛɛ ya tosa yɛ́ mì sɔla yoomu fɛɛn-fɛɛndo?»

²⁶Mí Yeesu mulul ndu aa: «Yɛɛ co yɛ o sɛvaa o tɔŋndo nin? Vɛ̀ɛ̀ n bii yɛ ndu bila?»

²⁷Mí vana pɛɛkaa latɔŋ kon muli aa: «Kaola Mɛlɛka, o co Hala nɔmndo-o a kɔl nɔmndo kpow, a yoomu nɔmndo kpow, a kpaaya nɔmndo kpow a á yiyan nɔmndo kpow. Kaola caanda maa nɔm pila.»

²⁸O kon, mí Yeesu mulul ndu aa: «A bɛɛndiaa muli, tosa lende mà sɔla cindaa.»

²⁹Kɛ langbanɔ kon ndóò yeema mì ndu pila ndóò kennun di, le hee mó ɲuna Yeesu aa: «Nɛ̀ɛ́ co yɛ caan nuu?»

³⁰Mí Yeesu muli aa: «Langbanɔɔ pum cɛn Yerusalɛm ni, mó va kɔlan Yeriko. Mó kei luɛyɔɔ vanaa del vannda coo-a tɛɛn, má del ndu coo, má poondiaa ndu ɲɔɔn kpow o ba. O kon kɔɔli, má lɔaa ndu, má mɛɛlu ndu tendú-piɔ́m.

³¹Vana-solia-lasálàá pum lo kɔlan o nɛi kon, mó ca langbanɔ nda lɔ́ɔ́ kon-ndo, mó kei o nɛiyo baa pilɔɔ, mó hiawnun.

³²Leviinɔɔ pum tiiya vɛlɛ o fonda kon, mó ca ndu, mí ndu bɛɛ kei o nɛiyo baa pilɔɔ, mó hiawnun.

³³Kɛ Samarinɔɔ pum va kɔlan inɛɛ, mó tiiya ndu ikɛi. Mɛɛ o ce ndu, mí ɲííye bii ndu.

³⁴Mó sɔɔnguu ndu ikɛi, mó dɔaw cuɛiyan a mɔiyan mapum o boolɔnnda langbanɔ kon coo, mó yiwyiw lan. O kon kɔɔli, mó heelu ndu o sofɛlɛ ndɔɔ coo, mó kɔa a ndu o cɛi ndáà yiya mialla-o nin, mó dɔaw ndu danda.

³⁵Diimandɔɔ, mó soli volin latámán mún miun, mó yɔngu vana cɛi kon. Mó dimul ndu vɛlɛ aa: ‹Koma nɔ ndu hɔlten coo mà dɔw ndu danda, ɲɛ-ɲɛ n koma handu pɛ lecoo, lɔ́ɔ́ ya pila muungunin nanu-o, i mingul nɔm.›»

³⁶Mí Yeesu hiaw laci a sɔɛi, mó ɲuna aa: «O vanaa yaa kan tɛɛn, ɔ́ɔ̀ vana co caaŋoo langbanɔ nda del hoo coo-o?»

³⁷Mí vana pɛɛkaa latɔŋndo muli aa: «Vana tosal ndu dɛnɛ kɛndɔɔ-o.» O kon mí Yeesu dimul ndu aa: «Mɛɛ nɔm bɛɛ, kɔ mà kɔ tosa lende.»

³⁸Telen Yeesu nda kaandeŋaa ndɔa va kɔlan-ndo, mó tiiya o cieo pum. Mí vanalanɔɔ pum diolan Marte yiya ndu o ndu lo cɛinin.

³⁹Marte kon ndóò nɔ pɔmbɔɔ, diolan Mari. Mí Mari cal Yeesu o labɛngunin le sɔɔn ndɔn yaŋnɔnndo.

⁴⁰Kɛ Marte ndóò nɔ kɛvaltan taw le tosaa. Le hee, mó sɔɔnguu Yeesu ikɛi, mó dimul ndu aa: «Vana bɛndoo, pɔmbɔ nuu mal-la baalaa ya pilɛ kpé, o co saalan te? Dimul ndu mò hun mala ya.»

⁴¹Mí Yeesu mulul ndu aa: «Marte, Marte, a co buulanndo ma va lawvo le dɛnndan taw,

⁴²kɛ nduyɛ, dɛnɔɔ ndu pilɛ kpé naŋ ni. Dɛnɛ hiow kon naŋɔɔ-o Mari hɛli nuaa ni, nduyɛ, vana-vana heelunin ndu dɛnɛ kon o ba le.»