Read Kissi Luke 13 Bible Online

Luke 13 - Kissi bible

Luke 13

¹O telen kon, mí vanaa pum a kɔa o Yeesu lo, má dimul ndu aa: «Mí Pilate ndóò bingulan kooma Kalilea a sálàlá nda va solio lan.»

²Mí Yeesu ɲuna nda aa: «La co yiyanndo maa Kalilea nda diw kan-nda ndáà hiow vaa vanaa lahakia a Kalilea tɔ̀a ni, maa lelan nda sɔla piɔ́mndo ni?

³Ɛ-ɛ. Mì dimul niaa, te la mel yɔŋ vɔɔndo mì la mangalan te, lende koni niaa bɛɛ sɔlanin piɔ́mndo ni.

⁴N'van tɔ́ a vanaa ŋɔmaa cɛi coocoo vilɛiyo del coo Siloe, mó diw nda-a yɛ, la laalan maa nda yɔŋnun vanaa yɔŋ vɔɔnda hiovɔɔ vanaa tɔ̀a Yerusalɛm coo ni?

⁵Kɛì-kɛì bɛɛ! Mì dimul niaa, te la mel yɔŋ vɔɔndo mì la mangalan te, lende niaa bɛɛ sɔlanin piɔ́mndo ni.»

⁶O kon kɔɔli, mí Yeesu dimul nda vɛlɛ sandaa ho aa: «Vanndo pum ndóò nɔ voosu tumndo o tɔalaa o nakɔ ndɔ n'rɛsɛnndo nin. Mó hun vooson nuwviaa, kɛ o komal ɲɛ-ɲɛ le coo le.

⁷O kon, mó dimul vana va nakɔ n'rɛsɛn kon mandaa-o aa: ‹Tofa vɔ, vɔsilan tan yáá co hoo ni, i co hunɔɔ voosun koaman nuwviaa o vosoo ho coo, kɛ i co ɲɛ-ɲɛ komal te. Kiolu ndu. O bɛnda mò bii fondaa o lɛŋnden coo fúú le!›

⁸Kɛ mí vana mandaa nakɔ kon mulul ndu aa: ‹Vana bɛndoo, mal-lɔ ndu le vosio ho. I co soondo balɔɔ tovɔɔ sɔ́, mì dɔw puulu sállo.

⁹Te o kom pɛ vɔsi co hunɔɔ-o, o naŋ. Te o kum yɛ le, a kelu ndu.›»

¹⁰O paale pɛngiaalen lepum coo, Yeesu va pɛɛkoo o cɛi lekaando nin.

¹¹Nduyɛ vuɛɛndo pum va lon, o ɲina vɔɔndo ndóò soli buue-o. Vɔsilan tɔ́ a laŋɔmaa, o va o sanga kon nin. Ndóò tiw lɛ ba simndan sakpo le.

¹²Mɛɛ Yeesu ce ndu, mó veelu ndu, mó dimul ndu aa: «Vuɛɛndo, namtale nɔmnden le cuu.»

¹³Mó handu ndu balan coo. Fɔ́ɔ́fɔ̀, mí vuɛɛndo sim sakpo, mó va Hala sangalaa.

¹⁴Kɛ mí vana lebol va o cɛi lekaando nin-ndo tambu kɔllo le singi Yeesu singi vuɛɛn kon o paale pɛngiaalen coo-o. Mí vana lebol kon dimul vannda aa: «Palɛi ndii ŋɔmpun i co le vallo ni, la hun mì la sɔla siongɔɔ o palɛi ken bɛngu, kɛ o co o paale pɛngiaalen coo le.»

¹⁵Mí Maalii mulul ndu aa: «Niaa vanaa muuluannda ha! Niaa a pilɛn-pilɛnnda, vɛ̀ɛ̀ la timbi navaa niaa a sofɛlɛa niaa nɛɛ niaa dow nda billo-a o paale pɛngiaalen coo le nda koesio le.

¹⁶Vuɛɛn fula yɛ hoo niko o polale Abraham-nden coo-o, o Setana ndóò yii o vɔsilan tɔ́ a laŋɔmaa bɛngu-o, bàà ndu ya kɛɛnin singi o paale pɛngiaalen coo ni?»

¹⁷Telen Yeesu va mulio ho yɔngoo-o, mí siɛmbulan la bii yaamɔaa ndɔa kpow. Kɛ nduyɛ, ɲaaloo va vannda taw le dɛnnda kɔndɔfilta o va tosaa lan.

¹⁸O kon kɔɔli, mí Yeesu dimi aa: «A yɛɛ nɛ masale Hala len le velan yɛ? A yɛɛ nɛ ya tuu yɛ len?

¹⁹Maa kulii mutarde le co ni, i vanndo pum cua mó mal o nakɔ ndɔɔ nin-nde. Ndíì vulɔɔ, mí i siŋnun yɔmndo. Mí yowva hun tangul o lɛvun ndɔn.»

²⁰Mí Yeesu ɲuna vɛlɛ aa: «A yɛɛ nɛ ya tuu yɛnin masale Hala len?

²¹Le co ko kpen a lɛvɛnndo, o vanalanɔɔ pum cua, mó vow o kpeyan pani leyàá-o nin-ndo. Mí lɛvɛn kon tosa, mí kpeyan kon kpow hel helɔɔ pila.»

²²O kɔla Yeesu va Yerusalɛm ndan, mó kei vannda pɛɛkoo o kobilan a o sɔndɔkɔltan nin.

²³Mí vanndo ɲuna ndu aa: «Vana bɛndoo, mò va maa vannda ɲɛ-pɔmbɔ koni a sɔlanin cindaa ni?» Mí Yeesu mulul ndu aa:

²⁴«La kindin le luɛyɔɔ o dio sɔɔkɛɲɛɛo, kani mì dimul niaa, vanaa bɔɔ-bɔɔ a kindikindinnin le luɛyɔɔ, kɛ a tiwnin ba le.

²⁵Telen vana cɛiyo cannin mò kinda dioo-o, la lonin o bɛ́ɛ̀. La kandunin dioo lɔɔ a dimio aa: ‹Maalii! Kumbil naa dioo.› Kɛ mò mulul niaa aa: ‹I sina nɛɛ niaa fula le.›

²⁶O kon la dimulnin ndu aa: ‹N de mí kol naa niaa, má pɛɛku vannda o nɛila kobila naalan coo.›

²⁷Kɛ o mululnin niaa vɛlɛ aa: ‹I sina nɛɛ niaa fula le. La faŋan ya, niaa vanaa yɔŋ vɔɔnda ha!›

²⁸O kon la caŋnin mì la sɔm ciŋndon, telen niaa canin Abraham, Isaak, Yakɔb a vanaa-tɛɛngaa-diom Hala-a kpow o Masale Hala len nin, mà viow niaa o dio-o pɛɛn.

²⁹Vannda hunnin fulaa a ba paalen le can-ndo, ba le del-lo, a maluaŋ a á ba too, mà cal le dioo o fondala ndalan o Masale Hala len nin.

³⁰O kon, vanaa mɛɛlaa a pum a vanin vanaa tasea, mì a tasea siŋnun vanaa mɛɛlaa.»

³¹O telen pilɛ kon, mí Faliisia pum a hun o Yeesu lo, má dimul ndu aa: «Faŋan nanu mà kɔɛ nɛɛ celen, kani Herɔde yeema mò vem vannda le nɔm diyɔɔ.»

³²Mó mulul nda aa: «La kɔ dimul kàà kon[2] maa hau a siɔdii, i co ɲinaa vɔɔnda tovɔɔ vannda kɔɔli mì va nda singio, o paale yàándɔlen i co cii.

³³Kɛ mɛɛ mì hiow hau laci, siɔdii a diɛŋ bɛɛ, kani o bɛnda mì vana-tɛɛngaa-diom Hala-o vi nɛɛ celen te, fɔ Yerusalɛm.»

³⁴Mí Yeesu dimi aa: «Kpòkóó Yerusalɛm! Yerusalɛm, nɔm diw hoo vanaa-tɛɛngaa-diom Hala-a, má vii vanaa nda vim nɔm-nda a powtan-ndo! I kindin o nɛi oo nɛi coo le cuavaa nɔmnda mɔɔsiaa mɛɛ sɔɔ komsaa mɔɔsiaa cuavaa ndɔa o kumbanndan bɛngu nuaa yɛ, kɛ à cɛl te.

³⁵Lelan, cɛi niaa lonin fondo fúú. I co niaa dimul, la ci lɛnin ya le, háá telen niaa diminin-ndo aa: ‹Biiloo co hunɔɔ o diola Mɛlɛka lan-ndo!›»