Read Kissi Luke 14 Bible Online

Luke 14 - Kissi bible

Luke 14

¹O paale pɛngiaalen lepum coo, mí Yeesu luɛi o simlacinɔ Faliisia lo cɛinin le dioo. Mí vannda va ndu tofaa ɲɛkɛndɛi.

²Langbanɔ pilɛ va Yeesu o hɔl, diallon n va ndu yufudaa.

³O kon, mí Yeesu cua sɔɛi, mó ɲuna vanaa pɛɛkaa latɔŋnda a Faliisia aa: «Vɛ̀ɛ̀ tɔŋ naa cɛl pá mì vana singi vanndo o paale pɛngiaalen coo baa o cɛl te?»

⁴Kɛ a muli le. O kon, mí Yeesu pilan vana nàà kon, mó singi ndu, mó mal ndu kɔnndan o ndu lo.

⁵O kon kɔɔli, mó ɲuna nda aa: «Te vana pilɛ o niaa tɛɛn nɔ pɛ poo, te kon te nawvo, mò del o soondo nin o paale pɛngiaalen coo, vɛ̀ɛ̀ o kuenin fɔ́ɔ́fɔ̀, mò kɔ soli ndu le?»

⁶A sɔla ɲɛ-ɲɛ nda muli le.

⁷Yeesu cɔu mɛɛ vanaa ndáà veelu-a va fondala sɔvɛlan hɛlio le calle yɛ, mó dimul nda taloo ho aa:

⁸«Taa veelu nɔm pɛ le ɲɛdiaa dioo o kafo vannda co nɔu yiiyo-o, kɔa calle o fonda tase co lacio le, yɔŋii vana hiow nɔm bɛɛlen ma veelu ndu-o hun,

⁹mì vana veelu nɔm niaa vana kon-ndo hun dimul nɔm aa: ‹Mel ndu fondaa ho›. O kon siɛmbulan la biinin nɔm le kɔlan calle o fonda mɛɛlaa.

¹⁰Kɛ taa veelu nɔm pɛ, a kɔ cal o fonda mɛɛlaa, o kon te vana veelu niaa-o hin pɛ, o dimulnin nɔm aa: ‹Caan nuu, kɔ cal laci.› O kon, a sɔlanin bɛɛlen vanaa nda veelu-a kpow o hɔl.

¹¹Kani vana-vana heelun pɛ, ndu sɔlanin tuisio tootoo. Kɛ vana-vana tuisin pɛ, ndu sɔlanin heeloo.»

¹²O kon kɔɔli, mí Yeesu dimul vana óò veelu ndu kon-ndo aa: «Taa va pɛ vannda ɲɛdiaa ipalaa, te kon te o icɔllo yɔngoo, véélu caaŋaa nɔmnda le, te kon te puapilɛa nɔmnda, vanayan nɔmndon, a vanaa bolofaa, yɔŋii nda bɛɛ a veelu nɔm, mà mingi màá n veelu nda-o.

¹³Kɛ taa va pɛ vannda ɲɛdiaa kafoo keo, a veelu vanaa bala fondoa, namtaa, vanaa bɛvɛiya a vanaa sumɛiya.

¹⁴O kon, a sɔlanin duaa, kani a tiwnin ba nɔm mingullo le. Kani kon mingulunnin nɔm paale vanaa tosa dɛnɛ sandaa-a muungunin yoomu fulaa vanvílɛ́iya tɛɛn-nden.»

¹⁵Vanaa nda va dioo-a o pilɛ tueyɔɔ sɔɔn mun, mó dimul Yeesu aa: «Dɛnɛ kɛndɔɔ vanin le vana dianin o Masale Hala len nin-ndo!»

¹⁶Mí Yeesu dimul ndu aa: «Vanndo pum toosiaa ɲɛdiaa kafoo ni, mó yoongu vannda taw.

¹⁷Telenndo tiiyaa le dioo, mó viam buɛi ndɔɔ le vanaa ndóò yoongu-a dimullo aa: ‹La hun niko, ɲɛdiaa cuu toosiaa.›

¹⁸Kɛ mí nda kpow a kɛɛ, mí vana-vana cɔm bahavɛiyo. Mí vana tasoo dimul ndu aa: ‹I langa piondu yondoo, fɔ mì kɔɛ mì kɔ tofa ndu. A yandi, mal-la haki.›

¹⁹Mí o pilɔɔ dimi aa: ‹I langa piondu navaa vàá tɔ́, fɔ mì kɔɛ nda tofa. A yandi, mal-la haki.›

²⁰Mí o pilɔɔ ndu dimi aa: ‹I yil-lɔ ko lanɔɔ sɛnɛi, lelan i nɔla kɔlan te.›

²¹Mɛɛ buɛi kon muungu o vana ndɔ bɛndoo lo, mó kɔ tɛɛngul ndu mulilan ndan. Mí simlaci leyungu kon tuulu kɔl. Mó dimul buɛi ndɔɔ aa: ‹Kɔ cɔ́-cɔ́ o bɛ́ɛ̀lan a o nɛila kobio ho, mà hin a vanaa bala fondoa, namtaa, vanaa sumɛiya a vanaa bɛvɛiya.›

²²Telen pum hiovɔɔ, mí buɛiyo hun dimul ndu aa: ‹Vana bɛndoo, sɔɔn cuu toosiaa mɛɛ n dimi yɛ, kɛ fondaa lo vɔ vɛlɛ.›

²³Mí vana bɛndoo dimul ndu vɛlɛ aa: ‹Kɔ o nɛilan a o kungalan demullo, ma baŋ vannda le luɛyɔɔ haliko mi cɛi nuu ho pɛ cá.

²⁴Kani mì dimul nɔm, vanaa yáà yoongu-a kpede, o kɛ́-kɛ̀ meenunnin ɲɛdiaa ho o sondo le.›»

²⁵Sɛ́lɔ́ɔ́ va kɔlan Yeesu kɔɔli taw. Mó mulin, mó dimul nda aa:

²⁶«Vana-vana yeema pɛ le ya delɔɔ kɔɔli, mɛɛ mò kɛɛ fuɲa ndɔ, kala ndɔ, laa ndɔ, cuavaa ndɔa, puapilɛa ndɔa a yemaa ndɔa, mò kɛɛ vɛlɛ yoomu ndɔɔ, te o co kon te, o tiwba mò siŋnun kaandennɔ nuu le.

²⁷Vana-vana cue yɔm singafilaa ndɔɔ mò del-la kɔɔle le, mɛɛ ndu bɛnda mò siŋnun kaandennɔ nuu le.»

²⁸Mó hiaw laci a sɔɛi, mó dimi aa: «Te vana pilɛ o niaa tɛɛn yeema pɛ le cɛi coocoo tangullo, mɛɛ mò cal fɔlɔn, mò tuu ɲɛ o bɛnda le solio-o, haliko mo sina te ɲɛ-sɔlaa o nɔ-o mala ndu mò cii cɛi kon tangulu.

²⁹Te o yiyan te, mò kila cɛiyo, mò kɛɛ ndu siow tangul, mɛɛ vanaa canin cɛi kon-nda kpow a mamnin ndu,

³⁰mà dimi aa: ‹Langbanɔɔ ho ndóò kandu tangullo, kɛ o tiwba ndu siowvo le.›

³¹Lende koni vɛlɛ ni, te masa pum yeema pɛ le masa celen simullo, mɛɛ mò cal fɔlɔn, mò yiyan te o nɔlanin masa nɔ vanaa cɔwva vaalan bidiin-ndo simullo a vanaa ndɔa cɔwva vaalan tɔ́.

³²Te o nɔlanin te, mɛɛ o viom kiilaa lɔ́ɔ́ masa kon co vɔ lándan-ndo, mò cii sɔngɔɔ.

³³Lelan, vana-vana faŋá kɔl ndɔɔ o ɲɛm o nɔ-on coo le, o tiwba mò va kaandennɔ nuu le.»

³⁴«Ɲɛ kɛndɔɔ pila hɛlle co ni, kɛ te i muungu pɛ paŋ, a yɛɛ vana mingi yɛ ndi vɛlɛ yeeliaa?

³⁵I nɛŋi lɛ ɲɛ-ɲɛ le, o va lɛŋ, o va o sál coo, mɛɛ mì vana viow ndi o bɛ́ɛ̀. Vana nɔ pɛ nilan le tueyɔɔ, mɛɛ ndu tuei.»