Read Kissi Luke 15 Bible Online

Luke 15 - Kissi bible

Luke 15

¹Mí vanaa biyaa mulua a vanaa lahakia sɔɔnguu Yeesu ikɛi le ndu nilan yaŋɔɔ.

²Mí Faliisia a vanaa pɛɛkaa latɔŋnda a va dimio tootoo aa: «Fallo ho co cɛlɔɔ le dioo nda vanaa lahakia.»

³O kon mí Yeesu dimul nda taloo ho aa:

⁴«O niaa tɛɛn, te vanndo nɔ pɛ saa kɛmɛ, mì o pilɛ lo, vɛ̀ɛ̀ o co saa belaŋɔmahiɔɔlu a ŋɔmahiɔɔlua le o mɛi-yɔ yondoo nin, mò kɔɛ o lo kon-ndo nuwviaa háá mò saalun ndu le?

⁵Te o saalun ndu pɛ, o handun ndu o congú a ɲaaloo,

⁶o muungu o ndu lo. O kon kɔɔli, o kɔ veelu caaŋaa ndɔa a vanaa nda cɛɛlan-nda, o dimul nda aa: ‹La mala ya ɲaaloo, kani i saalun saa ni óò lo-o.›

⁷Lende vɛlɛ koni, mì dimul niaa, te vana yɔŋ vɔɔndo o pilɛ mal pɛ yɔŋ ndɔ vɔɔndo, lende koni ɲaale bɛndoo vanin o halataala, mò hiow ɲaale vanaa sandaa belaŋɔmahiɔɔlu a ŋɔmahiɔɔlua a nɔ lɛ mako le mangalan te-a ni.»

⁸Mí Yeesu hiaw laci a sɔɛi, mó dimi aa: «Te kon te, te vanalanɔɔ pum nɔ pɛ volin latámán tɔ́, mì voliei ipilɛ i lo, vɛ̀ɛ̀ o co fitinaa le o mɛndul, mò bɛɛsuu cɛiyo, mò nuwviaa ɲɛkɛndɛi háá mò saalun volii ken te?

⁹O saalun ndi pɛ, o veelu caaŋaa ndɔa a vanaa nda cɛɛlan-nda, o dimul nda aa: ‹La mala ya ɲaaloo, kani i saalun volii nii ndíì lo-e.›

¹⁰Mì dimul niaa, lende koni mɛlɛkaa Hala-a a dɔawnun ɲaale le vana yɔŋ vɔɔn mal yɔŋ ndɔ vɔɔndo, mò mangalan-ndo ni.»

¹¹Mí Yeesu dimi vɛlɛ aa: «Fal pilɛ ndóò nɔ poaa nda ŋiɔn.

¹²Mí ó va cuaambɔɔ-o dimul fuɲa ndɔ aa: ‹Pua, ke ya kɛ́ nuu.› O kon, mí fallo piɔw nda kɛ́ɔ tɛɛn.

¹³Palɛi bingi o kon kɔɔli, mí o pɔmbɔɔ kon mɔɔsiaa ɲɛm ndɔn kpow, mó kɔannun o lɛŋnden nin, mó kɔ tɛɛmbuu bolofaa ndɔɔ o laasianndo nin.

¹⁴Mɛɛ o cii ɲɛm ndɔn kpow tɛɛmbuu, mí yima fofolan ma luɛi o lɛŋnde len nin, mí pɛŋnden le kandu ndu biyɔɔ.

¹⁵O kon, mó kɔ luɛi o vallo vana pilɛ o ba o lɛŋnde len nin, mí vana kon ndu yaa ndu yondoo nin le pevaa ndɔa ɲɛdiaa keo.

¹⁶Po kon ndóò yeema mì ndóò va balo pewva va dioo-o sɔlaa, kɛ vana-vana ve ndu ndu ke le.

¹⁷O kon, mó kandu yiyanndo, mó dimin o kɔl nin aa: ‹Vanaa baalaa co fuɲa nuu o ba taw, a co ɲɛdiaa dioo, a co cii le, mì ya ya i va vuo a yiaan nanu nuaa!

¹⁸I co cɔnɔn, mì muungu o fuɲa nuu lo, mì dimul ndu aa: Pua, i cua hakio a Hala a á nɔm.

¹⁹I nɔ lɛ di ma veelu ya aa po nɔm te. Bii ya maa vana nɔm baala.›

²⁰O kon mó can, mó muungu o fuɲa ndɔ lo. O lo nɛɛ levil, mí fuɲa ndɔ ca ndu, mí ɲííye bii ndu taw. Mó ɲaanun, mó kɔ kɔman po ndɔɔ, mó sɔsa ndu sondoo.

²¹Mí poo dimul ndu aa: ‹Pua, i cua hakio a Hala, i cua vɛlɛ hakio a nɔm, i nɔ lɛ di ma veelu ya aa po nɔm te.›

²²Kɛ mí fuɲaa dimul vanaa ndɔa baalaa aa: ‹La hun a doma kɛndɛ-kɛndɔɔ cɔ́-cɔ́, mì la vow ndu. La vow ndu kelɛi o isu, mì la vow ndu samtalan.

²³La hun a naw téndé celul-lo, mì la dii ndu, mì n dennun, mì n dɔwnun ɲaale,

²⁴kani po nuu ndóò vi, kɛ o muungu yoomu, ndóò lo, kɛ o cennun.› O kon, má kandu bɛɛ ɲaaloo fɔ́ɔ́fɔ̀,

²⁵O telen kon, po ndɔ tasoo va vallo o poli. Mɛɛ o muungu, mó sɔɔnguu o cɛiyo ikɛi, mó tuɛi ɲɛm-caan diom a yolan.

²⁶Mó veelu vana baalaa o pilɛ, mó ɲuna ndu a dɛnɛ va kon tosanndo-o o kɔɔ.

²⁷Mí vana baala kon mulul ndu aa: ‹Pɔmbɔ nɔm fula o kelaa nin ni, o muungu o bɛ́ɛ̀. Mí fuɲa nɔm dii naw téndé celulɛiyo, kani po ndɔɔ muungu kɛndia.›

²⁸O kon, mí bɛ ndɔ kon tambu kɔllo, o cɛl le luɛyɔɔ cɛinin te. Mí fuɲa ndɔ fula, mó ɲɔɔlu ndu.

²⁹Kɛ mó mulul fuɲa ndɔ aa: ‹Vɔsilan ndan kpede, i co nɔm baalaa tosallo, i kɛɛ nɔm diom tueyɔɔ le. A kon kpede, lepilɛ bɛɛ a soli hali cuin cuaa mì tosa kɔlkɛndɔɔ naa caaŋaa nia le.

³⁰Kɛ mɛɛ po nɔm cii hoo bolofaa nɔmndo tɛɛmbuu vanlaandua suundaa kɔɔli-o hin, má dii naw téndé celulɛiyo.›

³¹O kon mí fuɲa ndɔ dimul ndu aa: ‹Po nuu, nɔm a co ya ikɛi lɔ́ɔ́-lɔ́ɔ̀, ɲɛ-ɲɛ ya nɔ, nɔm nɔ ni.

³²Kɛ mɛɛ mì n tosa kafoo, mì n dɔwnun ɲaale, kani pɔmbɔ nɔm hoo ndóò vi, kɛ o muungu yoomu. Ndóò lo, kɛ o cennun.›»