Read Kissi Luke 19 Bible Online

Luke 19 - Kissi bible

Luke 19

¹Yeesu luɛyɔɔ Yeriko ciee, mó va keiyo o kobi kon tɛɛn.

²Langbanɔɔ pum va lon, diolan Saasee. Ndu va bolle vanaa biyaa mulua ni, vana bolofaa o va vɛlɛ ni.

³O va kindinndo le Yeesu cɔu, kɛ o ve tiwɔɔ ba le, kani vana bingio o va ni, vannda va vɛlɛ sɛ́lɛ́.

⁴Le hee, mó hiaw laci a ɲaanɔnndo, mó kɔ hel o buumbuu tumndo coo le ndu cɔu, kani lon o va kei ni.

⁵Yeesu tiiyaa o fonda kon, mó heelu hɔlla, mó dimul ndu aa: «Saasee, tol cɔ́-cɔ́. Kani o nɔm ndo cɛinin ya co hau lakɔ o yiya ni.»

⁶Mí Saasee keleŋa tolɔɔ, mó sɛɛna Yeesu a ɲaaloo.

⁷Vannda kpow ndáà cɔu lende, má va sɔɔn pɔmbɔn dimio aa: «Tofa vɔ, o kɔɛ o yiya o vana lahakio lo cɛinin.»

⁸Kɛ mí Saasee can, mó dimul Maalii aa: «Maalii, i co vanaa bala fondoa ɲɛ-sɔlaa nuu ke ba pilɛ. Te i cua pɛ ɲɛ vana, i mingulnin vana kon kundalan lahiɔɔlu.»

⁹O kon mí Yeesu dimul ndu aa: «Vanaa co o nɔm ndo cɛinin nanu-a sɔla hau cindaa. Kani nɔm bɛɛ, o polale Abraham-nden nin n fula ni.

¹⁰Kani Po vanacieo hin le vanaa va o lou nin-nda nuwviaa, mò ciindiaa nda.»

¹¹Vannda va sɔɔn mun yaŋnɔnndo, mí Yeesu dimul nda vɛlɛ taloo. Nduyɛ, o va Yerusalɛm macɛlu, a va yiyanndo maa Masale Hala len le va hunɔɔ cɔmnɔn o telen kon.

¹²Lelan, mí Yeesu dimul nda aa: «Mí langbanɔ pilɛ, ó velun o polalen tɔ́ɔ́len nin-ndo, kɔa o lɛŋnde levil-vilten lepum nin, haliko mi ndáà kɔ suili ndu masaa, o kon kɔɔli mì ndóò muungun.

¹³Kɛ lɔ́ɔ́ pá mó kɔa, mó veelu buɛyaa ndɔa n'van tɔ́, mó yɔngu vana-vana sianii kpungbɛi ipilɛ, mó dimul nda aa: ‹La tosa yulalen a sianion mun háá mì hin.›

¹⁴Kɛ vanaa va o lɛŋnde ndɔlen nin-nda ndáà yeema ndu le. Má soli vannda, má kɔa ndu kɔɔli, má kɔ dimi aa: ‹N yeema mì langbanɔɔ ho tosa masalen naa coo le.›

¹⁵Kɛ a kon kpow, má suili ndu masaa, mó muungu o ndu lo. O kon mó veelu buɛyaa ndɔa, à ndóò yɔngu sianion-nda le sinaa tɔnɔ nda koma sɔla lecoo-o.

¹⁶Mí o tasoo hun, mó dimi aa: ‹Vana bɛndoo! Sianin n'kpungban tɔ́ ya koma sɔla o sianii kpungbɛi n yɔngu ya-e coo ni.›

¹⁷Mí masaa mulul ndu aa: ‹Nuvali, vana baala kɛndɔɔ n co ni. Le tùú n lo o lediom coo a ɲɛ-pɔmbɔɔ hoo-o, i suili nɔm masa ibungaa kobilan tɔ́ coo.›

¹⁸Mí o diinndɔɔ hun, mó dimi aa: ‹Vana bɛndoo, sianii pilɛ n yɔngu ya-e luei tɔnɔɔ sianion mún ŋuɛɛnu.›

¹⁹Mí masaa dimul ndu aa: ‹Nɔm bɛɛ, i siinguu nɔm masa ibungaa kobilan tan ŋuɛɛnu coo.›

²⁰Mí o pillo hun, mó dimi aa: ‹Vana bɛndoo, má cè sianii nɔmnde. Á kolaa yáà simbulu ndi ni, mí manda ndi kpáŋ.

²¹Siòònde va ya a nɔm ni, kani vana n co-o, dɛnɛ nɔmndo kendu bɔɔ. Ɲɛ n kɛsi loo, ndu n cua ni, ɲɛ n seŋ too, ndu n koaw ni.›

²²Mí vana ndɔ bɛndoo dimul ndu aa: ‹Nɔm vana baala vɔɔndo ho, i co nɔm iyama kiolɔɔ a sɔɔn fula nɔm pila o sondo-on. A va sinaa maa vana ya co-o, dɛnɛ nuu kendu bɔɔ, maa ɲɛ ya kɛsi loo ndu ya cua ni, ɲɛ ya seŋ too ndu ya koaw ni.

²³Le yɛɛ nɛ niko a yee volin nun o cɛi mandaa bolofaa nin te? O kon mɛɛ yáà muungu nanu nuaa yɛ, yáà hun soli mun a tɔnɔɔ lecoo?›

²⁴O kon, mó dimul vanaa va lon-nda aa: ‹La hiɔlu sianii ken ndu o ba, mì la yɔngu vana nɔ sianion tɔ́-o!›

²⁵Mí vanaa kan dimul ndu aa: ‹Vana bɛndoo, ndu nɔ nihau sianion tɔ́!›

²⁶Mí masaa dimi aa: ‹Vana nɔ ɲɛ o ba-o, a cɔɔlunnin ndu yɔngu. Kɛ vana nɔ ɲɛ o ba loo, hali o pɔmbɔ co ndu o ba-o, a hialunin kon ndu o ba.

²⁷Le yaamɔaa nia yɛ, áà yeema mì yáà sul masa nda coo le-a, la hun a nda nanu, mì la diw nda ya o hɔl.›»

²⁸Yeesu ciiyo sɔɔn mun dimio, mó hiaw vannda laci, mó bii nɛiyo heeloo a kpengii Yerusalɛm-nde.

²⁹Tuma nda kandu tiiyaa Bɛtfasee a Betani ciee-lekɔɔ-o, o Pembii oliviei, mí Yeesu viam kaandeŋaa ndɔa nda ŋiɔn,

³⁰mó dimul nda aa: «La kɔ o ciee co niaa laci-o. La tiiya pɛ, la komalnin sofɛlɛ téndóó o baa, o vana-vana cel-lɔ coo loo. La timbi ndu, mì la hin a ndu.

³¹Te vana ɲuna niaa pɛ aa: ‹Le yɛɛ nɛ niaa co yɛ ndu timbio?› La mulul ndu aa: ‹Maalii nɔ makoo a ndu ni.›»

³²Mí vanaa o vem kan-nda kɔ komal dɛnndan mɛɛ Yeesu ndóò dimul nda yɛ kpafii.

³³A lo sofɛlɛ téndé kalaa timbio, mí vanaa ɲɛ-a ɲuna nda aa: «Le yɛɛ niaa co yɛ sofɛlɛ téndé kon timbio?»

³⁴Má mulul nda aa: «Maalii nɔ makoo a ndu ni.»

³⁵Má yoo Yeesu ndu, má hɛɛnduu domala ndala bɛndulan sofɛlɛ kalaa o kɔɔ, má heelu Yeesu lecoo.

³⁶Mɛɛ o va kɔlan, mí vannda va domala ndala bɛndulan pɛngɛliaa ndu laci o nɛi.

³⁷Mí Yeesu kei o nɛi tol a ba pembii yɔmii oliviee-o. Ndóò tiiyaa Yerusalɛm ciee-lekɔɔ, mí kaandennda yiinun sɛ́lɔ́ɔ́, má va ndu kɔlan kɔɔli a ɲaaloo, má can Hala candɔɔ coocoo lengben-lengben le kaamaala ndáà ce lan kpede.

³⁸Má va dimio aa: «Biiloo co le masa co hunɔɔ o diola Mɛlɛka lan-ndo! Màá kɔlɲuloo va o halataala, mì biiloo va coocoo pɔ́!»

³⁹Mí Faliisia va o sɛ́lɔ́ɔ́ tɛɛn-nda a pum a dimul Yeesu aa: «Kɔɔfa, kpaa kaandeŋaa nɔmnda!»

⁴⁰Mí Yeesu muli aa: «Mì dimul niaa, te nda mei pɛ, powtan ndan la co yonda ni!»

⁴¹Mɛɛ Yeesu sɔɔnguu ciee-lekɔɔ, mó ca kobio, mó caŋ le ndu,

⁴²mó dimi aa: «Vannda Yerusalɛm, te niáà bɛɛ sina pɛ hau mɛɛ vana sɔla kɔlɲuloo yɛ! Kɛ o vinnun niaa, la tiwnin ba ndu cɔw le!

⁴³Palɛi dɛnɛ palɛi co niaa laci, yaamɔaa niaa co niaa hinul, mà tiila niaa, mà luei niaa o píŋndo nin, mà balu niaa nɛɛ-nɛɛ ka.

⁴⁴À co kobi niaa tɛɛmbuu a vana-vana co lenin, hali powvo pilɛ a mɛinin o pow celen coo le, kani la sina tuma Hala hin o niaa lo le niaa malaa-o le.»

⁴⁵Ndóò luɛyɔɔ o Cɛi-Hala-o nin, mó can yulaa tovɔɔ,

⁴⁶mó va nda dimullo aa: «O co o sɛvaa aa: ‹Cɛi lepiɛiyo cɛi nuu vanin ni.› Kɛ ndu niaa niaa siinguu buulula vuiya nuaa ni.»

⁴⁷Yeesu va vannda pɛɛkoo lɔ́ɔ́-lɔ́ɔ̀ o Cɛi-Hala-o nin. Kɛ bolii vanaa-solia-lasálàá, vanaa pɛɛkaa latɔŋnda a simlacia lelɛŋnda va nɛilan nuwviaa le ndu diyɔɔ.

⁴⁸Kɛ ndáà sina mɛɛ nda tosa le, kani vannda kpow a va ndu nilan yaŋɔɔ ɲɛkɛndɛi.