Read Kissi Luke 20 Bible Online

Luke 20 - Kissi bible

Luke 20

¹Paale pilɛ, mɛɛ Yeesu va vannda pɛɛkoo o Cɛi-Hala-o nin, mó va nda cɔmndo a Masale Hala len o kɔɔ. Mí bolii vanaa-solia-lasálàá, vanaa pɛɛkaa latɔŋnda a kaasoŋaa kɔlkalua lelɛŋnda hun,

²má ɲuna ndu aa: «Dimul naa, nɛ̀ɛ́-nɛ̀ vem yɛ nɔm dɛnndan ndan tosaa? Nɛ̀ɛ́ ke yɛ nɔm di kon?»

³Mí Yeesu mulul nda aa: «Ya bɛɛ i co niaa ɲuna:

⁴Yinɔɔ Nsaŋ va vannda-o, Hala óò vem ndu ni bàà vanndacieea?»

⁵O kon má yɔngan yiyanndan vellaa-velle, má dimi aa: «Te n muli pɛ aa ‹Hala vem ndu ni›, o co naa ɲuna aa: ‹Kɛ le yɛɛ nɛ niaa kɛɛ yɛ niko ndu laalan?›

⁶Kɛ te n muli vɛlɛ pɛ aa: ‹Vanndacieea vem ndu ni›, vannda kpow a co naa vii a powtan, kani a sina maa vana-tɛɛngaa-diom Hala-o Nsaŋ yɔŋnun ni.»

⁷O kon má kɔ mulul Yeesu aa a sina vana vem ndu vannda yinɔɔ-o le.

⁸Mí ndu bɛɛ dimul nda aa: «Mɛɛ ya bɛɛ, i cɔmnin niaa vana vem ya dɛnndan ndan tosaa-o le.»

⁹O kon kɔɔli, mí Yeesu dimul vannda taloo aa: «Langbanɔɔ pum tɔl nakɔ n'rɛsɛnndo ni, mó sɔɔa vanaa tósà baalaa o nakɔ n'rɛsɛnndo nin-nda nakɔ kon o ba. O kon kɔɔli, mó kɔannun kelaa o lɛŋnde celen nin le telen vilɛi.

¹⁰Telen kiandaa tiiyaa, mó viam buɛi ndɔɔ o pilɛ o vanaa tósà baalaa o nakɔ n'rɛsɛnndo nin-nda lo haliko mi ndáà ke ndu tɔnɔ fula o nakɔ kon nin-ndo. Kɛ mí vanaa tósà baalaa o nakɔ n'rɛsɛnndo nin-nda lɔaa ndu, má mingi ndu bala fondo.

¹¹Mó viam vɛlɛ buɛi celen. Má lɔaa vɛlɛ kon, má tɛɛmbuu ndu bɛ̀ɛ̀lan, má mingi bala fondo.

¹²Mó viam vɛlɛ buɛi yàándɔɔ. Má booluu kon, má toaw ndu.

¹³Mí vana nakɔɔ dimi aa: ‹Vɛ̀ɛ̀ ya co yɛ hee biyɔɔ? I co po ni kaolaa vomɔɔ, bɔɔle ma ke ndu bɛɛlen.›

¹⁴Kɛ vanaa tósà baalaa o nakɔ n'rɛsɛnndo nin-nda cɔu ndu, má dimulan vellaa-velle aa: ‹Vana nɔ kɛ́ɔ-vo co hoo ni. N diinun ndu haliko mi kɛ́ɔ lo le naa.›

¹⁵O kon má toaw ndu o nakɔɔ kɔɔli, má dii ndu. Vɛ̀ɛ̀ vana nakɔɔ tosa yɛnin a nda?

¹⁶O hunnin, mò diw vanaa tósà kan baalaa o nakɔ n'rɛsɛnndo nin-nda, mò sɔɔ nakɔɔ vanaa celen o ba.» Mɛɛ nda tuei lende, má dimi aa: «Màá i yɔŋnun lende le!»

¹⁷O kon mí Yeesu tofa nda ciŋ, mó ɲuna nda aa: «Kɔlɔ yɛɛ sɔɛi co hee isɛvaa-e nɔ yɛ aa: ‹Pow vanaa tangulaa cɛiya viow-vo, pow kon siŋnun pow lebollo ni?›

¹⁸Vana-vana del pɛ o pow kon coo, o yomiyomi, vana-vana pow kon del pɛ coo, o cui ndu.»

¹⁹Fɔ́ɔ́fɔ̀, mí vanaa sɛvaa latɔŋnda a bolii vanaa-solia-lasálàá can nɛilan nuwviaa le ndu biyɔɔ. Kani má bii bila maa le nda ndóò dimi tale kon ni. Kɛ mí siòònde bii nda a vannda.

²⁰O kon ma va Yeesu hɔlten kɔɔli, má viam vannda, mí vanaa kan tosa maa a kɔlta ndalan kpeekpei ndáà kɔɛ ni. Ndáà yeema mì ndáà tosa, mì Yeesu ndóò biinun a sondo, o kon mì ndáà kɔ lɔlu ndu o vanaa kialaa n'yamaa a o simlacia lelɛŋnda lo.

²¹Má ɲuna ndu aa: «Vana bɛndoo, n sina maa o sandei nin n co sɔɛi le vannda pɛɛkoo ni, a co vana-vana tofa le, o toɲaa coo n co vannda sɔɛi Hala-e pɛɛkoo ni.

²²Lelan dimul naa, vɛ̀ɛ̀ o bɛnda pá mì n mal muloo Sesar muloo o ba?»

²³Kɛ le tùú Yeesu ndóò sina kɔlkalu nda vɔɔndo-o, mó mulul nda aa: «La cɔm ya volii támái.

²⁴Hɔlaa nɛ̀ɛ́ a diola nɛ̀ɛ́ la co yɛ lan lecoo?» Má muli aa: «Sesar ni.»

²⁵O kon mó dimul nda aa: «Mɛɛ la mingul Sesar ɲɛ co le Sesar-o, mì la mingul Hala ɲɛ co le Hala-o.»

²⁶A nɔla ndu biyɔɔ o sɔɔn ndɔn nin vannda o hɔl te. Mí kɔndɔfillo bii nda a muli ndɔɔ, má mei.

²⁷Mí Sadusea, a va dimio maa vanvílɛ́iya tendulnin te-a, a hun ɲuna Yeesu aa:

²⁸«Kɔɔfa, ɲɛ Moise sɛval naa-o co hoo ni aa: Te vanndo vi pɛ, mò mɛi lanɔɔ, kɛ mò mɛi hɔ́ɔ́ le, puapilɛ vana kon bɛnda mò loo lanɔ kon, mò koma vilul vana vi kon-ndo cuawva.

²⁹Nduyɛ puapilɛa pum a va nda ŋɔmmɛw. Mí o tasoo yil lanɔɔ, mó vu, o mɛi hɔ́ɔ́ le.

³⁰Mí o diinndɔɔ loo ndu, o kon kɔɔli o yàándɔɔ.

³¹Mí ɲɔɔ kɔa lende puapilɛa ŋɔmmɛvaa kan tɛɛn, má vu, a mɛi hɔ́ɔ́ le.

³²O nda kɔɔli, mí lanɔ kon bɛɛ vu.

³³O tendul vanvílɛ́iya, lanɔɔ nɛ̀ɛ́ cua kon va yɛnin? Kani o kei vanaa ŋɔmmɛvaa kan kpow o ba o nɔu.»

³⁴Mí Yeesu mulul nda aa: «Vanpiaandua co vanlaandua yilɔɔ o nɔlan o ceendo ho coo nanu.

³⁵Kɛ vanaa Hala ke dio le tendullo fulaa ciee-piɔ́m, mà luɛi o ceen co hunɔɔ-o nin-nda, nda yilnin n'laandu le, a celnin o lanɔ le.

³⁶A vi lɛnin te, kani maa mɛlɛkaa nda vanin ni. Poaa Hala-a nda vanin ni, le tùú nda tendulnin mà muungu yoomu-o.

³⁷Le tendul vanvílɛ́iya, Moise cɔm sɔɛi ken kpendekele a dɛnɛ bɔɔ leyinndo o kɔɔ, telen o veelu Mɛlɛka aa: ‹Hala Abraham-ndo, Hala Isaak-o a Hala Yakɔb-o-o pɛɛn.›

³⁸Nduyɛ Hala co Hala n'vanvílɛ́i le, kɛ Hala vanaa yoomaa o co ni. Kani le ndu, vannda kpow a co yoomu.»

³⁹O kon mí vanaa pɛɛkaa latɔŋnda pum dimul Yeesu aa: «Vana bɛndoo, a caa sɔɛi dɛ.»

⁴⁰Nduyɛ, vana-vana tɔɔndan-ndɛ mò ɲuna ndu ɲuna celen te.

⁴¹O kon mí Yeesu dimul nda aa: «Le yɛɛ vannda co yɛ dimio maa po David-o Krista co ni?

⁴²Kani o sɛbɛ Condun Lisaa nin, mí David pila dimi aa: ‹Mɛlɛka dimul Maalii nuu aa: Cal-la o ba kɛndɔɔ coo,

⁴³háá mì siinguu yaamɔaa nɔmnda ɲɛ nɔm kɛsiaa n'peloo.›

⁴⁴Nduyɛ, David pila veelu ndu aa: ‹Maalii›, vɛ̀ɛ̀ o nɔla yɛ vɛlɛ ò va po ndɔɔ?»

⁴⁵Telen vannda kpow a va Yeesu nilan yaŋɔɔ-o, mó dimul kaandeŋaa ndɔa aa:

⁴⁶«La mandan a vanaa pɛɛkaa latɔŋnda. À yeema kelaa a domala bɛndulan lekɔɔ. À ɲɔɔ hɛ́nàn le vannda vaa keiyo nda yilɔɔ o bɛ́ɛ̀la bɛndulan-nda. À yeema vɛlɛ calle o kpɛŋɛla taselan coo o cɛila lekaanndan nin a o fondala taselan o ɲɛdiaa kafoo.

⁴⁷Nda poondiàà ɲɔɔn vanlaandua piaandaa ndaa vi-a o ba ni, mà bɛndi piɛilen, haliko mi vannda ce maa a naŋ. Lelan, Yamɛi ndɛi kiandunin dɛ.»