Read Kissi Luke 5 Bible Online

Luke 5 - Kissi bible

Luke 5

¹Paale pilɛ, Yeesu va isisi o dalaa Kenesarɛt kɔngɔ, mí vannda balu ndu sɔ́, a va sɔŋisɔŋianndo le sɔɛi Hala-e nilan yaŋɔɔ.

²Mí Yeesu ca dɛ̀ndɛ̀la mamɛnndan tan tiɔn o dala kon kɔngɔ. Vanaa yɔɔyaa ndáà fula lenin-nda va yalala ndalan tɔɔ.

³Mó luɛi o dɛ̀ndɔ̀ɔ́ pilɛ nin, dɛ̀ndɛ̀ Simɔn-ndo pɛɛn, mó dimul Simɔn maa o faŋan kɔngɔɔ mò kɔɛ ɲɛ-pɔmbɔ o mɛnndan coo. O kon kɔɔli, mí Yeesu cal o dɛ̀ndɔ̀ɔ́ nin, mó va vannda pɛɛkoo.

⁴Mɛɛ o cii sɔɛi, mó dimul Simɔn aa: «Kɔ a dɛ̀ndɔ̀ɔ́ nɛɛ mɛnndan ma yingila-a, mì la vuu yalala niaalan le yɔɔyaa.»

⁵Mí Simɔn mulul ndu aa: «Vana bɛndoo, ciɛi icɔl pii sangaa naa n lɔl ni, n cue ɲɛ-ɲɛ le. Kɛ le mɛɛ n dimi yɛ, i co yalalan vuu.»

⁶O kon, má vuu yalalan, má cua suwva taw-taw, mí yalala ndala lan la kandu sɛɛsiaa.

⁷Má veelu caaŋaa ndaa va o dɛ̀ndɔ̀ɔ́ pilɔɔ nin-nda a laba, haliko mi ndáà mala nda. Má hun, má pei dɛ̀ndɛ̀la tiɔnnda lan cá-cá, mí la kandu mɛɛyaa.

⁸Mɛɛ Simɔn Piɛr ce ɲɛ yɔŋnun-ndo, mó del Yeesu o labɛngunin, mó dimul ndu aa: «Maalii, vana lahakio ya co ni, lelan faŋan ya ikɛi.»

⁹Kani mí siòònde bii Piɛr nda vanaa va ndu ikɛi-ya kpow le suvaa nda cua taw-va.

¹⁰Mí siòònde bii vɛlɛ caaŋaa ŋiɔŋa Simɔn-nda, Nsaki nda Nsaŋ, poaa Sebede-a pɛɛn. Kɛ mí Yeesu dimul Simɔn aa: «Yɔŋ isiòòn te, kani o hau kɔɔli, vana yɔɔyaa n'vanndaciee-o n vanin ni.»

¹¹O kon, má heelu dɛ̀ndɛ̀la ndalan o kɔngɔ, má mal dɛnndan kpow, má del Yeesu kɔɔli.

¹²Telen Yeesu va o kobio pum nin-ndo, mí langbanɔɔ pum hun a nàà siaŋaa ndu kɔɔlen kpow. Mɛɛ o ce Yeesu, mó del ndu o labɛngunin, mó ɲɔɔlu ndu aa: «Maalii, taa cɛl pɛ, a nɔla mà singi ya.»

¹³Mí Yeesu siɛndi baa, mó pilan ndu, mó dimi aa: «I cɛl, siongu.» Fɔ́ɔ́fɔ̀, mí naa kon mal ndu.

¹⁴O kon kɔɔli, mí Yeesu sila ndu aa: «Dimul vana-vana ɲɛ yɔŋnun-ndo le. Kɛ kɔ o vana-solia-lasálàá lo, mò mɛɛndian nɔm, mà soli sálà co le dindinndo-o mɛɛ Moise dimi yɛ, haliko mi kon va seilen le nda.»

¹⁵Kɛ mí tɔ́ɔ́ ndɔɔ cɔɔlu sɛŋin, mí vannda cuungian sɛ́lɔ́ɔ́ le ndu nilan yaŋɔɔ a le nda singio a naala ndalan.

¹⁶Kɛ Yeesu va kɔlan o fondala yililan lapum nɛɛ o va Hala piɛiyo-a.

¹⁷Paale pilɛ, Yeesu va vannda pɛɛkoo. Faliisia a vanaa pɛɛkaa latɔŋnda va icali, fulaa o cieon va Kalile, Yuda a Yerusalɛm-ndon nin kpow. Kpaaya Mɛlɛka-o va Yeesu nin, mó va vanaa lanàá singio.

¹⁸Mí vannda pum a hun a vana falun vílɛ́iyo o ɲɛ hinia coo. A va nɛilan nuwviaa le ndu lueiyo cɛinin mì ndáà kɔ yambu ndu Yeesu o hɔl.

¹⁹Kɛ a sina nɛɛ nda kei le luɛyɔɔ a ndu-a le, kani sɛ́lɔ́ɔ́ va taw. Má hel o yindɔɔ coo, má tuisi ndu o ɲɛ hinia ndɔɔ coo.

²⁰Mɛɛ Yeesu ce laalan ndaa, mó dimul langbanɔ kon aa: «Hakila nɔmndan la malnun haki.»

²¹Mí vanaa pɛɛkaa latɔŋnda a Faliisia a kandu yiyanndo aa: «Vana súú yɛɛ co yɛ ho sɔɔn tanan dimio a Hala o kɔɔ? Ɔ́ɔ̀ vana tiwba mò mal vana haki-o, te o co Hala ndu pilɛ kpé le?»

²²Yeesu sinaa yiyannda ndalan, mó cua sɔɛi, mó ɲuna nda aa: «Le yɛɛ niaa co yɛ yiyanndo o kɔlta niaalan nin lende?

²³Ɔ́ɔ̀ o hiow va bɛɛn-bɛɛn-ndo? Vana falun vílɛ́iyo dimullo aa: ‹Hakila nɔmndan la malnun haki› baa ndu dimullo aa: ‹Cɔn, cua ɲɛ nɔm hinia mà kɔɛ›?

²⁴Nduyɛ, mɛɛ mì la sina maa Po vanacieo nɔ kpaayaa o lɛŋnden coo, o ó mal vannda haki-o pɛɛn. O kon, mó dimul vana falun vílɛ́i kon aa: ‹Cɔn, cua ɲɛ hinia nɔmndo mà kɔɛnnun o nɔm ndo.›»

²⁵Fɔ́ɔ́fɔ̀, mí vana kalaa can nda o hɔl, mó cua ɲɛ o va ihini coo-o, mó kɔannun o ndu lo bɛɛ a Hala biiloo.

²⁶O kon mí kɔndɔfillo bii vannda kpow, má candu Hala. Mí siòònde bii nda taw, má dimi aa: «N ce hau dɛnnda naa n dema cɔ le lan.»

²⁷O kon kɔɔli, mí Yeesu fula, mó ca vana biyaa muloo, diolan Levii, o va icali nɛɛ biyaa mulua. Mí Yeesu dimul ndu aa: «Del-la kɔɔli.»

²⁸Mí langbanɔɔ can, mó mal dɛnndan kpow, mó del Yeesu kɔɔli.

²⁹Mí Levii tuisi kafo bɛndoo o ndu lo bɛɛ, vanaa biyaa mulua bɔɔ-bɔɔ a va lon. Vanaa celen a va vɛlɛ lon, ma va ɲɛdiaa dioo nda ndaa.

³⁰Mí Faliisia a vanaa ndaa pɛɛkaa latɔŋnda soaa sɔɔn pɔmbɔn, má ɲuna kadeŋaa ndɔa aa: «Le kɔlɔ yɛɛ niaa co yɛ dioo mì la va kolɔɔ niaa vanaa biyaa mulua a vanaa lahakia latulu?»

³¹Mí Yeesu cua sɔɛi, mó mulul nda aa: «O co vanaa co kɛndia-a le nɔ makoo a dɔtɔlɔnɔɔ le, kɛ vanaa lanàá.

³²O co vanaa sandaa le ya hin veelu le, kɛ vanaa lahakia, haliko ma mal yɔŋ vɔɔndo, ma mangalan.»

³³Mí Faliisia dimul Yeesu aa: «Kaandeŋaa Nsaŋ-nda co sumndo biyɔɔ cuɛi-cuɛi ma va Hala piɛiyo, a naa bɛɛ co kon tosaa. Kɛ a nɔmnda yɛ, a co dioo ma va kolɔɔ.»

³⁴Mí Yeesu mulul nda aa: «Telen vana yil lanɔɔ sɛnɛi-yo co caaŋaa ndɔa ikɛi-yo, vɛ̀ɛ̀ la nɔla pá caaŋaa ndɔa kan dimul ma bii sumndo?

³⁵Kɛ palɛi pum co hunɔɔ tiiya, mì vana vuɛɛn sɛnɛi kon faŋan nda ikɛi. O kon, mà bii sumndo.»

³⁶Mó dimul nda vɛlɛ taloo aa: «Vana sɛɛsa doma sɛnɛiyo pɛngɛi, mà baŋul tɛɛngei o doma paandoo a pɛngɛi ken te. Te vana tosa yɛ pɛ lende, mɛɛ o tɛɛmbuu doma sɛnɛiyo, kani pɛngɛi doma sɛnɛiyo bɛndanin o doma paandoo le.

³⁷Vana vow mɔima sɛnɛiyan o bɔlɔla yáwla paandulan nin te. Te vana tosa yɛ pɛ lende, ma hel, bɔlɔla lan la piɔndi, ma coŋ, bɔlɔla lan bɛɛ la tambu.

³⁸Kɛ o bɔlɔla yáwla sɛnɛilan nin vana vow man ni.

³⁹Vana-vana cii pɛ mɔima paanduan kolɔɔ, o yeema lɛ yɛngian te, kani nuaa o dimi ni aa: ‹Ma paanduan ma hiow naŋɔɔ ni.›»