Read Kissi Luke 6 Bible Online

Luke 6 - Kissi bible

Luke 6

¹O paale pɛngiaalen le pum coo, Yeesu va keiyo o ciɛi n'malle pum nin, mí kaandeŋaa ndɔa va yasala n'maltan kilio, má va lan ciimiaa o laba, má va kullon dioo.

²Mí Faliisia pum ɲuna nda aa: «Le yɛɛ nɛ niaa co yɛ ɲɛ kuunan o paale pɛngiaalen coo-o tosaa?»

³Mí Yeesu mulul nda aa: «Vɛ̀ɛ̀ la dimi vɔ ɲɛ David nda vanaa va ndu kɔɔli-a tosa telen yiaan ma va nda nɛiyo-o o sɛbɔɔ nin te?

⁴Ndóò luɛyɔɔ o Cɛi-Hala-o nin, mó cua bulu va o kɛsiaa landɔ le Mɛlɛka-o, mó dia, mó ke vanaa va ndu kɔɔli-a o pum. Nduyɛ, o bɛnda mì vana-vana óò de ndu le, fɔ vanaa-solia-lasálàá.»

⁵Mó dimul nda vɛlɛ aa: «Po vanacieo co paale pɛngiaalen bollen ni.»

⁶O paale pɛngiaale celen coo, mí Yeesu luɛi o cɛi lekaando nin, mó va vannda pɛɛkoo. Langbanɔ ba kɛndɔɔ ndóò vi-o pum va lon.

⁷Nduyɛ, vanaa pɛɛkaa latɔŋnda a Faliisia va mɛɛndanndo le sinaa te Yeesu ndóò singinin o paale pɛngiaalen coo, haliko mi ndáà sɔla tale nda kɔɔsal ndu len.

⁸Kɛ mɛɛ o sina yiyannda ndala lan, mó dimul vana ba vílɛ́i kon aa: «Cɔn ma sim vannda kpow o hɔl nanu.» Mí langbanɔɔ can, mó sim.

⁹Mí Yeesu ɲuna nda aa: «I co pá i cɛlnan le dɛnɛ kɛndɔɔ te kon te dɛnɛ vɔɔndo tosaa o paale pɛngiaalen coo, le vanndo ciindiaa te kon te le ndu malɔɔ mo vi?»

¹⁰O kon, mó keela nda hɔlten coo, mó dimul vana ba vílɛ́i kon aa: «Siɛndi baa!» Mí vana kon siɛndi baa, mí ba ndɔɔ siangun.

¹¹Kɛ mí vanaa pɛɛkaa latɔŋnda a Faliisia tambu kɔl taw, má kandu ɲuunianndo le ɲɛ nda tosa a Yeesu-o.

¹²O telen kon, mí Yeesu kɔa o pembei coo le piɛilen, mó lɔl Hala piɛiyo pii.

¹³Ɲɔɔ tengaa, mó veelu kaandeŋaa ndɔa, mó hɛli n'van tɔ́ a vanaa ŋiɔn, mó ke nda diolan aa kiilaa.

¹⁴Nda yɔŋnun haa ni: Simɔn, o Yeesu ke diolan aa Piɛr-o, Andre puapilɛ ndɔ, Nsaki, Nsaŋ, Filipe, Bartelemi,

¹⁵Matie, Tomas, Nsaki po Alfee-o, Simɔn o ndáà veelu aa Selɔte-o,

¹⁶Yuda po Nsaki-o a Yuda Iskariɔt, o mal Yeesu vannda o ba-o.

¹⁷Mí Yeesu toal pembei a kaandeŋaa ndɔa, mó sim o dɛngbɔɔ nin. A va sɛ́lɔ́ɔ́ taw, vanaa celen va vɛlɛ lon sɛ́lɔ́ɔ́ fulaa Yuda, Yerusalɛm, a vanaa fula Tir a Sidɔn o mɛmma bɛnduan kɔngɔ-a.

¹⁸Ndáà hin le ndu nilan yaŋɔɔ a le sioŋɔɔ sɔlaa a nààla ndalan. Mó singi vɛlɛ vanaa ɲina vɔɔndo va kɔɔli-a.

¹⁹Vannda kpow a va kindinndo le ndu pilanndo, kani kpaayaa pum va ndu fulaa o n'dial mo va nda singio.

²⁰Yeesu keeliaa kaandeŋaa ndɔa hɔlten coo, mó dimi aa: «Dɛnɛ kɛndɔɔ co le niaa vanaa bala fondoa, kani masale Hala len le co le niaa.

²¹Dɛnɛ kɛndɔɔ co le vanaa yiaan ma co nɛiyo sunsun-nda, kani la pumnin. Dɛnɛ kɛndɔɔ co le niaa co caŋndo sunsun-nda, kani la dɔawnunnin ɲaale.

²²Dɛnɛ kɛndɔɔ co le niaa, telen vannda nɔnin nɛyɔn niaa, mà kɛɛ niaa, mà va niaa yeowlan, mà kela a niaa o lasonndo le tùú niaa laalan Po vanacieo-vo.

²³La dɔwnun ɲaale paale len mì la deŋi a kɔlkɛndɔɔ, kani vɔ̀ngɔ̀ niaa vanin o bɔɔ o halataala. Kani lende koni fuɲaa ndaa a va tosaa a vanaa-tɛɛngaa-diom Hala-a ni.

²⁴Kɛ dangaa co le niaa vanaa bolofaa, kani la cii nin dɛnɛ kɛndɛ niaa sɔla!

²⁵Dangaa co le niaa co pumndo sunsun-nda, kani yiaan ma nɛinin niaa. Dangaa co le niaa co mamɔɔ-a, kani mɔnɛi biinin niaa mì la can.

²⁶Dangaa co le niaa, te vannda kpow a va pɛ sɔɔn nian kɛndɔn dimio, kani lende fuɲaa ndaa mamaa va dimio a vanaa-tɛɛngaa-diom Hala-a lacòòvaa ni.»

²⁷«Kɛ mì dimul niaa, niaa vanaa co ya yaŋnɔnndo-a: La kaola yaamɔaa niaa, la tosal vanaa co nɛyɔnndo a niaa-a dɛnɛ kɛndɔɔ,

²⁸mì la dɔw vanaa co niaa mɛɛniaa-a duaa, mì la piɛi Hala le vanaa co niaa saangiaa-a.

²⁹Te vanndo lɔɔ nɔm pɛ kpaŋnde, a mulul ndu vɛlɛ ipilɛi. Te vanndo cua pɛ doma nɔm bɛndoo, kuuna ndu o lebɛngoo cuaa le.

³⁰Vana-vana piɛi nɔm pɛ, a yɔngu ndu. Vanndo cua pɛ ɲɛ nɔmndo, ɲuna ndu le nɔm ndu mingul te.

³¹O niaa yeema mì vannda tosal niaa-o, niaa bɛɛ la tosal nda lende.

³²Te la kaola pɛ vanaa kaola niaa kínɛí, balika kuɛɛ niaa sɔ̀là yɛnin o kon nin? Kani vanaa lahakia bɛɛ a kaola vanaa kaola nda-a.

³³Te la tosal pɛ vanaa co niaa dɛnɛ kɛndɔɔ tosallo-a dɛnɛ kɛndɔɔ, balika kuɛɛ niaa sɔ̀là yɛnin o kon nin? Vanaa lahakia bɛɛ, lende koni nda tosa ni.

³⁴Te la dɔnda pɛ vanaa niaa laalan maa a mingulnin niaa-a, balika kuɛɛ niaa sɔ̀là yɛnin o kon nin? Kani vanaa lahakia bɛɛ, vanaa mingulnin nda-a nda dɔnda ni.

³⁵Kɛ la kaola yaamɔaa niaa, mì la tosa dɛnɛ kɛndɔɔ, la dɔnda vannda, la yiyan le niaa mingul te. O kon, vɔ̀ngɔ̀ niaa vanin o bɔɔ, la siŋnunnin vɛlɛ Poaa O Hiow-Ɲɔɔn-Kpow-vo, kani vana kɛndɔɔ o co le vanaa sina ikɛndɛ le-a a le vanaa vɔɔnda ni.

³⁶La va vanaa iɲííya mɛɛ Fuɲa niaa co vana iɲííyo yɛ.»

³⁷«La kialu yamɛi vana le, haliko yamɛi kilun niaa le. La yaala vana le, haliko vana yaala niaa le. La mal caanda haki, haliko mi niaa bɛɛ sɔla hakio malɔɔ.

³⁸La ke caanda, haliko mi niaa bɛɛ sɔla o keo. A tuululnin niaa ɲɔɔn ɲɛkɛndɛi o bɔlɔla domala niaalan nin. Hiiluu, mà diŋila, mì n coŋ, kani o ɲɛ niaa co tuuvo nin-ndo nin nda tuulunin niaa ni.»

³⁹Mí Yeesu dimul nda vɛlɛ taloo aa: «Vɛ̀ɛ̀ vana sumɛiyo nɔla pá mò biilul vana sumɛiyo tindaa? O co o soondo nin te nda ŋiɔn kpow a delnin te?

⁴⁰Kaandennɔɔ hiw vana ndɔ bɛndoo le, kɛ kaandennɔ oo kaandennɔ pɛɛku pɛ, ndu tiwba mò va maa vana ndɔ bɛndoo.

⁴¹Le yɛɛ nɛ n co yɛ bilte co puapilɛ nɔmndo o hɔl-ten tofaa, a dow yɔm ipɛngɛ co nɔm o lehɔl-lo taasi le?

⁴²Vɛ̀ɛ̀ n dimul-lɛnin puapilɛ nɔmndo aa: ‹Puapilɛ nuu, mɛi-yɔ mì soli nɔm bilten o lehɔl›, te a co yɔm ipɛngɛ co nɔm o lehɔl-lo cɔ le? Nɔm vana muuluanndo ho, solin-ndɔ fɔlɔn yɔm ipɛngɛ co nɔm o lehɔl-lo, o kon mà ce válán le bilte co puapilɛ nɔmndo o hɔl-ten solio.»

⁴³«Yɔm kɛndɔɔ kum komɔɔ vɔɔndo le, lende koni, yɔm vɔɔndo bɛɛ kum komɔɔ kɛndɔɔ le.

⁴⁴O komɔɔ vana sina yɔmnde súúlan ni. Vana kendu vooson o yɔm n'yɔɔ le, vana kendu vɛlɛ rɛsɛnndon o siɛmbullo le.

⁴⁵Sɔɔn kɛndɛn co vanaciee kɛndɔɔ o kɔl-lon, mun o soli ceen ni. Sɔɔn vɔɔŋun co vana vɔɔndo o kɔl-lon, mun koni ndu bɛɛ soli ceen ni. Kani ɲɛ pia vana o kɔl-lo, ndu sondoo dimi ni.»

⁴⁶«Le yɛɛ niaa co yɛ ya veeloo aa: ‹Maalii, Maalii›, la co ɲɛ ya co niaa dimullo-o tosa le?

⁴⁷Vana-vana del pɛ ya kɔɔli, mò tuei sɔɔn nun, mò kela lecoo, i cɔmnin niaa velan ndɔɔ.

⁴⁸O co macoaa maa langbanɔ co cɛiyo tangullo-o. Ndóò tovɔɔ soondo ɲɛkɛndɛi, mó kila ndu o pow bandíláà coo. Mí mɛnndan ma hun, mí kongilan la lɔaa cɛi kalaa, ma nɔla ndu kombaa le, kani ndóò caa tangulɔnndo.

⁴⁹Kɛ vana-vana tuei pɛ sɔɔn nun, mò kela lecoo le, ndu vel langbanɔ baŋ cɛiyo o lɛŋnde bɔ́wlen coo, o kila ndu tum too. Kongilan láà lɔɔ ndu dɔ́ɔ́, mó komba, mó tambu kpow.»