Read Kissi Luke 7 Bible Online

Luke 7 - Kissi bible

Luke 7

¹Lɔ́ɔ́ Yeesu cii vannda sɔɔn mun kpow dimul-lo, mó muungu Kapɛrnaim.

²Vana baala simlacinɔ vanaa cɔvaa kɛmɛa pum va lon a nàà piɔ́mndo, o simlacinɔ kon ndóò handu kɔllo coo taw-vo.

³Mɛɛ o tuei Yeesu tɔ́ɔ́, mó viam kaasoŋaa kɔlkalua Yuifia le ndu tɛɛlɔnndo haliko mo kɔ singi vana baala ndɔɔ.

⁴Mɛɛ nda tiiya o Yeesu lo, má baŋnun ndu tɛɛlɔnndo aa: «Yandi, tosal ndu kon,

⁵kani o kaola lɛŋnde naalen, ndu baŋ vɛlɛ cɛi lekaan naa ni.»

⁶O kon, mí Yeesu bii nɛiyo le kɔlan nda kɔɔli. Kɛ mɛɛ nda sɔɔnguu o cɛi ndɔɔ ikɛi, mí simlacinɔ kon viam caaŋaa ndɔa le kɔlan Yeesu dimullo aa: «Maalii, sanga tiiya nanu le, kani i co o sɔvɛ ma luɛi o ya lo cɛinin te.

⁷Lelan bɛɛ ya pila kɛɛ nɔm komal ni. Kɛ diomnden bɛɛ n dimi ni, vana ni baalaa co siongɔɔ.

⁸Kani ya co hoo-o bɛɛ, masalen le nɔ ya baa coo. Vanaa cɔwva co ya o ba. O ya dimul pɛ aa: ‹Kɔ›, o kɔɛ. I dimul pɛ o pilɔɔ aa: ‹Hun›, o hin. I vem pɛ buɛi nuu le ikɛ́-kɛ̀ tosaa, o tosa.»

⁹Yeesu tueyɔɔ sɔɔn mun, mí ɲɔɔ hɛnan ndu taw a langbanɔ kon, mó mulin, mó dimul sɛ́lɛ́ va ndu kɔɔli-o aa: «Mì dimul niaa, hali Israɛl, i komal vana nɔ laalan bɛndu vaa nuaa le.»

¹⁰Vanaa o vem kan-nda muungoo cɛinin, má komal buɛi va kon a naa-o kɛndia.

¹¹O kon kɔɔli, mí Yeesu kɔa o cieo pum diolan Nain. Mí kaandeŋaa ndɔa a vannda sɛ́lɔ́ɔ́ a kɔa ndu kɔɔli.

¹²Telen o tiiya o dio luɛyaa kobi kon ikɛi-yo, mí vannda a va kɔlan vana vilɔɔ kumbɔɔ. Pole pilɛle vuɛɛn pɔnɔ ndɔ vi-o va kon ni. Vanaa va o kobi kon nin-nda a va vuɛɛn kalaa ikɛi sɛ́lɛ́ bɛndoo.

¹³Yeesu cɔu ndu, mí ɲííye bii ndu a ndu, mó dimul ndu aa: «Caŋ te.»

¹⁴O kon, mó sɔɔnguu, mó pilan kesu vana vílɛ́i kon va nin-ndo. Mí vanaa va kɔlan a ndu-a sim. Mó dimi aa: «Poo sei, tiondu!»

¹⁵O kon, mí vana vílɛ́i kon cal, mó kandu sɔɛi. Mí Yeesu mingi ndu kala ndɔ o ba.

¹⁶Mí siòònde bii vannda kpow, má mel Hala balika, má dimi aa: «Vana-tɛɛngaa-diom Hala kaamaa hin o naa lo», má dimi vɛlɛ aa: «Hala hin vanaa ndɔa mala!»

¹⁷Mí vannda sɛŋi dɛnɛ Yeesu tosa kon-ndo o tàndá Yuda-o nin a o sɔndɔkɔltaa balu lon-ndan nin kpow.

¹⁸Mí kaandeŋaa Nsaŋ-nda kɔ hivul ndu Nsaŋ sɔɔn mun kpow. Mó veelu vanaa ŋiɔn o nda tɛɛn,

¹⁹mó viam nda o Maalii lo le ndu ɲunaa aa: «Vɛ̀ɛ̀ nɔm co vana naa n tuei tɔ́ɔ́ le hunɔɔ-o ni baa o bɛnda mì n cum o celen?»

²⁰Vanaa kan tiiya o Yeesu lo, má dimul ndu aa: «O nɔmndo Nsaŋ vem naa ni, aa naa ɲuna nɔm aa: ‹Nɔm co Vana co hunɔɔ-o ni baa o bɛnda mì n cum o celen?›»

²¹Yeesu va vanaa lanàà bɔɔ-bɔɔ singio o telen kon, namtaa a vanaa ɲina vɔɔndo va kɔɔli-a, mí vanaa ve cɔ le-a taw a ca.

²²O kon kɔɔli, mó mulul kiilaa Nsaŋ vem kan-nda aa: «La kɔ dimul Nsaŋ ɲɛ niaa ce mì la tuɛi-yo: vanaa sumɛiya co cɔu, namtaa co kɔlan, vanaa nàà siaŋaa co siongɔɔ, vanaa nila baŋulɛiya co tueyɔɔ, vanvílɛ́iya co tendullo, Yoongu Kɛndɔɔ co vanaa bala fondoa tiiyalanndo.

²³Dɛnɛ kɛndɔɔ co le vana melnin laalan ndɔɔ le ya loo.»

²⁴Telen kiilaa Nsaŋ vem-nda faŋan-ndo, mí Yeesu soaa o vannda lo a Nsaŋ o kɔɔ aa: «Yɛɛ niaa kɔɛ yɛ tofa o lɛŋnde veselɛilen nin? Kpɛ̀ndɛ̀le hoeiye biiŋuu len te niaa kɔɛ tofa le?

²⁵Kɛ yɛɛ kpeekpei niaa kɔɛ yɛ tofaa? Mò va maa langbanɔ vownun volɔɔla cuɛinannda sɔvɛlan-ndo ni? O cɛila masaa nin vanaa vownun volɔɔla sɔvɛlan, ma va o dɛnɛ kɛndɔɔ nin-nda co ni.

²⁶Yɛɛ nɛ niaa kɔɛ yɛ niko tofaa? Mò va maa vana-tɛɛngaa-diom Hala-o ni? Mì dimul niaa, o hiow bɛɛ vana-tɛɛngaa-diom Hala.

²⁷A ndu o kɔɔ o co o sɛvaa nuaa ni aa: ‹I viamnin kiila nuu, mò toosiaa nɔm nɛiyo laci.›

²⁸Mì dimul niaa, o vanaa vanlaandua velu-a tɛɛn, vana-vana tiiya maa Nsaŋ te. Nduyɛ vana hiow dɔɔnanndo o Masale Hala len nin-ndo hiow ndu.

²⁹Mí vannda kpow a tuɛi Nsaŋ diom, hali vanaa biyaa mulua bɛɛ, má ca maa nɛi Hala-o sandu, má sɔla yinɔɔ Nsaŋ o ba.

³⁰Kɛ mí Faliisia a vanaa pɛɛkaa latɔŋnda a kɛɛ ɲɛ Hala ndóò tuu le nda-o, kani a cɛl mà sɔla yinɔɔ Nsaŋ o ba le.»

³¹Mí Yeesu ɲuna vɛlɛ aa: «A vanaa kuɛɛ kpeekpeei ya tuu yɛnin vanndacieea vaalio ho? Ɔ́ɔ̀ velan ndaa?

³²A co macoaa maa cuaambɔa cal o bɛ́ɛ̀ fal, ma va veelanndo vellaa-velle-a aa: ‹N hɔŋ sɛ̀ŋden, kɛ la yi le! Mí n soli condun biision, kɛ la ceŋ te!›

³³Nduyɛ Nsaŋ Vana-yinaa hunɔɔ, o ve bulu dio le, o ve mamɔi kolɔɔ le, mí la va dimio aa: ‹Ɲina vɔɔndo co ndu nin ni.›

³⁴Mí Po vanacieo hun, o va dioo a kolɔɔ. Mí la muungu dimio aa: ‹Hoo ndu dia bɔɔ, o tufu mɔiyan te, caaŋoo vanaa biyaa mulua a vanaa lahakia o co ni.›

³⁵Kɛ dɛnɛ sandaa kɔlkalu Hala-o ni le vanaa co ndu cɛlɔɔ-a kpow.»

³⁶Mí Faliisinɔ pilɛ veelu Yeesu le dioo nda ndu. Mó luɛi o Faliisinɔ kon-ndo cɛinin, mó cal le dioo.

³⁷Vanalanɔ suundɛiyo pum va o kobi kon nin. Ndóò sinaa maa Yeesu co dioo o Faliisinɔɔ lo cɛinin, mó kɔa a sianio pum o ba a cuɛima cun kɛndɛan mapiaa lenin ca.

³⁸Mó kɔ sim Yeesu a makɔɔ o pelon ikɛi, mó va caŋndo, mó va Yeesu pelon liwviaa a mɛmɛan. O kon kɔɔli, mó va ndu pelun mun vɔɔsuuo a yiiŋii ndɔɛi, mó va mun vɔɛiyo, mó va cuɛima cun kɛndɛan taaliaa lecoo.

³⁹Faliisinɔ óò veelu ndu-o cɔu dɛnɛ kon, mó yiyan o kɔl ndɔɔ nin aa: «Te vana-tɛɛngaa-diom Hala-o langbanɔɔ ho ndóò va ni, o va sina vana súú cua co ndu piilianndo-o co-o, o va sina maa vana lahakio o co ni.»

⁴⁰O kon mí Yeesu cua sɔɛi, mó dimul Faliisinɔ kon aa: «Simɔn, i yeema mì dimul nɔm isɔɔ.» Mí Simɔn muli aa: «Soo, Kɔɔfa!»

⁴¹Mí Yeesu dimi aa: «Vanndo pum yɔngu vannda nda ŋiɔn volion kueo ni. N va vana pilɛ kuee volin latámán kɛmɛ leŋuɛɛnu, o pilɔɔ ndu n va ndu kuee beleŋuɛɛnu.

⁴²Mɛɛ nda ŋiɔn kpow vana-vana nɔla mun sala le yɛ, mó mal nda le kueela lan nda ŋiɔn kpow. O nda ŋiɔŋaa kan tɛɛn, o kuɛɛ hiaw yɛnin ndu kaolaa?»

⁴³Mí Simɔn muli aa: «I ce maa vana kuee ndɔɔ ndóò hiow-vo.» Mí Yeesu dimul ndu aa: «A caa muli.»

⁴⁴O kon, mó muli hɔlla a kpengii cuaa va-e, mó dimul Simɔn aa: «A ce cuaa ho? I hin o nɔm ndo, a ke ya mamɛn mì pulu n'pelu le. Kɛ ndu ndu, o pilu ya pelon a mɛmɛma ndɔan, mó vɔɔsu mun a yiiŋii ndɔɛi.

⁴⁵A demul-la ma kɔman ya le. Kɛ ndu ndu, kabi o luɛi nihau, o pɛngi pelun nun vɔɛiyo le.

⁴⁶A dow cuɛima cun kɛndɛ a o lebol te. Kɛ ndu ndu, mó dɔaw ya cuɛima cun kɛndɛan o lebol.

⁴⁷Mì dimul nɔm, kaola bɛndu o cɔm-ndo cɔm maa hakila ndɔla sɛ́lɛ́ bɛndulan la malnun haki. Kɛ vana nda mal pɛ haki ɲɛ-pɔmbɔ, ndu cɔm kaolaa ɲɛ-pɔmbɔ.»

⁴⁸O kon, mí Yeesu dimul cua kon aa: «Hakila nɔmndan la malnun haki.»

⁴⁹Mí vanaa va dioo nda ndu latulu-a va ɲuunianndo o kɔlnin aa: «Ɛ̀ɛ̀ vana súú yɛɛ langbanɔɔ ho ndu co yɛ, o co hoo vannda hakilan malɔɔ-o?»

⁵⁰Kɛ mí Yeesu dimul cuaa aa: «Laalan nɔmndo cii nɔm ciindiaa, kɔnnun a kɔlɲuloo.»