Read Kissi Tɔŋ miingua 11 Bible Online

Tɔŋ miingua 11 - Kissi bible

Tɔŋ miingua 11

¹«La kaola Mɛlɛka Hala niaa mi la bii tɔŋnda ndɔlan, silala ndɔlan a sɔɔn o dimul niaa-on le lɔ́ɔ́-lɔ́ɔ̀.

²O co poaa niaa le, kani nda sina ken te, bau a ci le. Kɛ niaa co haa nanu hau-va, la sina pɛɛku Mɛlɛka Hala pɛɛku niaa-o, o cɔm niaa bɔɔbɔɔyɛi ndɔɛi, ba ndɔ kpaayaa, yoomuma ndɔan,

³kaamaala ndɔlan a sɔɔn kɔndifilin o tosa o lɛŋnde Esipte len nin-ndon, la sina ɲɛ o tosal Faraɔnnɔɔ, o co masaa Esipte-o a lɛŋnde ndɔlen-ndo.

⁴La ce mɛɛ o soli mɔnɛ a vanaa cɔvaa Esiptea yɛ, mí la ca mɛɛ o tosa a soa ndaa a ɲɛla ɲaanannda ndala cɔlua nan-ndan yɛ. La ce mɛɛ o kpuluŋa mɛmma ihɛlma makpɛ̀ndɛ̀an nda coo telen nda va niaa tovɔɔ-o yɛ, la ce mɛɛ o tɛɛmbuu nda mó ɲumi nda le fɛɛn a fɛɛn yɛ.

⁵Niaa pila sina dɛnɛ kɛndɛ ndu Mɛlɛka tosal niaa kandɔɔ o lɛŋnde veselɛilen háá tiiya niaa o fondaa ho-o kpow.

⁶La sina mɛɛ o tosa a Datan nda Abiram yɛ, poaa Eliab-a, fulaa o polale Rubɛn-nden coo, mí lɛŋnden le tɛnda nda o labɛngunin, mí le mial nda a yungula ndalan, cɛila-kolala-toandaala ndalan a vanaa va o dúmbú pilɛ kon coo Israɛlla tɛɛn-nda kpow.

⁷A toɲa, kaamaala Mɛlɛka tosa lan kpow, mí la ca lan a lehɔl ciŋ.

⁸Lelan, la bii tɔŋnda ya co niaa hau yɔngoo lan kpow, kon tosanin ni mì la sɔla yoomuan le lɛŋnde niaa co len luɛyɔɔ nin-nden kɔlan hiɔlɔɔ.

⁹Kon tosanin vɛlɛ ni mì la viow yoomu o lɛŋnde cɔlua a tɔlɔɔlan la naŋ nin taw-taw len nin, lɛŋnde Mɛlɛka yiilu fuɲaa niaa mamaa kpemaa, mó mɛnan le nda a cuavaa ndaa imamaa len yɔngoo len pɛɛn.»

¹⁰«Lɛŋnde niaa co kɔlan luɛyɔɔ nin le len hiɔlɔɔ len, le có maa lɛŋnde Esipte le niaa cɛn nin-nden te. O lɛŋnde Esipte len nin, te niáà saŋ pɛ yɛiyon mì niáà váà ciɛɔn niaan, fɔ mì niáà pɔɔliaa mun a n'pelu[13] mɛɛ vana pɔɔliaa nakɔ lamndo nuaa yɛ.

¹¹Kɛ lɛŋnde niaa co kɔlan luɛyɔɔ nin le calle len, lɛŋnde n'pembulen a lɛŋnde ladɛɛlalen le co ni, piɔɔ sia fulaa o halataala-o co len pɔɔliaa ni.

¹²Lɛŋnde Mɛlɛka Hala niaa pila nɔ hɔlten coo len le co ni, vɔsio kandɔɔ háá cuvɔɔ, o nɔ hɔlten lecoo.

¹³Lelan, te la bii pɛ tɔŋnda ya co niaa hau yɔngoo lan, te la kaola pɛ ya Mɛlɛka Hala niaa mì la biilu ya a kɔlta niaalan kpow, a yoomu niaa kpede,

¹⁴i tuisinin piɔɔ o lɛŋnde niaalen coo a telen bɛnda-o, mì tuisil niaa piɔɔ telen vayiaalan a telen vɔɔle pɔmbɔlen, haliko mi la sɔla ɲɛdiaa taw: maalon, mɔima sɛnɛiyan a cuɛiyan.

¹⁵I tosanin mì billo pui taw o yondola niaalan nin le cɔlua niaa. La sɔlanin ɲɛdiaa ɲɛkɛndɛi, mì la va dioo a pumndo.»

¹⁶«La caa taw, yɔŋii niaa luɛi o pɔwlan nin, mì la faŋan o nɛi sandaa coo, mì la sooluu halaa celennda, mì la baŋ vulan nda o labɛngunin.

¹⁷Kani te la tosa pɛ kon, Mɛlɛka tuulu kɔl a niaa, o tuŋ niaa piɔɔ, o tuisi niaa valoo coo. Piɔɔ ve lɛnin sia le, lɛŋnden le nɛŋi lɛnin tɔlɔɔ oo tɔlɔɔ le. Kon tosan yɛ pɛ, la tamalanin le cuvɔɔ vuo o lɛŋnde kɛndɛle Mɛlɛka ke niaa len-nden nin te.

¹⁸Lelan, silala ya co niaa lan yɔngoo lan, la mandan ndan o kɔl, mì la sɛvan ndan o yoomu niaa nin di-di. La bɛnda mì la yiinun ndan o laba maa tɔɔmasele, mì la holnun ndan o n'tendu maa leponda.

¹⁹La pɛɛku cuavaa niaa lan. La soo lecoo o laniaa lo cɛinin, telen niaa vanin kɔlan kelaa o nɛi-yo, telen niaa vanin kɔlan lɔan-ndo a telen niaa cannin-ndo.

²⁰La sɛva lan o koŋnda cɛila niaalan coo a o kèédeon coo.

²¹O kon te halataala co vɔ pɛ coocoo, yoomu niaa a yoomu cuavaa niaa bandunin o lɛŋnde Mɛlɛka yiilu fuɲaa niaa mamaa kpemaa, mó mɛnan le nda keo len coo.

²²Kani te la bii pɛ tɔŋnda ya yɔngu niaa le kelaa lecoo lan kpow, te la kaola pɛ Mɛlɛka Hala niaa, te la kela pɛ o nɛila o cɔm niaa lan coo, mì la holnun ndu,

²³o hialunin vanaa-mangalaa-isɔaa co niaa laci-a lɛŋnden a ɲɔɔn o ba le niaa yɔngoo, mì la loo lɛŋnde vanaa hiow niaa sɛ́lɔ́ɔ́ a kpaayaa-a.

²⁴Fonda oo fonda niaa pila pɛ pelei, niaa nɔnin fonda kon ni. Lɛŋnde niaalen le cannin a lɛŋnde veselɛilen, mì le kɔ tiiya háá Liban, le cannin vɛlɛ a pee bɛndoo Efrate, mì le kɔ tiiya háá o mɛmma ihɛllan Mediteranee.

²⁵Vana-vana nɔlanin niaa simullo le. Maa mɛɛ Mɛlɛka Hala pila dimul niaa yɛ, lelɛŋ oo lelɛŋ niaa luɛi pɛ nin, o luei vanaa co icali lenin-nda siòòŋii bɛndu-bɛnduei, a yɔŋnun yoloma-yoloma.»

²⁶«La yaŋ nilan! I mel niaa cuan-cuaa. I kɛsi hau duaa a dangaa niaa o hɔl, mì niaa pila hɛli.

²⁷Te la bii pɛ tɔŋnda Mɛlɛka Hala niaa, la ya co niaa hau yɔngoo lan, mɛɛ la hɛli duaa.

²⁸Kɛ te la bii tɔŋnda Mɛlɛka Hala niaa le, te la faŋan pɛ o nɛi ya pila cɔm niaa hau-vo coo, mì la holnun halaa celeŋaa niaa sina le-a, mɛɛ dangaa niaa hɛli lende ni.

²⁹Lɔ́ɔ́ Mɛlɛka Hala niaa lueinin niaa o lɛŋnde niaa co kɔlan hiɔlɔɔ len nin-ndo, la bɛnda mì la dɔw duaa o pembei Karisim coo, mì la dɔw dangaa o pembei Ebal coo.

³⁰Pembun miuŋun mun, Yurdɛn leeloo n co ni, o nɛi fula a ba paalen le del-lo lekɔɔli-o, o lɛŋnde Kanannda nin, á co icali o dɛɛlaa bɛndoo Yurdɛn nin-nda, Kilkal o hɔl-ndɔ, o yáláŋii Mamre-e ikɛi.

³¹Kani o lo cɔɔlu cobe mì la taŋ peo Yurdɛn, le kɔlan lɛŋnde Mɛlɛka Hala niaa ke niaa len hiɔlɔɔ. La hialunin nden mì la cal lenin.

³²La kindin mì la bii tɔŋndan a silala ya yɔngu niaa hau lan kpow.»