Read Kissi Tɔŋ miingua 18 Bible Online

Tɔŋ miingua 18 - Kissi bible

Tɔŋ miingua 18

¹«Leviaa-solia-lasálàá a vanaa tɔ̀a fula o polale Levii len nin-nda sɔlanin kɛ́ layondo maa Israɛlaa tɔ̀a le. A ɲɛm vannda vanin yɔngoo le Mɛlɛka sálàlan solullo-on a á ɲɛm vanin le Mɛlɛka-on nda vanin baloo dɔwnɔnndo ni.

²Nda sɔlanin kɛ́ layondo puapilɛa ndaa Israɛlla tɛɛn te. Mɛlɛka co kɛ́ ndaa ni maa mɛɛ ndu pila dimul nda yɛ.

³Ɲɛm vanaa-solia-lasálàá vanin sɔlaa Israɛlla o ba-on vanin mun ni: vana-vana dii pɛ nawvo, te kon te saa le sálà kɔlɲuloo solio, o bɛnda mò yɔngu nda congoo, yaalelan a demboo[21].

⁴La bɛnda vɛlɛ mi la yɔngu nda ɲɛm tasen niaa vanin sɔlaa o valta yondolan nin-ndon: malun tason, mɔima tasean a cuɛima tasean, mì la yɔngu vɛlɛ nda yiiŋii niaa vanin kiolɔɔ saa niaa tasea lekɔɔ-e.

⁵Kani o polama niaan nin, Levii nda poaa ndɔa imamaa Mɛlɛka Hala niaa hɛli ni, haliko ma va vallo tosaa o diola ndɔlan o Cɛi-Diandaa nin le fɛɛn a fɛɛn.

⁶Te yeemɛi bii pɛ leviinɔɔ pum taw-taw le kɔlan o fonda Mɛlɛka hɛlinin le diola ndɔlan vaa biilɔnndo lon-ndo, mò faŋan o kobi o vanin icali nin-ndo nin, nɛɛ-nɛɛ o cɛn pɛ o lɛŋnde Israɛl-ten nin,

⁷mò kɔɛ le baalaa tosaa o diola Mɛlɛka Hala ndɔɔ maa puapilɛa ndɔa leviaa co va vallo tosaa lon Mɛlɛka o hɔl-la,

⁸o bɛnda mò sɔla ɲɛ mɛɛ puapilɛa ndɔa kan vanin sɔlaa yɛ kpafii. Kon fulanin o ɲɛm o vanin pisio fulaa o kɛ́ fuɲa ndɔ mel ndu-o-on nin te[22].»

⁹«Lɔ́ɔ́ niaa luɛinin o lɛŋnde Mɛlɛka Hala niaa ke niaa len nin-ndo, la tosa dɛnnda nɔɔlɛilan maa vanaa co icali lenin sunsun-nda le.

¹⁰O niaa tɛɛn, vana-vana bɛnda mò lom po ndɔɔ, te kon te cua ndɔɔ o yin te. Vana mangalaa, vana viamaa yavaa, vana soaa a loeon o kɔɔ-o, fuéinɔɔ,

¹¹mandenɔɔ, vana suukan a ɲinaa-o a vana n'vanvílɛ́iyo bɛnda mà va niaa tɛɛn te few.

¹²Kani Mɛlɛka ce bɔɔ vanaa tosa dɛnnda lan-nda vanaa nɔɔlɛi bɛndu. Le tùú vanaa co icali o lɛŋnde niaa co kɔlan luɛyɔɔ nin-nden nin-nda a yɔngun dɛnnda lan-ndo Mɛlɛka Hala niaa co lɛŋnden hiɔlɔɔ nda o ba le niaa yɔngoo ni.

¹³Lelan niaa, la va a mandaa le Mɛlɛka Hala niaa[23].

¹⁴Kani vanaa-mangalaa-isɔaa niaa co kan kɔlan lɛŋnden hiɔlɔɔ o ba-a co vanaa viamaa yavaa a mandea nilan yaŋɔɔ. Kɛ niaa, Mɛlɛka Hala niaa yeema mi la tosa dɛnɛ vaa lende le.

¹⁵O solinin vana-tɛɛngaa-diom Hala-o niaa tɛɛn maa ya Moise, o puapilɛa niaa tɛɛn o fulanin ni. Lelan, sɔɛi ndɔɛi niaa bɛnda le yaŋnɔnndo ni[24].

¹⁶Kani lende niaa piɛi lɔ́ɔ́ kon Mɛlɛka Hala niaa paale niaa cuungian o pembei Horɛb bɛngu len ni. Bau mí la dimi aa: ‹N yeema lɛ mì n tuei Mɛlɛka Hala diom le sɔɛi o naa lo sakpo le, n yeema lɛ vɛlɛ mì n ce yinnde bɛndulen nden te, yɔŋii naa n vu.›

¹⁷O kon, mí Mɛlɛka dimul-la aa: ‹I cɛl sɔɛi nda dimi-e.

¹⁸I co nda vana-tɛɛngaa-diom Hala-o solul o puapilɛa ndaa tɛɛn maa nɔm Moise. I vownin sɔɔn nun ndu o sondo, mò tɛɛngul nda ɲɛ-ɲɛ ya dimulnin ndu le tosaa.

¹⁹Vana-vana kɛɛ pɛ sɔɔn nun biyɔɔ, sɔɔn vana-tɛɛngaa-diom Hala kon tɛɛngulnin nda o diola nilan-ndon, ya pila ɲunanin vana kon le kɔlɔ o kɛɛ le sɔɔn nun biyɔɔ-o.

²⁰Kɛ te vana-tɛɛngaa-diom Hala-o pum tɔɔndan pɛ mò dimi yoongu ya vim ndu dimi loo o diola nilan, te kon te mò soo o diola halaa celennda, o bɛnda mò sɔla piɔ́mndo.›

²¹Bɔɔle la ɲunannin aa: ‹Vɛ̀ɛ̀ naa n sina yɛnin maa yoongoo fula Mɛlɛka o sondo le?›

²²Te sɔɛi vana-tɛɛngaa-diom Hala-o dimi o diola Mɛlɛka lan-nde i tosan te, te tɔmbɛ fula o sɔɛi ken nin te, mɛɛ yoongu kon fula Mɛlɛka o sondo le, mɛɛ a kuundianndo koni vana-tɛɛngaa-diom Hala kon dimi sɔɛi ken ni. Lelan, siòòŋii bii niaa a sɔɛi ken te.»