Read Kissi Tɔŋ miingua 20 Bible Online

Tɔŋ miingua 20 - Kissi bible

Tɔŋ miingua 20

¹«Lɔ́ɔ́ niaa kɔanin o cɔwvo le yaamɔaa niaa cɔlɔbaa-o, te la ce pɛ soa ndaa, ɲɛla ɲaanannda ndala soa nan-ndan a vanaa ndaa cɔwva sɛ́lɛ́ bɛndoo hiovɔɔ a niaa coo, la yɔŋ isiòòn te. Kani Mɛlɛka Hala niaa, o soli niaa Esipte-o co niaa ikɛi.

²Tuma niaa vanin a bɛɛndiannda le cɔwvo kandɔɔ-o, vana-solia-lasálàá sɔɔnguu, o soo o vanaa cɔwva lo,

³o dimul nda aa: ‹Israɛlla, la yaŋ nilan. La co hau sɔɔnguuo le yaamɔaa niaa cɔlɔbaa, lelan, la vu n'dial te. La yɔŋ isiòòn te. La yɔŋnun yoloma-yoloma nda o hɔl te.

⁴Kani Mɛlɛka Hala niaa co kɔlan a niaa latulu. O cɔlɔbalnin niaa yaamɔaa niaa, mò baŋa niaa.›

⁵O kon kɔɔli, vanaa bɛndua soaanin o vanaa cɔwva lo, mà ɲuna nda aa: ‹Nɛ̀ɛ́-nɛ̀ co yɛ niaa tɛɛn nanu, ó cii cɛiyo tangul sɛnɛi kɛ o luei-yɔ lenin too? Vana kon muungu o ndu lo, yɔŋii o vu o cɔwvo mì vana celen koma kandu luɛyɔɔ lenin.

⁶Nɛ̀ɛ́-nɛ̀ co yɛ niaa tɛɛn nanu, ó tɔl nakɔ n'rɛsɛnndo kɛ o kendu vɔ rɛsɛŋun tason too? Vana kon muungu o ndu lo, yɔŋii o vu o cɔwvo mì vana celen koma kiɔndu rɛsɛŋun tasen o nakɔ ndɔɔ nin.

⁷Vɛ̀ɛ̀ vana pum co niaa tɛɛn nanu, ó biw vanalanɔɔ le nɔu kɛ o cel-lɔ ndu o ba loo? Vana kon muungu o ndu lo, yɔŋii o vu o cɔwvo mì vana celen koma cua lanɔ o biw kon-ndo.›

⁸O kon, vanaa bɛndua kan cɔɔlu vɛlɛ vanaa cɔwva ɲuna aa: ‹Vɛ̀ɛ̀ vana pum co niaa tɛɛn o nɔ siòònde-o, o vesa lahɔl too? Vana kon muungu o ndu lo, yɔŋii o soli puapilɛa ndɔa yoomuan mɛɛ ndu fula yoomuan yɛ.›

⁹Te vanaa bɛndua cii pɛ sɔɔn mun dimi lende o vanaa cɔwva lo, a kɛsi simlacia le simndan vannda laci o cɔwvo.»

¹⁰«Te la kuel pɛ kobio pum le ndu delɔɔ coo a cɔwvo, la dimul fɔlɔn vanaa co o kobi kon nin-nda le kɔlɲuloo yiiyo niaa ndaa.

¹¹Te vanaa kan cɛl pɛ tuu niaa kon, mà kumbil niaa diola kobi kon, la luɛi, la siinguu vanaa co icali lenin-nda kpow pɔtɔlla a cɛa niaa.

¹²Kɛ taa kɛɛ pɛ le kɔlɲuloo tosaa niaa ndaa, taa del pɛ niaa coo a cɔwvo, la tiila kobi kon.

¹³Mɛlɛka Hala niaa malnin nda niaa o ba, mì la diw vanpiaandua kpow a mɔɔn cɔwvon.

¹⁴Kɛ mì la manda vanlaandua, cuaambɔa, cɔlua a bolofaa cɔw niaa komalnin o kobi kon nin-ndo kpow le niaa pila, mì la dɔwnun balo a bolofaa niaa hialunin yaamɔaa niaa o ba o cɔwvo-o, o Mɛlɛka Hala niaa yɔngunin niaa-o.

¹⁵Lende niaa bɛnda le tosaa a kobila vanin niaa levil taw lan ni, lá venin o lɛŋnde niaa vanin icali nin-nden nin te lan.

¹⁶Kɛ o kobila vanaa-mangalaa-isɔaa kan nin, la Mɛlɛka Hala niaa yɔngunin niaa kɛ́ɔ lan, la bɛnda mì la mɛi ɲɛ-ɲɛ yoomaa yoomu le.

¹⁷La bɛnda mì la diw Hitiia, Amoriia, Kanannda, Perisiia, Heviia a Yebusiia kpow, mì la cii nda kpede maa mɛɛ Mɛlɛka Hala niaa dimul niaa le tosaa yɛ,

¹⁸yɔŋii nda pɛɛku niaa dɛnnda nɔɔlɛila nda co tosaa le halaa ndaa lan. Kani la tosa pɛ maa nda, mɛɛ la cua hakio a Mɛlɛka Hala niaa.

¹⁹Te la kuel pɛ kobio pum a cɔwvo, mì la tiila ndu le palɛi taw, mì la va ndu cɔlɔbaa le ndu biyɔɔ, la bɛnda mì la cua cueon le yɔmii koamɛi vanin lon-nde koombiaa le, kani kɔmnde yɔmii ken niaa vanin dioo ni. Lelan, la kiaŋ ndi le, kani yɔm yondoo co vanaciee le ndu tiilaa mɛɛ vana tiila vanacieo yɛ le.

²⁰Fɔ yɔmii niaa sina maa vana di kɔmnde ndɔlen tei niaa bɛnda le koombiaa ni. La keŋ pɛ ndi, la solin kpekoo a ndi le kobi niaa co kon cɔlɔbaa-o biyɔɔ, háá mì kobi kalaa del niaa o ba.»