Read Kissi Tɔŋ miingua 21 Bible Online

Tɔŋ miingua 21 - Kissi bible

Tɔŋ miingua 21

¹«Taa saalun pɛ vana vílɛ́i nda dii-o yondoo nin o lɛŋnde Mɛlɛka Hala niaa ke niaa len nin, te vana sina vana dii ndu-o le,

²kaasoŋaa kɔlkalua niaa a vanaa kialaa n'yamaa niaa kɔɛ o fonda kon, a tuu tiŋndo vana vílɛ́i kon tɛɛn a kobila balu fonda kon-ndan

³le sinaa kobi co kpɛɛlun a fonda kon-ndo. O kon, kaasoŋaa kɔlkalua o kobi kon nin a bii naw téndé nda tosa vɔ baala a ndu loo, o nda hendu vɔ yɔm lebol o lebol too,

⁴a kɔɛ a ndu o pee pɔmbɔɔ vela telen oo telen too, o fonda nda tosa vali loo, o fonda nda seŋ latɔlɔɔ loo, a yem ndu kɛsei lon.

⁵O kon, vanaa-solia-lasálàá, poaa imamaa Levii-a sɔɔnguu, kani nda Mɛlɛka Hala niaa hɛli le baala ndɔɔ tosaa a le duaa dɔvɔɔ o diola ndɔlan ni, nda kialu yaman le cɔlɔbalan a le yɔŋulɔnndan ni.

⁶O kon kɔɔli, kaasoŋaa kɔlkalua fula o kobi kon nin-nda, á sɔɔnguu vana vílɛ́i kon ikɛi-ya pulu bala ndalan naw téndé kon coo o pee pɔmbɔ kon nin.

⁷A cii pɛ tosa lende, a dimi aa: ‹O co bala naalan te la soli koovan man te. Hɔlta naalan la ci ɲɛ-ɲɛ o dɛnɔɔ ho nin te.

⁸Lelan, a yandi Mɛlɛka, mal vanaa nɔmaa n baŋa-a haki, naa Israɛlla pɛɛn. Síílùù naa sɔɛi piɔ́m vana tɛɛmbuu isɔɔ loo le yandi.› O kon, a sɔla hakio malɔɔ a dɛnɛ piɔ́m vana kon o kɔɔ.

⁹La tosa pɛ lende, la soli dɛnɛ nɔɔlɛi piɔ́m vana tɛɛmbuu isɔɔ loo niaa tɛɛn, kani dɛnɛ sandaa niaa tosanin kon Mɛlɛka o hɔl ni.»

¹⁰«Te la kɔɛ pɛ o cɔwvo le yaamɔaa niaa cɔlɔbaa, mì Mɛlɛka Hala niaa mal nda niaa o ba, o vanaa niaa biinin-nda tɛɛn,

¹¹mì vana pum niaa tɛɛn ce cuaambɔ laandu kɛndɛ-kɛndɔɔ pum, mò luɛi ndu lehɔl, mò yeema le ndu cuaa mò siŋnun laa ndɔ,

¹²o bɛnda mò kɔɛ a ndu o ndu lo cɛinin. A tiiya pɛ lon, vanalanɔ kon sendi bolle ndɔlen, o kɛɛya yɛmbɛn ndɔn,

¹³o soli volɔɔla cuɛinannda va ndu lekɔɔ telen nda bii ndu o cɔwvo-o lan, o cal o vanapɔnɔ kon ndo cɛinin. O paangei ipilɛ bɛngu, o caŋ fuɲa ndɔ a kala ndɔ. Paangii ken cuu pɛ, vanapɔnɔ kon sina ndu niko vanalanɔ, o cua ndu o nɔ̀u nin, o siŋnun laa ndɔ.

¹⁴Lɔ́ɔ́-lɔ́ɔ̀ kaola cua kon cuu pɛ po kon o kɔl, o mal ndu, o kɔɛnnun nɛɛ o yeema le kɔnndan-nda. O bɛnda mò pisi ndu a n'voli le, o bɛnda vɛlɛ mo siinguu ndu cɛ ndɔ le. Kani o sina ndu vanalanɔ.»

¹⁵«Te vanapɔnɔɔ pum nɔ pɛ laandua nda ŋiɔn, mò kaola o pilɛ hiovɔɔ o pilɔɔ coo, mò velu hɔ́aa piaandua a laandaa ndɔa ŋiɔŋaa kan kpow, te lanɔ o kaola taw loo vilul ndu po tasoo ni,

¹⁶paale o co va kɛ́ɔ piɔwvo poaa ndɔa kan tɛɛn-nden, o bɛnda mò cua kɛ́ co le po tasoo-o, mò yɔngu po lanɔ o kaola taw-vo le. O bɛnda mò tuŋ po tase lanɔ o kaola loo kɛ́kon te.

¹⁷Kɛ o bɛnda mò sina maa po ndɔ tasoo co po tase lanɔ o kaola loo ni. O kon, mò yɔngu ndu ɲɛm ndɔn kundalan latiɔn hiovɔɔ o pilɔɔ coo, kani ndu co po tase o velu a yoomuma ndɔma ivanapɔnɔyan-ndo ni. Lelan, ndu bɛnda ni mo sɔla fonda ikaasonyaa.»

¹⁸«Te vanndo pum nɔ pɛ po nila kaloo, o simùl vanaa ndɔa banaa-o, o tuì fuɲa ndɔ a kala ndɔ diom too, taa sila ndu pɛ a sionnden mò tui le,

¹⁹fuɲa ndɔ a kala ndɔ a bii ndu, a yoo kaasoŋaa kɔlkalua co o kobi kon nin-nda ndu o dio luɛyaa kobi kon.

²⁰A tiiya pɛ a ndu, a dimul kaasoŋaa kɔlkalua kan aa: ‹Po naa ho, vana nila kaloo a po simul naa-o o co ni. O yeŋ lani o sila naa le, vana laasianndo a vana kolaa mamɔiyo o co ni.›

²¹O kon, vanpiaandua co o kobi kon nin-nda kpow a vii ndu a powtan háá o vi. Lende niaa solinin dɛnɛ vɔɔndo niaa tɛɛn ni. Israɛlla kpede a tuɛinin sɔɛi ken, mì siòònde bii nda.»

²²«Te yamɛi vanndo pum i kelun pɛ, mò bɛnda le piɔ́mndo sɔlaa le yɔŋ vɔɔn ndɔɔ, mì la landu ndu o yɔmndo coo,

²³vana vílɛ́i kon bɛnda mò lɔl o landaa o yɔmndo coo le. La bɛnda mì la kumbu ndu paale niaa landu ndu len. Kani vana nda landu o yɔmndo coo-o, danga fula Hala o ba-o o co ni. Nduyɛ, la bɛnda mì la nɔɔliaa lɛŋnde Mɛlɛka Hala niaa ke niaa kɛ́ɔ len te.»