Read Kissi Tɔŋ miingua 23 Bible Online

Tɔŋ miingua 23 - Kissi bible

Tɔŋ miingua 23

¹Vana-vana bɛnda mò cua laandaa fuɲa ndɔa o pilɛ o nɔ̀u nin te, yɔŋii o tɛɛmbuu fuɲa ndɔ labɛɛ.»

²«Vana-vana nda pɛl pɛ bosio, te kon te vana-vana nda kelu pɛ dialii kolaninnde, ndu bɛnda mò luɛi o kunda Mɛlɛka-o nin te.

³Vana co volɔɔ sámáá-o[26] a polale ndɔlen háá o lambi tɔ́ndɔɔ a bɛnda mà luɛi o kunda Mɛlɛka-o nin te.

⁴Le fɛɛn a fɛɛn, Amɔnnda a Moabua a bɛnda mà luɛi o kunda Mɛlɛka-o nin te, hali cuavaa ndaa o lambi tɔ́ndɔɔ a lueinin lenin te.

⁵Kani telen niaa faŋan Esipte mí la va hunɔɔ-o, a kue niaa bɔŋa nɛi-tɛɛn a ɲɛdiaa a á mamɛn te few. Kɛ má hiaw Balaam po Beɔr-o kɔɔli a volion, má cua ndu Petɔr o lɛŋnde Mesopotamii len nin, má hun a ndu le niaa dangaa dɔvɔɔ.

⁶Kɛ mí Mɛlɛka Hala niaa kɛɛ le nilan yaŋɔɔ o diom Balaam-ndo, mó mangala dangaa duaa le niaa, kani Mɛlɛka Hala niaa kaola niaa.

⁷Lelan, le fɛɛn a fɛɛn, te la co vɔ yoomu, la fula tɔnɔ nda, te kon te dɛnɛ kɛndɛ nda lehɔl te.

⁸Kɛ la nɔ́ nɛyɔnndo a Edɔmnda le, bau puapilɛa niaa nda co ni. La nɔ́ vɛlɛ nɛyɔnndo a Esiptea le, bau la va icali o lɛŋnde ndalen nin.

⁹Cuavaa vanaa-mangalaa-isɔaa sala tiɔŋaa kan a nɔla mà kandu luɛyɔɔ o kunda Mɛlɛka-o nin o lambi yàándɔɔ.»

¹⁰«Tuma niaa kuelnin yaamɔaa niaa a cɔwvo-o, la bɛnda mì la mandan a dɛnnda nɔɔlɛilan kpow.

¹¹O niaa tɛɛn, te vanapɔnɔɔ pum siŋnun pɛ o nɔɔlɛiyo le mɛmma ivanapɔnɔyama fula ndu o dialii kolaninnde icɔllo-an, o bɛnda mò faŋan o dɔ́ɔ́ngɔ́ɔ̀ nin. O bɛnda mò muungu lenin ipalaa le.

¹²Te paalen le yɔngun pɛ, o pulun cɛ́kɛ́lɛ́. A paale delaalen niko, o muungu o dɔ́ɔ́ngɔ́ɔ̀ nin.

¹³La bɛnda mì la toosiaa fondokpaa pum o dɔ́ɔ́ngɔ́ cɔwvo kɔɔli le vaa kɔlan sɔndanndo[27] lon.

¹⁴Vana cɔw oo vana cɔw bɛnda mò nɔ dɛndɛ pɔmbɔɔ o pilɛ o volɔɔla ndɔla cɔwlan nin. O kon, te solɔɔ bii ndu pɛ, o kɔ tow soondo o fondokpa kon a dɛndɛ kon, o sol lenin. O cii pɛ, o mingi poola lan kumbɔɔ.

¹⁵Kani Mɛlɛka Hala niaa co kelaa o dɔ́ɔ́ngɔ́ niaa nin le niaa mandaa a le yaamɔaa niaa malɔɔ niaa o ba. Dɔ́ɔ́ngɔ́ niaa cɔwvo bɛnda mò va o diandaa, lelan Mɛlɛka bɛnda mò ce ɲɛ puusiaa ndu kɔllo-o lenin te, yɔŋii o faŋan niaa kɔɔli.»

¹⁶«Te cɛɔ sɔndan pɛ vana ndɔ bɛndoo o ba, mò ɲaanun, mò hun vionnun o lɛŋnde niaalen nin, la bɛnda mì la mingi ndu o vana ndɔ bɛndoo lo le.

¹⁷Cɛ kon nɔla mò cal niaa tɛɛn o lɛŋnde niaalen nin, o fonda hɛnannin ndu-o, o kobila niaalan o pilɛ nin. La bɛnda mì la saangiaa ndu le tɔnɔ soli ndu o n'dial te.»

¹⁸«Suunda leyulaa bɛnda mò va cuavaa laandua Israɛlla tɛɛn te, o bɛnda vɛlɛ mo va poaa Israɛlla tɛɛn te.

¹⁹Le fɛɛn a fɛɛn, la luei sala vanalanɔɔ sɔla o suundaa nin, te kon te volin vanapɔnɔɔ sɔla o suundaa nin-ndon o Cɛi-Mɛlɛka Hala niaa nin le yoole vanndo baa o Mɛlɛka lo len timbio le. Kani Mɛlɛka Hala niaa yeema ɲɛm vaa lende le few.»

²⁰«Te la dɔnda pɛ pilaciee niaa volion, ɲɛdiaa, te kon te ɲɛ súú oo súù, la bɛnda mì la ɲuna ndu le tɔnɔ handɔɔ lecoo le.

²¹Te la dɔnda pɛ mialla ɲɛ pum, la nɔla mì la ɲuna nda le tɔnɔɔ handɔɔ lecoo. Kɛ la dɔ́ndà pilacieaa niaa ɲɛ-ɲɛ le niaa mingullo a tɔnɔ lecoo le. Te la tosa pɛ lende, Mɛlɛka Hala niaa dɔawnin niaa duaa o ɲɛ-ɲɛ niaa vanin tosaa o lɛŋnde niaa co kɔlan luɛyɔɔ nin le len hiɔlɔɔ len nin.»

²²«Te la baa pɛ yoolen o Mɛlɛka Hala niaa lo, la bɛnda mì la tamala le yoole len timbio le. Kani te la keleŋa len timbi le, Mɛlɛka Hala niaa ɲuna niaa le ɲɛ kon. O tosan yɛ pɛ lende, mɛɛ la cua hakio a ndu.

²³Te la bee leyoo o Mɛlɛka lo le, kon co haki le niaa le.

²⁴Kɛ te la baa pɛ yoolen, mì sɔɛi pum fula niaa o sondo, la kindin mì la peelu sɔɛi niaa dimi ken-nde, mì la timbi yoole niaa bàá o Mɛlɛka Hala niaa lo a kɔl niaa mí la solin sɔɛi ken o sondo len.»

²⁵«Te la kei pɛ o nakɔ n'rɛsɛn vanndo nin, la nɔla mi la de rɛsɛnndon mɛɛ niaa yeema yɛ háá mi la pim, kɛ la bɛnda mì la vow mun o kambɛi niaa nin le kɔlan a mun te.

²⁶Te la kei pɛ o ciɛi n'malii vanndo nin, la nɔla mi la kili yasalan a ba, kɛ la bɛnda mì la kelu mun a vɔlɔtɔɔ le kɔnndan a mun te.»