Read Kissi Tɔŋ miingua 24 Bible Online

Tɔŋ miingua 24 - Kissi bible

Tɔŋ miingua 24

¹«Te vanapɔnɔɔ pum yil pɛ lanɔɔ, o calii ndɛi nin, mì vanapɔnɔ kon ce káà vɔɔndo pum o kela laa ndɔ kon nin, te kaola lanɔ kalaa cuu pɛ vanapɔnɔ kon o kɔl, o tiwba mo sɛva sɛbɛ tɛɛmbua nɔu, mò yɔngu ndu, mò soli ndu o ndu lo cɛinin.

²Kɛ te vanalanɔ kon faŋan pɛ ndu o ba, mò kɔ cal o nɔu pɔnɔ celen o ba,

³hali kaola ndɔɔ cuu bɛɛ pɔnɔ ndɔ diinndɔ o cal kon o ba-o o kɔl, mì pɔnɔ kon bɛɛ sɛva sɛbɛ tɛɛmbua nɔu, mò yɔngu ndu, mò soli ndu o ndu lo cɛinin, te kon te pɔnɔ ndɔ diinndɔ kon vu bɛɛ,

⁴pɔnɔ tase kɛɛ ndu kon-ndo bɛnda lɛ mo mingin ndu o ba mò siŋnun vɛlɛ laa ndɔ le. Kani vanalanɔ kon cuu siŋnɔn vana nɔɔlɛiyo le ndu vanapɔnɔ kon. Te o mingin vɛlɛ pɛ lanɔ kon o ba, mɛɛ yɔŋ vɔɔn bɛndoo o tosa kon Mɛlɛka o hɔl ni. Le hee, la lúeì lɛŋnde Mɛlɛka Hala niaa yɔngu niaa kɛ́ɔ len o hakio nin te.»

⁵«Te vanapɔnɔɔ yil pɛ lanɔɔ sɛnɛi, o bɛnda mò kɔɛ o cɔwvo le, vana bɛnda ma baŋ ndu vali oo vali tosa le. O bɛnda mò va yili o calta ndɔlan háá le vɔsio pilɛ, haliko mo nɛŋi lanɔ o yil kon-ndo kɔl.»

⁶«Vana-vana bɛnda mò bii sùnndo a ciei o landei nin vanndo o ba le, hali sùnndo vana bɛnda ma bii ndu o landei nin te. Kani te la bii pɛ ɲɛm mun vanndo o ba o landei nin, mɛɛ yoomu ndɔɔ niaa bii o landei nin lende nuaa ni.

⁷Te Israɛlnɔɔ ciimbuu pɛ vanaciee yoomaa o pilacieaa ndɔa Israɛlla tɛɛn, mò siinguu vanaciee o ciimbuu kon-ndo cɛ ndɔɔ, te kon te mò pisi ndu, vana ciimbuu ndu kon-ndo bɛnda mò sɔla piɔ́mndo kangalan. Lende niaa bɛnda ni mi la faŋa dɛnɛ vɔɔndo niaa tɛɛn.»

⁸«La mandan a nàà siaŋaa taw, mì la bii silala leviaa-solia-lasálàá yɔngunin niaa lan, mì la bii tɔŋnda ya yɔngunin nda le niaa tɛɛngullo lan.

⁹La loonun-ndɔ a ɲɛ Mɛlɛka Hala niaa kei Miriam tosal nɛi-tɛɛn o hunɔɔ niaa nin telen niaa faŋan Esipte-o.»

¹⁰«Te la dɔnda pɛ vana niaa cal-lo ɲɛ pum, la lúɛì o ndu lo cɛinin le landei cuaa le.

¹¹La bɛnda mì la cum ndu o bɛ́ɛ̀, mì ndu pila cuu niaa landii ndɔɛi lon.

¹²Te vana bala fondoo vana niaa dɔnda ɲɔɔ-o co ni, la bɛnda mì la lɔl a landii ndɔɛi o ba le.

¹³La bɛnda mì la mingul ndu ɲɛ o lendul niaa o ba-o a paale delaalen, haliko mo kuumbun doma ndɔ bɛndoo, mò dɔw niaa duaa, mi dɛnɛ kon siŋnun dɛnɛ sandaa Mɛlɛka Hala niaa o hɔl.»

¹⁴«La bɛnda mì la puulun bala fondolan, te kon te kuɛi vana co niaa vallo tosallo-o le ndu saangiaa le. Vana vali kon va pilaciee niaa, o va mial hin calle niaa o bɛngu coo o lɛŋnde niaa len nin-ndo.

¹⁵Lepalaa-lepala, telen pá mì paalen le del, la bɛnda mì la va ndu sala ndɔɔ yɔngoo. Kani vana bala fondoo o co ni, sala kon o tiindan ni, o co ndu cumndo a yeemɛi taw. Te la tosa lende le, o koŋul pɛ o Mɛlɛka lo a niaa o sondo, mɛɛ hakio niaa cua lende ni.

¹⁶Kala-ncuawva bɛnda mà sɔla piɔ́mndo le dɛnɛ vɔɔn hɔ́aa ndaa tosa-o le. Cuawva bɛɛ a bɛnda mà sɔla piɔ́mndo le dɛnɛ vɔɔn vanaa velu nda-a tosa-o le. Vana-vana sɔlanin piɔ́mndo le haki ndɔ o tosa-o[28].

¹⁷La kilul miallo, te kon te vííyo yamɛi a kafalan te. La bii ɲɛ cuɛinan vanalanɔ pɔnɔ ndɔ vi-o o landei nin te.

¹⁸La loonun maa cɛa niaa yɔŋnun o lɛŋnde Esipte len nin ni, kɛ mí Mɛlɛka Hala niaa baŋa niaa a cɛle len, lelan ya dimul niaa le tɔŋndo ho biyɔɔ ni.

¹⁹Te la va pɛ ciɛɔn niaan kovɔɔ, mì la pɔɛɛnun tumboo o ciɛi nin, la muungu lɛ mì la kɔ cua tumbu kon te. La mɛi ndu niko lon le mialla, le vííya, te kon te le vanlaandua piaandaa ndaa vi-a, haliko mi Mɛlɛka Hala niaa dɔw niaa duaa o ɲɛ-ɲɛ niaa vanin tosaa nin.

²⁰Te la kɛndu pɛ olivieen niaan, la muungu lɛ mì la kɔ kiɔndu n lo o lɛwvon-ndon te. Mun n bɛnda mì n lo lon le mialla, le vííya a le vanlaandua piaandaa ndaa vi-a.

²¹Te la kɛndu pɛ rɛsɛŋun niaan, la muungu lɛ o nakɔ kon nin le kpɔ̀nyɔ̀la lo lecoo lan kiɔndɔɔ le. Lan la bɛnda mì la lo lon le mialla, le vííya a le vanlaandua piaandaa ndaa vi-a.

²²La loonun maa cɛa niaa yɔŋnun o lɛŋnde Esipte len nin ni. Lelan ya dimul niaa le tosaa lende ni.»