Read Kissi Tɔŋ miingua 27 Bible Online

Tɔŋ miingua 27 - Kissi bible

Tɔŋ miingua 27

¹Mí Moise nda kaasoŋaa kɔlkalua Israɛlla yɔngu vannda silalan ndan, mí Moise dimul nda aa: «La bii tɔŋnda ya co niaa hau yɔngoo lan kpow.

²Paale niaa taŋnin Yurdɛn le luɛyɔɔ o lɛŋnde Mɛlɛka Hala niaa yɔngu niaa len nin-nden, la tɔl powta bɛndulan lɛŋ, la yikpa lan a pɔ́w humboo.

³O kon, la sɛva sɔɔn co o tɔŋndo ho nin-ndon kpow o powta lan coo. Lende niaa tosanin paale niaa taŋnin peo Yurdɛn le luɛyɔɔ o lɛŋnde Mɛlɛka Hala niaa ke niaa len nin-nden ni. Lɛŋnde len yɛ, cɔlua a tɔlɔɔlan la naŋ lenin taw-taw, maa mɛɛ Mɛlɛka pila dimul niaa yɛ, Hala fuɲaa niaa mamaa pɛɛn.

⁴Lɔ́ɔ́ niaa taŋnin Yurdɛn-ndo, la simi powta ya dimul niaa hau le simio lan o pembei Karisim[29] coo, la yikpa lan a pɔ́w humboo.

⁵Mì la cow Mɛlɛka Hala niaa fonda-loamaa-lasálàá a powtan o fonda pilɛ kon. Kɛ volɔɔ vali cɔwnun a cilinnde-o bɛnda mò pilan powta lan te.

⁶A powta kpulukuulan, la nda sel te lan niaa bɛnda le Mɛlɛka Hala niaa fonda-loamaa-lasálà kon cowvo ni. O fonda-loamaa-lasálà kon coo niaa solulnin Mɛlɛka Hala niaa sálàla loamaalan ni,

⁷mì la solul ndu vɛlɛ sálàla kɔlɲululan, mì la de ɲɛdiaa sálàla kɔlɲulu kon o fonda kon, mì la viow kponyoo Mɛlɛka Hala niaa o hɔl lon.

⁸Mì la sɛva sɔɔn co o tɔŋndo nin-ndon kpow o powta lan coo ɲɛkɛndɛi.»

⁹Mí Moise nda leviaa-solia-lasálàá a dimul Israɛlla kpow aa: «Israɛlla, la mei-yɔ kpili mì la yaŋ nilan! La cùù hau siŋnɔn yungu co le Mɛlɛka Hala niaa-o.

¹⁰Lelan, la bii diom ndɔɔ mì la kela o tɔŋnda ndɔlan a o silala ndɔla ya co niaa hau yɔngoo lan coo.»

¹¹Paale pilɛle len, mí Moise ke vannda silalan, mó dimul nda aa:

¹²«Lɔ́ɔ́ niaa taŋnin Yurdɛn-ndo, vanaa velun o polale Simeɔn-nden, o polale Levii len, o polale Yuda len, o polale Isakar len, o polale Yosɛf len a o polale Bɛnyamɛn-nden nin-nda a sim o pembei Karisim coo, a dɔw vannda duaa.

¹³Vanaa fula o polale Rubɛn-nden, o polale Kad len, o polale Asɛr len, o polale Sabulɔn-nden, o polale Dan-nden a o polale Nɛftali len nin-nda nda simnin o pembei Ebal coo ma dimi sɔɔn dangan.»

¹⁴«O kon, leviia yondalnin Israɛlla kpow aa:

¹⁵‹Vana-vana sɛl pɛ piɔmndo, te kon te vana-vana cɔw pɛ piɔmndo a ciliŋii o teengiaa-e, mò kɛsi ndu o fonda yililio pum le ndu sooloo sɔ́ɔ́-sɔ́ɔ́, màá dangaa va vana kon coo! Kani Mɛlɛka yeema ɲɛm vaa lende le, n vanndacieea toosiaa a bala ndalan-ndon.› O kon, vannda kpow a cɛlnin aa: ‹Amiina!›

¹⁶Màá dangaa va vana tɛɛndan fuɲa ndɔ a kala ndɔ-o coo! Vannda kpow a cɛlnin aa: ‹Amiina!›

¹⁷Màá dangaa va vana faŋa pow cɔm pɛɛngulan o lɛŋnde pilalen-ndo-o coo! Vannda kpow a cɛlnin aa: ‹Amiina!›

¹⁸Màá dangaa va vana yɛɛ vana sumɛiyo o nɛi vɔɔndo coo-o coo! Vannda kpow a cɛlnin aa: ‹Amiina!›

¹⁹Màá dangaa va vana kilul miallo, vííyo a vanalanɔ pɔnɔ ndɔ vi-o yamɛi lakafɛi-yo coo! Vannda kpow a cɛlnin aa: ‹Amiina!›

²⁰Màá dangaa va vana suunda a laandaa fuɲa ndɔ-a o pilɛ-o coo! Kani ɲɛ o tosa kon-ndo, fuɲa ndɔ o tɛɛmbuu labɛɛ lende ni. Vannda kpow a cɛlnin aa: ‹Amiina!›

²¹Màá dangaa va vana hini a cɔlu súú oo súù-o coo! Vannda kpow a cɛlnin aa: ‹Amiina!›

²²Màá dangaa va vana suunda a yema ndɔ-o coo, o va yema ndɔ fuɲa pilɛ, o va yema ndɔ kala pilɛ! Vannda kpow a cɛlnin aa: ‹Amiina!›

²³Màá dangaa va vana suunda a lefu ndɔ laandoo-o coo, kalaa laa ndɔ pɛɛn! Vannda kpow a cɛlnin aa: ‹Amiina!›

²⁴Màá dangaa va vana dii vanacieo o vionnɔnndo nin-ndo coo! Vannda kpow a cɛlnin aa: ‹Amiina!›

²⁵Màá dangaa va vana cɛl luɛyɔɔninndo mó yaala vana tɛɛmbuu isɔɔ loo le piɔ́mndo sɔlaa-o coo! Vannda kpow a cɛlnin aa: ‹Amiina!›

²⁶Màá dangaa va vana kɛɛnin le sɔɔn tɔŋndo biyɔɔ, mò kɛɛ le kelaa lecoo-o coo! Vannda kpow a cɛlnin aa: ‹Amiina!›»