Read Kissi Tɔŋ miingua 29 Bible Online

Tɔŋ miingua 29 - Kissi bible

Tɔŋ miingua 29

¹Mí Moise cuungiaa Israɛlla kpow, mó dimul nda aa: «Niaa pila ce mɔnɛ Mɛlɛka soli a Esiptea-o, la ce ɲɛ o tosal masaa Esipte, vanaa bɛndua va ndu o ba bɛngu-a a lɛŋnde ndɔlen kpow yɛ.

²La ce sangala kei nda coo lan kpede. La ce dɛnnda kɔndɔfiltan a kaamaala Mɛlɛka tosa lan.

³Kɛ háá hau, Mɛlɛka yɔngu vɔ niaa kɔllo le lan biyɔɔ bila le, o yɔngu vɔ niaa hɔltan le cɔu le, o yɔngu vɔ vɛlɛ niaa nilan le tueyɔɔ le.

⁴Ya Mɛlɛka, mí sim niaa laci le kɔlan o lɛŋnde veselɛilen nin o vɔsilan belehiɔɔlu bɛngu, volɔɔla cuɛinannda niaalan la siɔŋ niaa lekɔɔ le, samtala niaalan bɛɛ la siɔŋ niaa o n'pelu le.

⁵La ve bulu dio le, la ve mamɔi a mɔima nɛyaa kolɔɔ le, kon tosan haliko mi la sina maa ya co Mɛlɛka Hala niaa ni.

⁶Tuma niaa tiiya o fondaa ho-o, mí Sihon, masaa Hɛsbɔn a Ɔk, masaa Basan a tuɛi naa tɔ́ɔ́, má kuel naa, má kɔ del naa coo a cɔwvo. Kɛ mí n nɔla nda.

⁷Mí n hialu lɛŋnde ndalen, mí n yɔngu polale Rubɛn-nden, polale Kad len a polale tálále Manase len tàndà kon.

⁸Lelan, la bii sɔɔn tɔŋndo ho, mì la kela lecoo, haliko mi kpekula niaalan la va diondɔɔ.»

⁹«Niaa kpow, la sim hau Mɛlɛka Hala niaa o hɔl, kandɔɔ a vanaa co bolii lapangɛi-ya, vanaa kɔlkalua, vanaa bɛndua lelɛŋnda kɔ bii a vanpiaandua Israɛl kpede.

¹⁰Hɔ́aa niaa, laandaa niaa a mialaa co niaa o bɛngu coo le niaa yɔmnde kiŋndo, te kon te le niaa mɛnndan kondullo-a bɛɛ a co isisi nanu.

¹¹La co isisi nanu le luɛyɔɔ o kpema Mɛlɛka Hala niaa yiilu niaa-o nin, kpema o yiilu niaa hau a mɛnanndo-o.

¹²Kon co tosan haliko mo siinguu niaa hau yungu ndɔɔ, mì ndu pila va Hala niaa maa mɛɛ o dimul niaa yɛ a mɛɛ o mɛnalan fuɲaa niaa mamaa Abraham, Isaak a Yakɔb yɛ.

¹³O co niaa daama le ya yiilul kpemaa ho le, o co ko niaa daama le ya mɛnalan mɛnalanndo ho le.

¹⁴Kɛ i yii ndu le vanaa co hau isisi nanu Mɛlɛka Hala niaa o hɔl-la a le vanaa vilun-ndɔ bɛɛ le-a[32].

¹⁵Tuma naa n va icali Esipte-o, niaa pila sina ɲɛ kei naa coo lon-ndo, la sina vɛlɛ mɛɛ naa n kei o lɛŋii vanaa-mangalaa-isɔaa naa n kei tɛɛn-nda nin yɛ.

¹⁶La ce laasian nda co o piɔmnda sooloo nin-ndo, piɔmaa nda sɛl a yɔmnde-a, a nda sɛl a powtan-nda, a nda cɔw a volin humbon-nda a á nda cɔw a sianion-nda.

¹⁷Lelan o niaa tɛɛn, vanapɔnɔ ni, vanalanɔ ni, leyungu ni, lepola ni, vana-vana fáŋà kɔl ndɔɔ o Mɛlɛka Hala niaa lo hau le kɔlan piɔmaa vanaa kan co sooloo-a sooloo le. La caa taw yɔŋii dumbule yɔmndo pum le va niaa tɛɛn, le solì bɔ̀tàá a ɲɛ lolɛiyo len.

¹⁸O niaa tɛɛn, te vanndo pum tuei pɛ sɔɔn kpeman yiinun mun a mɛnanndo-on, mò kuundian o kɔl ndɔɔ nin, mò dimi aa: ‹Kɔlɲuloo vanin le ya, hali i vanin bɛɛ kelaa mɛɛ kɔl nuu yeema yɛ›, mò luei vana celen o suunda soolaa n'piɔmndo nin[33],

¹⁹Mɛlɛka cɛlnin le ndu hakio malɔɔ le. Kɛ kɔltuw Mɛlɛka-o a paŋala ndɔɔ toalnin vana kon coo. Dangala sɛvan o sɛbɔɔ ho nin-ndan la toalnin ndu coo, mì Mɛlɛka ɲumi diola ndɔlan o ceendo coo.

²⁰Mɛlɛka faŋanin ndu polama Israɛlla kpow tɛɛn le dɛnɛ palaa toalnin ndu coo-o, maa mɛɛ dangala co o kpema sɛvan o sɛbɛ tɔŋndo ho nin-ndo la co yɛ.»

²¹«Te lambila niaa co hunɔɔ violɔɔ lan, te kon te cuavaa niaa imamaa a mialaa fulanin o lɛŋii levil-le nin mà hin-nda ce pɛ kpundɛlan a sangala Mɛlɛka tuisinin lɛŋnden nden coo lan,

²²taa ce pɛ maa fungoo a hɛlle cii ɲɛ-ɲɛ tɛɛmbuu, maa tɔlɔɔ niŋ-ndɛ o lɛŋnde len coo le, maa bil vil lɛ lecoo le, maa fondaa siŋnun maa Sodɔm, Komɔr, Adma a Seboyim, kobila Mɛlɛka tɛɛmbuu lan a kɔltuw bɛndoo lan,

²³vanaa kan ɲunannin aa: ‹Le kɔlɔ yɛɛ nɛ Mɛlɛka tuisi yɛ sangalan ndan vannda ha coo? Yɛɛ nɛ yɔŋ yɛ mó tuulu kɔl a nda nuaa taw-taw?›

²⁴O kon, a mululnin nda aa: ‹Kani kpema Mɛlɛka, Hala fuɲa ndaa mamaa yii a nda, mó mɛnalan nda telen o soli nda Esipte-o-o nda mal ni.

²⁵Kpema kon nda mal ni má kɔa halaa celennda sooloo a vulan baŋɔɔ nda o labɛngunin, halaa ndaa sina paandu le-a, a Mɛlɛka kuuna nda sooloo-a.

²⁶Lelan kɔltuw Mɛlɛka-o tol o lɛŋnden nden coo ni, le ken o tuisi nda dangala sɛvan o sɛbɔɔ ho nin-ndan kpow coo ni.

²⁷Le tùú Mɛlɛka tuulu kɔl a nda-o, o kɔltuw kon nin a o tumbé kon nin, mó faŋa nda o lɛŋnde ndalen nin, mó toaw nda o lɛŋnde pilalen nin, nɛɛ nda co vɔ háá hau-va pɛɛn.›

²⁸Le Mɛlɛka Hala naa kínɛí dɛnnda viannanndan la co ni. Le naa a cuavaa naa imamaa dɛnnda cɔmnun-ndan la co le fɛɛn a fɛɛn ni, haliko mi n kela o sɔɔn tɔŋndo ho coo.»