Read Kissi Tɔŋ miingua 3 Bible Online

Tɔŋ miingua 3 - Kissi bible

Tɔŋ miingua 3

¹«Mí n muli hɔlla a kpengii celen, mí n kɔa a ba Basan-ndo, kɛ mí Ɔk, masaa Basan hinul naa a vanaa ndɔa cɔwva kpow. Mó del naa coo Edrei.

²O kon mí Mɛlɛka dimul-la aa: ‹Yɔŋ isiòòn a ndu le. Kani i mal ndu nɔm o ba a vanaa ndɔa cɔwva a lɛŋnde ndɔlen kpow. La co ndu nɔla mɛɛ niaa nɔla Sihon masa Amoriia, ó va icali Hɛsbɔn-ndo yɛ.›

³Lende Mɛlɛka Hala naa mal Ɔk, masaa Basan a vanaa ndɔa cɔwva kpow naa o ba ni. N lo nda diwvo háá má cuu kpow, o pilɛ bɛɛ lo yoomu le.

⁴O kon mi n bii kobila ndɔlan kpede. O tàndá Arkɔb kon nin, kobilan la va belaŋɔmpum, lan la va o masale Ɔk len nin Basan ni. Lan kpede mí n bii lan.

⁵Kobila lan kpow la va lakungaalan a kpakilan, kpakila ndalan láà bandu taw. La va lakindaalan a koŋnda nɔ sɔkɔan-ndan. O lan kɔɔli, mí n bii sɔndɔkɔlta ve lakungaa a lakpaki le lan taw.

⁶Mí n diw vanndacieea va lenin-nda kpow, kandɔɔ a vanpiaandua, vanlaandua, kɔ bii a cuaambɔa, vana-vana lo yoomu le, maa mɛɛ naa n tosa a masale Sihon-nden yɛ, masa va Hɛsbɔn-ndo pɛɛn.

⁷Kɛ mí n manda cɔlua a bolofaa cɔw naa n cua o kobila lan nin-ndo le naa pila.»

⁸«O telen kon, mí n hialu lɛŋnde masaa Amoriia nda ŋiɔn o ba, a va Yurdɛn leeloo a ba paalen le can-ndo-a, kandɔɔ o pee pɔmbɔɔ háá o pembei Hɛrmɔn.

⁹Sidɔnnda yɔngu pembei Hɛrmɔn diolan ni aa Siriɔn, Amoriia veelu ndi ni aa Senir.

¹⁰Mí n bii kobila co o dɛngbɛ co o pembei coo-o nin-ndan, mí n bii tàndàá Kalaad a tàndàá Basan kpow, mi n bii háá o kobilan Salka a Edrei, lan bɛɛ la va o masale Ɔk len nin Basan.

¹¹Ɔk va kon masaa Basan-ndo ndu pilɛ kpé lo yoomu o Refaimnda nin ni. Kpele n'cilinndo kpele ndɔ hinia va ni[1]. O co vɔ háá paalen nden o kobio Raba nin, kobi poaa Amɔnnda pum pɛɛn. Kpele kon bandii ndɔɛi va dunndo leŋɔmahiɔɔlu, buo dunndo lehiɔɔlu, dun vanacieo pɛɛn.»

¹²«Tuma kon naa n hɛlu lɛŋnde len kpow ni. Mí yɔngu polale Rubɛn-nden a polale Kad len lɛŋnde cɛn Aroɛr o kɔngɔ feke-feke pee pɔmbɔɔ coo, mí le kɔ tiiya o tàndá n'pemboo Kalaad tɛɛn-nden, mí yɔngu polama man lɛŋnde len a kobila ndɔlan.

¹³Mí yɔngu polale tálále Manase len tàndà tɔ̀ lo o tàndá Kalaad-o nin-ndo a lɛŋnde Ɔk va masalen tosaa coo Basan-nden kpow. Kon co dimio ni aa tàndàá Arkɔb a tàndàá Basan kpow. Lɛŋnde len ndáà veelu ni aa lɛŋnde Refaimnda.

¹⁴Mí Yair, po imama Manase-o hialu tàndàá Arkɔb kpow háá o pɛɛngulan a lɛŋnde Kesuriia a Maakatiia. Mó handu diola ndɔlan o sɔndɔkɔltan Basan coo. Háá paalen nden a co lan veeloo aa sɔndɔkɔlta Yair lan.

¹⁵Mí yɔngu Makir tàndá Kalaad-o.

¹⁶Mí yɔngu polale Rubɛn-nden a polale Kad len lɛŋnden cɔnɔnndo Kalaad kɔlan tiiyaa háá o pee pɔmbɔɔ Arnɔn, pee kɔ́llo Yabɔk co pɛɛngulan a lɛŋnde Amɔnnda ni[2].

¹⁷Mí yɔngu nda vɛlɛ dɛɛla bɛndoo Araba kɔlan tiiyaa háá Yurdɛn o peelo, ndu co pɛɛngulan cɔnɔnndo Kinnerɛt le kɔlan tiiyaa háá o mɛmma hɛlii bɛnduan ni, o pembei Piska bɛngu a ba paalen le can-ndo.

¹⁸O telen pilɛ kon, mí dimul nda sɔɔn mun: ‹Mɛlɛka Hala niaa yɔngu niaa lɛŋnden nden kɛ́ɔ. Kɛ o niaa tɛɛn, vana-vana nɔla le ɲɛm cɔwvon cuaa le cɔwvo, ndu cua mun mì la sim puapilɛa niaa, Israɛlla laci a volɔɔla cɔwlan o laba.

¹⁹Laandaa niaa, poaa niaa a cɔlua niaa daama lonin o kobila ya yɔngu niaa lan nin ni (kani i sina maa la nɔ cɔlua taw-taw).

²⁰La co lo cɔwvo háá mì Mɛlɛka Hala niaa yɔngu puapilɛa niaa calta pɛngiaalan maa mɛɛ o yɔngu niaa yɛ, háá mì nda bɛɛ sɔla lɛŋnde Mɛlɛka yɔngu nda kɛ́ɔ Yurdɛn leeloo len. O kon kɔɔli, vana-vana nɔla niko mò muungu o lɛŋnde ya yɔngu ndu len nin.›

²¹Mí soaa o Yosue lo telen kon, mí dimul ndu aa: ‹A ce mɛɛ Mɛlɛka Hala niaa soli mɔnɛ a masaa ŋiɔnda ha yɛ, lende koni o tosanin vɛlɛ a masɛi o tàndàla niaa keinin nin-ndan ni.

²²Lelan, siòòŋii bíí niaa le, kani Mɛlɛka Hala niaa, ndu pila co cɔwvo tosaa le niaa ni.›»

²³«Mí tɛɛlun Mɛlɛka lɔ́ɔ́ kon, mí dimul ndu aa:

²⁴‹Éé Maalii! Nɔm Mɛlɛka, a kandu ya vana baala nɔmndo bɔɔbɔɔyɛi nɔmnde a kpaaya nɔmndo cɔmndo, Hala kuɛɛ co yɛ o halataala, te kon te o lɛŋnden coo mò tiwba le dɛnnda bɛndula vaa nuaa tosaa a kpaayaa maa nɔm?

²⁵Lelan, a yandi, cɛl mì taŋ peo Yurdɛn le lɛŋnde kɛndɛle co leeloo lon-nden cɔu a lehɔl, le tàndá n'pembu kɛndɛ kon a lɛŋnde Liban-nden cɔu.›

²⁶Kɛ le niaa, Mɛlɛka ndóò tambu nin kɔl a ya. Le hee, o cɛl mì taŋ te. Mó dimul-la aa: ‹Tɔkpɔnndo co hoo ni! I tuɛi lɛ ma buusial-la sɔɛi ken te dɛ!

²⁷Hel o pembei Piska bollen ma mɛɛndian a ba paalen le del-lo, a ba luaŋ-ndo, a ba too a á ba paalen le can-ndo. Mɛɛndian lɛŋnden ɲɛkɛndɛi, kɛ a co peo Yurdɛn taŋɔɔ le few.

²⁸Yɔngu Yosue silalan, luei ndu yoomuan ma simi ndu yili. Kani ndu kɔanin a vannda ha mò yɔngu nda lɛŋnde n co len cɔu len kɛ́ɔ ni.›

²⁹Le hee, mí n lo o bóllo nin Bɛt-Peɔr o hɔl-ndɔ lon.»