Read Kissi Tɔŋ miingua 33 Bible Online

Tɔŋ miingua 33 - Kissi bible

Tɔŋ miingua 33

¹Duaa Moise vana baala Hala-o dɔw Israɛlla telen pá mó vu-o yɔŋnun hoo ni:

²Mó dimi aa: «Mɛlɛka cɛn Sinai mó hun. O cɛn isisi nda coo Seir, o soli pangeloo cɔnɔnndo o pembei Paran, o tiiya o vanaa ndɔa lo a mɛlɛkaa diandaa taw-taw, a ba ndɔ kɛndɔɔ, mó yɔŋ nda tɔŋndo maa leyin.

³A toɲa, a kaola vannda, vanaa diandaa kpow a co o ba nɔmndo bɛngu. Nda kpow a co nɔm o labɛngunin, má va pɛɛkula nɔmndan tueyɔɔ.

⁴Moise yɔngu naa tɔŋndo, kɛ́ɔ co kon le pulun Yakɔb-on ni.

⁵Mí masaa cal Yesurun telen bolii lapangɛi Israɛlla cuungian nda polama Israɛlla-o.

⁶Màá polale Rubɛn-nden le va yoomu! Màá le vu le fɔ́! Màá vanaa co lenin-nda kui taw!»

⁷Mó dɔaw polale Yuda len duaa aa: «Éé Mɛlɛka! Yaŋ polale Yuda len nilan. Mingi nda o vanaa ndaa lo. Màá bala ndalan la cɔlɔba le nda! Màá nɔm pila va vana malaa ndaa le yaamɔaa ndaa cɔlɔbaa!»

⁸Mó dɔaw polale Levii len duaa aa: «Tumim a urim yɔngun vanaa nɔmaa diandaa, vanaa n tɔɔndan Masa-a, vanaa sɛɛngian o mɛnndan Meriba coo-a.

⁹Nda dimi ni aa a ci kala nda a fuɲa nda le. Nda sina puapilɛ le, a sina po vialaa le. Kani a bii sɔɛi nɔmnde, má manda kpema nɔmndo.

¹⁰A co cuavaa Yakɔb-a silala nɔmndan pɛɛkoo, a co Israɛlla tɔŋ nɔmndo tɛɛsiallo. A co ansan lomɔɔ nɔm o milinndo bɛngu, a co sálà loamaa solio o fonda-loamaa-lasálà nɔmndo coo.

¹¹A yandi Mɛlɛka, dɔw vali nda co tosaa-o duaa. Cɛl baala nda co tosaa a bala ndalan-ndo a kɔlkɛndɔɔ. A yandi Mɛlɛka, yimi yaamɔaa ndaa vongalan. Màá vanaa nɔ nɛyɔn ndaa-a can-ndɛ isisi le!»

¹²Mó dɔaw polale Bɛnyamɛn-nden duaa aa: «Vanaa Hala kaola taw-va co kan ni. A calnunnin nila ɲulu ndu ikɛi. Hala co nda mandaa le lɔ́ɔ́-lɔ́ɔ̀. O co icali nda tɛɛn.»

¹³Mó dɔaw polale Yosɛf len duaa aa: «Mɛlɛka dɔw lɛŋnde ndalen duaa a tɔnɔ fula coocoo-o, mɔ́mndo pɛɛn, a mɛmma co lɛŋ di-di-an.

¹⁴O dɔw nda duaa a kulun paalen le co divio-on, a kulun yeelɛin koam ipaangu oo ipaangu-on,

¹⁵a kulun sɔvɛn fula o pembun bɛndun masindɔn coo-on, a kɔmnde fula o pembun pɔmbɔn paandu-paandon coo len,

¹⁶a dɔw nda duaa a kulun sɔvɛn pɛ o lɛŋnden coo-on. Màá kɛndɛi Hala cɔmnun o bɔɔ nin-ndo[43] i hun tol polale Yosɛf len coo! Màá kɛndɛi ken tol polale vana yɔŋnun cua lemasaa puapilɛa ndɔa tɛɛn-ndo[44] len o itendu!

¹⁷Ndu yɔŋnun naw tova ndɔ tasoo ni. Màá o sɔla bɛɛlen! Leela ndɔlan maa leela cìí la co ni. A lan o kundunin vanaa-mangalaa-isɔɔa háá nɛɛ lɛŋnden le mɛɛlu-a ni. Lende sɛ́lɛ́ bɛndu-bɛndu fula Efraim o ipulu-o co ni, lende fàngà-kunda fula o Manase nin-ndo co ni.»

¹⁸Mó dɔaw polale Sabulɔn-nden duaa aa: «Niaa cuavaa-imamaa Sabulɔn-nda, la naŋ kɔl o kelala niaala bɛndulan nin! Niaa cuavaa Isakar-a, la va a kɔlkɛndɔɔ o cɛila-kolala-toandaala niaalan nin!

¹⁹A lonin o pembii ndɛi coo ma yoongu vanaa-mangalaa-isɔɔa lon. A diinin cɔlua, mà soli sálàla dɛnɛ sandaalan ndon. A sɔɔsiaanin tɔnɔ fula o mɛmma ihɛllan nin-ndo, ma de bolofaa co o vianaa o sióónndon nin-ndo.»

²⁰Mó dɔaw polale Kad len duaa aa: «Biiloo co le vana ke polale Kad len falle fɛkɛi-yo! Cuavaa-imamaa Kad-a co ihini maa n'yàlà, a bii pɛ ɲɛ nda co mɛngɛlaa-o, a kandu ndu sɛɛsiaa o congúlan háá o bollen.

²¹A hɛli lɛŋii kɛndɛi le nda pila, kani o ɲɛm mun nin kunda lemasaa co o mandaa ni. A sim vannda laci o kɔlan, má peelu dɛnɛ sandaa Mɛlɛka-o a tɔŋnda ndɔlan le cuavaa Israɛlla.»

²²Mó dɔaw polale Dan-nden duaa aa: «Yàlàà téndéa cuavaa-imamaa Dan-nda co ni. A co cɔnɔnndo a huuloo a labɛɛla kpeekpei o lɛŋnde Basan-nden nin.»

²³Mó dɔaw polale Nɛftali len duaa aa: «Cuavaa-imamaa Nɛftali-a pɛ̀ a kɛndɛi Mɛlɛka-e, a pɛ̀ ma coŋ a duaa Mɛlɛka-o. La hiɔlu lɛŋnden a ba paalen le del-lo a len a ba too!»

²⁴Mó dɔaw polale Asɛr len duaa aa: «Màá duaa va polale Asɛr len coo Israɛlla tɛɛn! Màá a cɔ nda ɲia puapilɛa ndaa tɛɛn! Màá cuɛiyan ma kui nda o ba háá mà pulu pelon lenin!

²⁵Màá sɔkɔma niaan ma va a cilinndon a á daɲan! Màá yoomuan[45] ma lo niaa o n'dial háá piɔ́m niaa!»

²⁶Mí Moise dimi vɛlɛ aa: «Yesurun sei! Vana-vana siiman a Hala le. Ndu buli halataalaa ni le hunɔɔ niaa malaa. Ndu co o biilu ndɔɔ nin o yumbuyumboo nin ni.

²⁷Nɛɛ viannannda Hala co le fɛɛn a fɛɛn-ndo co ni. Bala ndɔlan la co lahavaa lebɛngu yɔŋii niaa del. O co yaamɔaa niaa tovɔɔ niaa laci, mò va niaa dimullo aa: ‹La tɛɛmbuu nda!›

²⁸Israɛlla connun nila ɲulu o calta ndalan. Soon kólaa Yakɔb-o connun teengen o lɛŋnde ɲɛdiaa a mɔima yɛngian ma co nin-nden nin, o lɛŋnde halataalaa co mɔ́mndo tuisio coo len nin.

²⁹Duaa co le niaa, niaa Israɛlla. Kani vana-vana siiman a niaa le. Vanaa Mɛlɛka ciindiaa-a niaa co ni, ndu co kɔ̀ɔ̀ cɔw co niaa manda-o ni, ndu co vɛlɛ mɔɛi cɔvii cɔlɔba le niaa-e ni. Yaamɔaa niaa sangalanin[46] niaa, kɛ niaa la helnin o fondala yesalan[47] coo o lɛŋnde ndalen nin.»