Read Kissi Tɔŋ miingua 34 Bible Online

Tɔŋ miingua 34 - Kissi bible

Tɔŋ miingua 34

¹Mí Moise can o dɛɛlalan Moab nin, mó hel o pembei Nebo coo, Piska o tullo di-di, i co Yeriko o hɔl-ndɔ-e. Mí Mɛlɛka cɔm ndu lɛŋnde Kanaan-nden kpow: kandɔɔ a tàndá Kalaad-o, kɔlan tiiyaa háá Dan,

²keiyo a tàndá Nɛftali-o, tàndá Efraim-ndo a tàndá Manase-o, kɔlan a tàndá Yuda-o kɔlan tiiyaa háá o mɛmma ihɛllan Mediteranee.

³Mó cɔm ndu vɛlɛ tàndàá Nekɛv a dɛɛlalan Yeriko, kobi mavawvo pɛɛn, kɔlan tiiyaa háá Soar.

⁴O kon mí Mɛlɛka dimul ndu aa: «Tofa vɔ lɛŋnde ya yiilu Abraham, Isaak a Yakɔb kpemaa, mí mɛnalan nda le nda len yɔngoo len. Mí dimul nda aa: ‹Lɛŋnden nden ya yɔngunin cuavaa niaa imamaa ni.› I cɔm nɔm Moise lɛŋnde kalalen, má ca len a lehɔl, kɛ a lueinin lenin te.»

⁵O kon mí Moise vana baala Mɛlɛka-o vu lon o lɛŋnde Moab len nin, mɛɛ Mɛlɛka pila ndóò dimi yɛ.

⁶Mí Hala pila kumbu ndu[48] o dɛɛlalan Moab nin, Bɛt-Peɔr o hɔl-ndɔ. Háá paalen nden, vana-vana sina nɛɛ sɛi ndɔɔ co-a le.

⁷Moise ndóò nɔ vɔsilan kɛmɛ a bidiin mó vu, kɛ a kon kpow punda ndóò cel ndu o lahɔl te, ndóò fula mayoomu le.

⁸Mí Israɛlla caŋ ndu o palɛi beleyaa bɛngu o dɛɛlala vesɛilan Moab nin. O kon kɔɔli, mí biisi Moise-o cuu.

⁹Yosue po Nun-ndo ndóò pɛ a yiyan kɔlkaloo taw, kani balan Moise ndóò handu ndu o lebol ni. Kandɔɔ paale len, mí Israɛlla bii ndu diom maa mɛɛ Mɛlɛka ndóò dimul Moise le tosaa yɛ kpafii.

¹⁰O Israɛlla tɛɛn, vana-tɛɛngaa-diom Hala oo vana-tɛɛngaa-diom Hala ndóò sulan a Moise le. Ndu ndu, sakpo Mɛlɛka va suukanndo a ndu ni.

¹¹Mí Mɛlɛka viam ndu sɔɔn kɔndɔfillon a kaamaalan tosaa masaa Esipte, vanaa ndɔa baalaa a vanaa va o lɛŋnde len nin-nda kpow o hɔl.

¹²Israɛlla kpow o hɔl Moise va dɛnnda kpúlúnkùmala lan tosaa ni.