Read Kissi Tɔŋ miingua 4 Bible Online

Tɔŋ miingua 4 - Kissi bible

Tɔŋ miingua 4

¹«Sisa, niaa Israɛlla, la yaŋ nilan o tɔŋndan a o silala ya co niaa pɛɛkoo lan. La bii lan haliko mi la va yoomu, mi la luɛi o lɛŋnde Mɛlɛka, Hala fuɲaa niaa mamaa co niaa yɔngu kɛ́ɔ len nin.

²La handu ɲɛ-ɲɛ o ɲɛ ya pɛɛku niaa-o coo le, la faŋa ɲɛ-ɲɛ lecoo le. La bii tɔŋnda Mɛlɛka Hala niaa, la ya co niaa tɛɛngullo lan.

³Niaa pila ce ciŋ a hɔlta niaalan ɲɛ Mɛlɛka Hala niaa tosa a dɛnɛ piɔmndo Baal-Peɔr-o[3]. Mó diw vanaa va hala kon sooloo o niaa tɛɛn-nda.

⁴Kɛ niaa lo a yiinannda sakpo a Mɛlɛka Hala niaa-a, la co hau yoomu kpow.

⁵La sina maa i pɛɛku niaa tɔŋndan a silalan mɛɛ Mɛlɛka Hala nuu pila dimul-la le tosaa yɛ, haliko mi la bii lan, mì la kela lecoo o lɛŋnde niaa co luɛyɔɔ nin mì la loo len kɛ́ɔ len nin.

⁶La bii lan mì la kela lecoo lende, kon tosanin ni mì vannda ce niaa vanaa kɔlkalua a vanaa dɛnɛ sinaa vanaa-mangalaa-isɔɔa tɔ̀a o hɔl. A tuɛinin kɔlkalu niaa tɔ́ɔ́ mà dimi aa: ‹Vanaa sɛ́lɛ́ bɛndua ha, vanaa dɛnɛ sinaa a vanaa kɔlkalua kposon nda co ni!›

⁷O vanaa-mangalaa-isɔɔa súúlan kpow tɛɛn, hali a co sɛ́lɛ́ bɛndoo-a, ɔ́ɔ̀ a halaa ndaa sɔɔnguu ikɛi kpɛɛlun nuaa mɛɛ Mɛlɛka Hala naa co naa ikɛi yɛ-a? Telen oo telen naa n piɛi ndu pɛ, o co naa ikɛi.

⁸Ɔ́ɔ̀ vanaa-mangalaa-isɔɔa nɔ vɛlɛ tɔŋndan a silala sandaalan maa tɔŋ ya co hoo niaa hau yɔngoo-o-a?»

⁹«Kɛ niaa yɛ, la caa le niaa pila, la mandan, yɔŋii niaa pɔɛɛnun dɛnnda niaa ce a lehɔl mí la yɔŋnun seiya le lan-ndan. La mandan dɛnnda lan o lakɔl le fɛɛn a fɛɛn, la pɛɛku cuavaa niaa a cuavaa niaa imamaa lan.

¹⁰La pɔɛɛnun paale niaa sim Mɛlɛka Hala niaa o hɔl o pembei Horɛb coo len te, paale len mí Mɛlɛka dimul-la aa: ‹Cuungiaa vannda ha ya o hɔl, mì dimul nda sɔɔn nun, haliko ma nɔ siòòŋii nii, mà ke ya bɛɛlen o palɛi nda nɔ le yoomoo o lɛŋnden coo-e nin kpow, mà pɛɛku vɛlɛ poaa ndaa le siòòŋii nii nɔu.›

¹¹O kon mí la sɔɔnguu o pembei bɛngu kpow, mí la sim ndon, telen kon yinnde bɛndu-bɛndulen le va biyɔɔ cɔn o pembei coo háá o halataalaa nin di-di. Le va biyɔɔ o ɲumma bɛnduan a o kumii bɛnduei nin.

¹²Mí Mɛlɛka soaa o niaa lo o yinnden tɛɛn, la va sɔɔn o va dimio-on tueyɔɔ, kɛ la ve vundule ndɔlen cɔ le. Diom ndɔɔ kínɛí niaa va tueyɔɔ ni.

¹³Mó cɔm niaa kpema ndɔɔ, mó dimul niaa le ndu biyɔɔ a le kelaa lecoo, tɔŋnda tɔ́lan pɛɛn, mó sɛva lan o powta yɛ́ndɛ́lan tan tiɔn coo.

¹⁴O telen pilɛ kon, mí Mɛlɛka dimul-la le niaa tɔŋndan a silalan pɛɛkoo, haliko mi la kela lecoo o lɛŋnde niaa keinin nin le len hiɔlɔɔ a loo len nin.»

¹⁵«La mandan taw le niaa pila, kani la ci levundu oo levundu paale Mɛlɛka soo o niaa lo o pembei Horɛb coo o yinnden tɛɛn-nden te.

¹⁶Le hee, la laasian mì la cɔw piɔmnda le, la tuula ɲɛ-ɲɛ le. La cɔaw ɲɛ-ɲɛ a velan vanapɔnɔɔ te kon te a velan vanalanɔɔ le.

¹⁷La tuula ɲɛ-ɲɛ a velan visi oo visi yoomaa co o lɛŋnden coo le, la tuula ɲɛ a velan yow oo yow co kelaa coocoo le,

¹⁸la tuula ɲɛ a velan visia pɔm-pɔmbɔa kela lɛŋ-nda, te kon te a suw oo suw co o peelo o lɛŋnden bɛngu le.

¹⁹La héélù hɔlla o halataala mì la mɛɛndan paalen, paangei, loeon a ɲɛm co lon-ndon, mì la báŋ vulan mun o labɛngunin le mun sooloo le. Ɲɛm Mɛlɛka Hala niaa mel vanaa-mangalaa-isɔɔa tɔ̀a co o lɛŋnden coo kpow-va ni maa kɛ́.

²⁰Kɛ niaa, mó cua niaa, mó soli niaa o tóndó icilin tuwvo nin Esipte, haliko mi la siŋnun vanaa ndɔa a kɛ́ ndɔɔ maa mɛɛ niaa co nihau yɛ.

²¹Mí Mɛlɛka tuulu kɔl a ya le niaa, mó mɛnan aa ya teŋ peo Yurdɛn te, aa ya luei o lɛŋnde kɛndɛle ndu Mɛlɛka Hala niaa yɔngu niaa kɛ́ɔ len nin te.

²²Ya ya, i co vu o fondaa ho nanu, i teŋnin peo Yurdɛn te. Kɛ niaa, la co ndu taŋɔɔ mì la kɔ hiɔlu lɛŋnde kɛndɛle len.

²³La caa, yɔŋii niaa pɔɛɛnun kpema Mɛlɛka Hala niaa yiilu niaa-o, mì la cɔw piɔmnda a tuuliaala súú oo súù. Nduyɛ o kuuna niaa dɛnnda lan.

²⁴Kani maa yinnde loam-nden Mɛlɛka Hala niaa co ni. Hala paŋalaa o co ni.

²⁵Lelan, lɔ́ɔ́ niaa viawnin taw o lɛŋnde len nin-ndo, lɔ́ɔ́ niaa vialunin cuawva mì cuavaa niaa kan velu cuawva-o, te la laasian pɛ mì la cɔw piɔmnda, mì la tuula ɲɛ-ɲɛ, te la tosa pɛ ɲɛ hɛnan Mɛlɛka Hala niaa loo, mì la tuulu ndu kɔl,

²⁶i cua hau halataala a lɛŋnden seilen, la tamalanin le cuvɔɔ o lɛŋnde niaa co Yurdɛn taŋɔɔ le len hiɔlɔɔ len nin te. Yoomu niaa bendunin o lɛŋnde len nin te, kani la co cuvɔɔ itambu kpow.

²⁷Mɛlɛka saŋnin niaa vanaa-mangalaa-isɔaa celen tɛɛn, mì la lo vuo háá mì la dɔɔnan vanaa kan tɛɛn, à Mɛlɛka yaanin niaa tɛɛn a paa-kala-a pɛɛn.

²⁸Lon niaa vanin halaa vanndacieea cɔw-va sooloo ni, á cɔwnun a yɔmnde-a a á cɔwnun a powtan-nda, halaa kan yɛ a ci le, a tui le, a di ɲɛ le, a tui ɲɛ cun te.

²⁹O kon la nuwviaanin Mɛlɛka Hala niaa. La saalunnin ndu, te la muungu pɛ ndu o ibuŋ a kɔlta niaalan kpow a á yoomu niaa kpow.

³⁰Te sangala lan kpow la kei pɛ niaa coo mì la ŋɔɔcian, o kon kɔɔli la muungu o Mɛlɛka Hala niaa lo, la bii diom ndɔɔ.

³¹Kani Mɛlɛka Hala niaa, Hala nɔ ɲííye-o o co ni, o melnin niaa le, o tɛɛmbuunin niaa le. O pɔɛɛnunnin kpema o yiilu fuɲaa niaa mamaa mó mɛnalan nda le ndu peeloo-o le.»

³²«Niaa Israɛlla, la ɲuna vɔ le dɛnnda tosan sindɛ lan, la tosan telen niáà vilun-ndɔ loo lan, kandɔɔ a telen Hala cɔw vanacieo o lɛŋnden coo-o. Kandɔɔ nɛɛ halataala kandun-nda, kɔ bii nɛɛ o mɛɛlu-a, vɛ̀ɛ̀ dɛnɛ kaamaa bɛndu vaa nuaa tosan nin? Vɛ̀ɛ̀ vana tueinin dɛnɛ vaa nuaa?

³³Vanaa-mangalaa-isɔɔa pum co, á tuei Mɛlɛka sɔɛi o yinnden tɛɛn maa niaa Israɛlla má lo yoomu-a?

³⁴Vɛ̀ɛ̀ hala pum co o kɔ soli vanaa-mangalaa-isɔɔa pum le ndu pila o vanaa-mangalaa-isɔaa celen tɛɛn a dɛnnda bɛndulan, a kaamaalan, a kɔndifiltan, a cɔwlan a á kpaaya bɛndoo a vannda siòònde lueiyo-o? Nduyɛ lende Mɛlɛka Hala niaa soli niaa o lɛŋnde Esipte len nin ni, niaa pila co seiya le ken.

³⁵Hala cɔm niaa kon kpow haliko mi la sina maa Mɛlɛka ndu pilɛ kpé co Hala ni, Hala celen co o ndu kɔɔli le.

³⁶O tosa mí la tuɛi diom ndɔɔ fulaa o halataala le niaa pɛɛkoo. O lɛŋnden coo, mó cɔm niaa yinnde ndɔle bɛndulen, mí la tuɛi diom ndɔɔ sɔɛi lenin.

³⁷Kani ndóò kaola fuɲaa niaa mamaa, mó hɛli niaa cuavaa ndaa imamaa o nda kɔɔli. Lelan ndu pila soli niaa o lɛŋnde Esipte nin a kpaaya bɛndoo ni,

³⁸haliko mo tow vanaa-mangalaa-isɔaa hiow niaa vaa sɛ́lɛ́ má hiaw niaa kpaayaa-a niaa laci, le niaa lueiyo o lɛŋnde ndalen nin a le niaa lɛŋnde len yɔngoo maa kɛ́, mɛɛ o co hunɔɔ tosa o paalen nden nin hau yɛ.

³⁹La sina hau sɔɛi he pɛɛngu mì la mandan ndi o kɔl, maa Mɛlɛka ndu pilɛ kpé co Hala ni. Kandɔɔ o halataala, hunɔɔ tiiyaa o lɛŋnden coo, Hala celen co le.

⁴⁰Lelan, la bii silala ndɔlan a tɔŋnda ndɔla ya co niaa tɛɛngullo hau lan, haliko mi sɔla dɛnɛ kɛndɔɔ, niaa pila a cuavaa niaa fɛɛn-fɛɛn. Handɔɔ o kon coo, mì la viow yoomu o lɛŋnde Mɛlɛka Hala niaa yɔngu niaa le fɛɛn a fɛɛn-nden coo.»

⁴¹«O kon mí Moise hɛli kobilan tan yáá Yurdɛn leeloo a ba paalen le can-ndo,

⁴²mí kobila lan la va le vionnɔnndo. Vana-vana sulalle fula pɛ o ba, mó dii vanacieo o co a kɔlvesɛi le, te ndóò nɔ nɛyɔn ndɔ le, vana kon nɔla mò ɲaanun, mò kɔ vionnun o kobila lan o pilɛ nin le yoomu ndɔɔ baŋaa.

⁴³Kobi viannan va le polale Rubɛn-nden ndo va Besɛr ni, ò va o tangulaa o dɛngbɛ co o pembei coo-o nin o lɛŋnde veselɛilen nin. Kobi viannan va le polale Kad len-ndo va Ramɔt ni, o tàndá Kalaad-o nin. O va le polale Manase len-ndo va Kolan ni, o tàndàá Basan nin.»

⁴⁴«Tɔŋndo ho Moise tɛɛsial Israɛlla ni,

⁴⁵silalan, tɔŋndan a sɔɔn o tɛɛngul nda telen nda faŋan Esipte-o-on.

⁴⁶Tuma ndáà kila dɔ́ɔ́ngɔ́ɔ̀ Yurdɛn leeloo a ba paalen le can-ndo-o, o dɛɛlaa nin Bɛt-Peɔr o hɔl-ndɔ, o tàndá masaa Sihon-ndo nin o dimul nda sɔɔn mun ni. Masa Amoriaa kan va icali Hɛsbɔn ni, kɛ mí Moise a Israɛlla a nɔla ndu telen nda cɛn Esipte-o.

⁴⁷Má hialu lɛŋnde ndɔlen a lɛŋnde Ɔk len, masaa Basan pɛɛn. Masaa ŋiɔŋaa kan va masalen tosaa o tàndàla va Yurdɛn leeloo lan coo ni, a ba paalen le can-ndo.

⁴⁸Mí Israɛlla cal o lɛŋnde cɛn a Aroɛr o kɔngɔ feke-feke peo Arnɔn-ndo coo mí le kɔ tiiya o pembei Sion[4] coo len nin, pembei Hɛrmɔn pɛɛn.

⁴⁹Ma hialu vɛlɛ dɛɛla bɛndoo Yurdɛn a ba paalen le can-ndo, kɔ bii a mɛmma hɛlii bɛnduan o pembei Piska bɛngu.»