Read Kissi Tɔŋ miingua 5 Bible Online

Tɔŋ miingua 5 - Kissi bible

Tɔŋ miingua 5

¹Mí Moise cuungiaa Israɛlla kpow, mó dimul nda aa: «Israɛlla, la yaŋ nilan o silalan a o tɔŋnda ya co niaa hau tɛɛngullo kpendekele lan. La bɛnda mì la pɛɛku lan, mì la bii lan, mì la kela lecoo.

²Mɛlɛka Hala naa yii kpemaa a naa o pembei Horɛb.

³O co ko a fuɲaa naa daama le o yii kpemaa kon te, kɛ o yii ndu vɛlɛ a naa n co haa hau yoomu nuna-a.

⁴Mí Mɛlɛka soaa a niaa sakpo o yinnden tɛɛn, o pembei coo.

⁵Ya i va isisi Mɛlɛka a niaa tɛɛn le niaa sɔɛi ndɔɛi tɛɛngullo. Kani siòònde va niaa a yinnde va lon-nden, lelan la hel o pembei coo le. Sɔɔn Mɛlɛka dimi telen kon-ndon va mun ni:

⁶‹Ya co Mɛlɛka ni, Hala niaa pɛɛn. Ya soli niaa o lɛŋnde Esipte len nin ni, lɛŋnde niaa va nin o cɛlen nin-nden.

⁷Lelan, la bɛnda mi la sooluu halaa celen o ya kɔɔli le.

⁸La selnun piɔmnda le. La tuula ɲɛ-ɲɛ le: o va ɲɛm co o halataala-on, o va ɲɛm co o lɛŋnden coo-on, o va ɲɛm co o mɛnndan nin o lɛŋnden bɛngu-on.

⁹La baŋ vulan ɲɛm mun o labɛngunin te, la sooluu mun te. Kani ya Mɛlɛka Hala niaa, Hala paŋalaa ya co ni. I soaŋ cuavaa vanaa nɔ nɛyɔn nuu-a le hakila fuɲaa ndaa, i soaŋ cuavaa ndaa háá o lambi yàándɔɔ, háá o lambi hiɔɔlundɔɔ bɛɛ.

¹⁰Kɛ vanaa kaola ya má bii tɔŋnda nilan-nda, i lo nda kɛndɛi tosallo háá o lambi vaa pilɛndɔɔ.

¹¹La pial diola Mɛlɛka Hala niaa o fondo fúúo coo[5] le, kani vana pɛl pɛ diola ndɔlan o fondo fúúo coo, Mɛlɛka tuisi vana kon dɛnɛ palaa coo.

¹²La loonun a paale pɛngiaalen mì la ce len maa lediandaalen le co ni, maa mɛɛ Mɛlɛka pila dimul niaa le tosaa yɛ.

¹³La bɛnda mì la tosa baalaa o palɛi ndii ŋɔmpum bɛngu, mì la toosiaa kpekula niaalan kpow.

¹⁴Kɛ paale ŋɔmmɛwndɔlen, paale pɛngiaale diandaale co le Mɛlɛka Hala niaa len le co len ni. La tosa baala oo baala o paale len coo le, kandɔɔ a niaa pila, poaa niaa, cuavaa niaa laandua, cɛa niaa piaandua a à laandua, navaa niaa, sofɛlɛa niaa, cɔlua niaa kpow, kɔ bii a mialaa co niaa o bɛngu coo-a, haliko mi cɛa niaa piaandua a à laandua sɔla pɛngio mɛɛ niaa pila co va pɛngio yɛ.

¹⁵La loonun maa cɛa niaa yɔŋnun o lɛŋnde Esipte len nin ni, maa Mɛlɛka Hala niaa soli niaa lon a kpaaya bɛndoo ni. Lelan ndu Mɛlɛka Hala niaa ke niaa tɔŋndo le paale pɛngiaalen biyɔɔ ni.

¹⁶La ke fuɲaa niaa a kalaa niaa bɛɛlen maa mɛɛ Mɛlɛka Hala niaa dimul niaa le tosaa yɛ, haliko mi la viow yoomu, mì la sɔla dɛnɛ kɛndɔɔ o lɛŋnde Mɛlɛka Hala niaa co niaa yɔngu len nin.

¹⁷La dii vanacieo le.

¹⁸La suunda le.

¹⁹La yɔŋ levui le.

²⁰La timbul caanda seile lacòòvalen te.

²¹La fúlà lanɔ pilaa lehɔl te, la fúlà cɛi pilaa lehɔl te, la fúlà ciɛi pílɛi, cɛ piaandu pilaa, cɛ laandu pilaa, naw pilaa, sofɛlɛ pilaa lehɔl te. La fúlà ɲɛ-ɲɛ co ɲɛ pilaa lehɔl te.›

²²Sɔɔn mun Mɛlɛka dimi kpendekele o yinnden tɛɛn, o kumii bɛnduei nin le vanaa va isisi o pembei bɛngu-a kpow ni. O hendu ɲɛ-ɲɛ lecoo le. O kon kɔɔli, mó sɛva mun o powta yɛ́ndɛ́lan tan tiɔn coo, mó yɔngu ya lan.»

²³«Nduyɛ, mɛɛ niaa tuei diomndo fulaa o ɲumndan nin, telen pembei kpow va a yinnde bɛndulen-ndo, mí la sɔɔnguu ya ikɛi niaa vanaa va bolii lapangɛi niɛi-ya a simlacia niaa latulu,

²⁴mí la dimi aa: ‹A toɲa, Mɛlɛka Hala naa cɔm naa biilu ndɔɔ a bɔɔbɔɔyɛi ndɔɛi, n tuei diom ndɔɔ fulaa vakpa o yinnden nin. N sína hau lekɛ́ndɛi maa Hala nɔla mò soo o vanacieo lo kpendekele, mì vanaciee kon lo yoomu.

²⁵Sisa yɛ niko, le yɛɛ naa n co yɛ naa pila dɛnɛ kondɔn mi n sɔla piɔ́mndo? Yinnde bɛndulen nden le nɔla mì le diw naa kpow. Te n lo pɛ diom Mɛlɛka Hala naa tueyɔɔ nuaa, n co vu.

²⁶Kani o ceendo coo, vana-vana co, o tuɛi diom Hala yoomaa sɔɛi o yinnden tɛɛn, mò lo yoomu maa naa Israɛlla-o le.

²⁷Lelan, nɔm Moise pila sɔɔnguu. Kɔ ma kɔ yaŋ nilan o ɲɛ Mɛlɛka Hala naa diminin-ndo kpow, mà hun tɛɛngul naa sɔɔn mún. N yaŋnin nilan o sɔɔn mún mì n tosa mɛɛ o diminin yɛ.›

²⁸Tuma niaa va ya sɔɛi ken dimullo-o, mí Mɛlɛka tuɛi. Mó dimul-la aa: ‹I tuei sɔɛi vannda ha dimul nɔm-nde, sɔɛi-sɔɛi nda dimi, i bɛnda.

²⁹Te ndáà lo niko pɛ o yiyan kɛndɔɔ ho coo, mì ndáà biilu ya a bɛɛlen, mì ndáà kela lepalaa-lepala o tɔŋnda nilan biyɔɔ nin, ɲɔɔ ndóò naŋnin bɔɔ, haliko mi nda a cuavaa ndaa imamaa ndáà sɔla dɛnɛ kɛndɔɔ le lɔ́ɔ́-lɔ́ɔ̀.

³⁰Lelan, kɔ dimul nda mà muungu o cɛila-kolala-toandaala ndalan nin.

³¹Nɔm Moise pila yɛ, ma lo ya ikɛi nanu. I co nɔm tɔŋndan, silalan a sɔɔn n pɛɛkunin nda-on yɔngu, haliko ma kɔ kela lecoo o lɛŋnde ya yɔngunin nda kɛ́ɔ len nin.›

³²Le hee, la kindin mi la tosa ɲɛ Mɛlɛka Hala niaa dimul niaa-o, la sei o ba kɛndɛ coo le, la sei o ba mɛl coo le.

³³La kɔ o nɛi Mɛlɛka Hala niaa cɔm niaa-o coo sakpo. Kon tosanin ni mì la sɔla dɛnɛ kɛndɔɔ, mì la viow yoomu o lɛŋnde niaa co kɔlan hiɔlɔɔ len nin.»