Read Kissi Tɔŋ miingua 7 Bible Online

Tɔŋ miingua 7 - Kissi bible

Tɔŋ miingua 7

¹«Lɔ́ɔ́ Mɛlɛka Hala niaa lueinin niaa o lɛŋnde niaa co kɔlan luɛyɔɔ nin le len hiɔlɔɔ len nin-ndo, te o tow pɛ Hitiia, Kirkasiia, Amoriia, Kanannda, Perisiia, Heviia a Yebusiia niaa laci, vanaa-mangalaa-isɔɔa kundala ŋɔmmɛvaa hiow niaa kan sɛ́lɔ́ɔ́ a kpaayaa-a,

²te Mɛlɛka Hala niaa mal nda pɛ niaa o ba mi la nɔla nda, la bɛnda mì la cii nda kpede. La bɛnda mì la yii kpema oo kpema a nda le, la bɛnda mì la nɔ iɲíí a nda le.

³La yii nɔlan niaa ndaa le, la kɛsi cuavaa niaa laandua o nɔlan poaa ndáà o ba le, la cua cuavaa ndaa laandua o nɔlan le poaa niaa le.

⁴Kani te nɔlan la luɛi pɛ niaa tɛɛn, cuavaa ndaa faŋannin poaa niaa ya kɔɔli, mà yɛɛ nda halaa celen kɔɔli, mà sooluu nda. Te i yɔŋnun yɛ pɛ lende, mɛɛ ya Mɛlɛka, kɔltuw nuu toalnin niaa coo, mì cii niaa diw kpow.

⁵Kɛ la tuei-yɔ mɛɛ niaa tosanin a nda yɛ: la bɛnda mì la koombiaa máánnda ndalan, mì la pesi powta ndala sálàlan, mì la koombiaa sungbuma ndama soolan, mì la lom piɔmaa nda sɛl-la.

⁶Kani niaa, vanaa diandaa niaa co le Mɛlɛka Hala niaa ni. Ò hɛli niaa o vanaa súúla yɛ́-yɛ́a co o lɛŋnden coo-a kpow tɛɛn, haliko mi la va a ndɔa.»

⁷«Holnɔn Mɛlɛka holnun niaa mó hɛli niaa-o, o co nuaa maa niaa le hiow vaa sɛ́lɛ́ a vanaa-mangalaa-isɔɔa tɔ̀a le. A toɲa, niaa hiow dɔɔnanndo a vanaa tɔ̀a ni,

⁸kɛ le tùú Mɛlɛka kaola niaa taw-vo, le tùú o yeema le kpema o yiilu fuɲaa niaa mamaa mó mɛnalan nda-o peeloo-o, lelan o puu niaa Faraɔnnɔɔ, o co masaa Esipte-o o ba a kpaayaa ni, mó soli niaa o celen nin.

⁹Lelan, la sina pɛngu maa Mɛlɛka Hala niaa, ndu pilɛ kpé co Hala kpeekpeiyo ni, Hala lo o lediom coo-o, Hala lo o kpema ndɔɔ coo-o, ó tosal vanaa kaola ndu má bii tɔŋnda ndɔlan-nda kɛndɛi háá o lambi vàá pilɛ ndɔɔ,

¹⁰kɛ mò mingul vanaa nɔ nɛyɔn ndɔɔ-a màá, mó ŋɔɔciaa nda-o. O tamala le vana nɔ nɛyɔn ndɔɔ-o lukpaa le, sakpo o mingul ndu màá ni.

¹¹Lelan, la bii tɔŋndan, silalan a sɔɔn ya co niaa mun hau dimullo-on, mì la kela lecoo.

¹²Te la yaŋ pɛ nilan o tɔŋndan ndan, te la bii pɛ lan mì la kela lecoo, Mɛlɛka Hala niaa peelunin kpema o yiilu fuɲaa niaa mamaa mó mɛnalan nda le lou o lediom coo-o.

¹³O kaolanin niaa, mò dɔw niaa duaa, mò vangala niaa, mò dɔw hɔ́aa niaa duaa. O dɔawnin ɲɛm niaa vanin váà a tɔlɔɔ-on duaa: kandɔɔ maalon, rɛsɛnndon, kɔ bii a olivieela niaalan. O vangalanin cɔlua niaa taw: nawva, saa a cuinnda, mà kui o lɛŋnde o yiilu fuɲaa niaa mamaa kpemaa mó mɛnalan nda le nda len yɔngoo len nin.

¹⁴La sɔlanin duaa hiovɔɔ vanaa-mangalaa-isɔaa celen kpow coo. Vanapɔnɔ lɛmbɛ-vílɛ́i venin niaa tɛɛn te, vanalanɔ bɔlɔkɛ[7] venin niaa tɛɛn te, cɔlu bɔlɔkɛ venin o cɔlua niaa tɛɛn te.

¹⁵Mɛlɛka faŋanin niaa nààlan kpow ikɛi, o tuisinin nààla halimala o tuisi Esiptea coo lan niaa coo le. Nduyɛ, niaa pila sina nààla lan válán. Kɛ o tuisinin vanaa nɔ nɛyɔn niaa-a kpow nààla lan coo.

¹⁶La bɛnda mì la diw vanaa-mangalaa-isɔɔa Mɛlɛka Hala niaa malnin niaa o ba-a kpow. La bɛnda mì la nɔ iɲíí a nda le, la sooluu halaa ndaa le, kani yaŋɔɔlen dɛnɛ kon vanin le niaa ni.

¹⁷Bɔɔle la diminin aa: ‹Vanaa-mangalaa-isɔaa kan hiow naa vaa sɛ́lɛ́, vɛ̀ɛ̀ naa n nɔla yɛnin mi n hɛlu lɛŋnden nda o ba?›

¹⁸Kɛ siòòŋii bii niaa a nda le. La loonun-ndɔ a ɲɛ Mɛlɛka Hala niaa tosal masaa Esipte a lɛŋnde len kpow-vo.

¹⁹La loonun a tɔɔndannda bɛndula niaa ce a lehɔl-tan, la loonun a kaamaalan a á sɔɔn kɔndɔfilin niaa ce-on, a mɛɛ Mɛlɛka Hala niaa soli niaa a kpaaya bɛndoo o lɛŋnde Esipte len nin yɛ. Lende koni Mɛlɛka Hala niaa tosanin a vanaa-mangalaa-isɔaa niaa co haa siòònde yɔŋndo-a kpow ni.

²⁰Handɔɔ o kon coo, o tuisinin nda sunbungaa coo, mà diw vanaa hialunnin niaa mà vennun-nda.

²¹La yɔŋ isiòòn mì la ɲiiya nda o hɔl te, kani Mɛlɛka Hala niaa, o co niaa tɛɛn-ndo, Hala bɛndoo a kpúlúnkùmaa o co ni.

²²Kɛ nduyɛ, o pɔm-pɔmbɔ Mɛlɛka Hala niaa toawnin vanaa-mangalaa-isɔaa co niaa laci-a ni. La nɔ́lànin nda tovɔɔ o lepilɔɔ kpow le, yɔŋii visia biyaa kuilul niaa taw-taw.

²³Mɛlɛka Hala niaa co niaa vanaa-mangalaa-isɔaa kan malɔɔ o ba, mò lo nda tovɔɔ háá mà cuu vu kpow.

²⁴O malnin masaa ndaa niaa o ba, mì la ɲumi diola ndalan o lɛŋnden coo. Vana-vana nɔlanin niaa simullo le. La co nda cii diw kpow.

²⁵La bɛnda mì la lom piɔmaa nda cuá maa halaa nda-a. Kɛ la del o tɔɔndan nin le volion a sianin kumbu nda-on cuaa le. La cua mun te. Dɛnɛ kon nɔla mò va yaŋɔɔlen le niaa, kani dɛnɛ nɔɔlɛi bɛndoo pila dɛnɛ kon co Mɛlɛka Hala niaa o hɔl ni.

²⁶La luei ɲɛ nɔɔlɛiyo o cɛila niaalan nin te, yɔŋii niaa va o kpòndò dangaa bɛngu maa ɲɛ nɔɔlɛi kon. La cɔ ɲɛ vaa lendeo maa ɲɛ nɔɔlɛi bɛndoo o co ni, mò kuisin niaa, kani o dangaa bɛngu o co ni.»