Read Kissi Tɔŋ miingua 8 Bible Online

Tɔŋ miingua 8 - Kissi bible

Tɔŋ miingua 8

¹«Tɔŋnda ya co niaa yɔngoo hau lan kpow, la kindin mì la bii lan, mì la kela lecoo, haliko mi la va yoomu, mì la kui taw, mì la hɛlu lɛŋnde Mɛlɛka yiilu fuɲaa niaa mamaa kpemaa mó mɛnan le nda len keo len.

²La loonun a nɛi Mɛlɛka Hala niaa yɛɛ niaa coo o vɔsila belehiɔɔlulan-ndan bɛngu o lɛŋnde veselɛilen nin-ndo. O tosa kon le niaa siɛmbulan tuisio, le niaa tɔɔndanndo, le yiyannda co niaa o kɔl-tan sinaa a le sinaa te niáà biinin tɔŋnda ndɔlan.

³A toɲa, mó tuisi niaa siɛmbulan a yiaan coo. Kɛ o kon kɔɔli, mó yɔngu niaa manne le dioo, niáà sina paandu ɲɛdiaa kon te, fuɲaa niaa mamaa bɛɛ a sina ndu le. O tosa kon kpow le niaa cɔmndo maa o co ko ɲɛdiaa daama le tosa mì vanacieo va yoomu le, kɛ sɔɔn fula Mɛlɛka o sondo-on kpow n tosa ni mì vanacieo va yoomu[8].

⁴Volɔɔla niaa va cuɛinɔnndo lan la siɔŋ niaa lekɔɔ le, pelun hiinduu niaa a kɔlan o vɔsila belehiɔɔlulan-ndan bɛngu le.

⁵Lelan, la yiyan o sɔɔn mun coo, la bìí bila maa Mɛlɛka Hala niaa co niaa pɛɛkoo mɛɛ fuɲaa pɛɛku hɔ́ɔ́ ndɔɔ nuaa yɛ.

⁶Le hee, la bìí tɔŋnda ndɔlan, la kela o nɛila o cɔm niaa lan coo, mì la nɔ siòòŋii ndɔɛi.»

⁷«Ɲɔɔ bendu lɛ le mì Mɛlɛka Hala niaa luei niaa o lɛŋnde kɛndɛlen nin, lɛŋnde mɛnndan ma co nin taw len, lɛŋnde dalalan a peela pɔmbɔlan la co nin taw len, mɛmma man ma co fulaa o pembon coo a o bóltan nin.

⁸Tɔlɔɔla naŋ o lɛŋnde len nin taw lan la co lan ni: maalon, ɔrse, rɛsɛnndon, vooson, krenadiee, oliviee a lɛan[9].

⁹La venin ɲɛdiaa dioo a buulanndo le siɔdii o lɛŋnde len nin te, kani ɲɛ-ɲɛ venin niaa lepɛŋ te. Cilinndon co o powta co o lɛŋnde len nin-ndan nin, la vanin daɲan kalaa o pembun co o lɛŋnde len nin-ndon.

¹⁰La sɔlanin ɲɛdiaa lon taw-taw, la vanin dioo mì la va pumndo, mì la va Mɛlɛka Hala niaa balikaa mello le lɛŋnde kɛndɛle o yɔngunin niaa len nden.

¹¹Kɛ la caa dɛ! Yɔŋii niaa pɔɛɛnun Mɛlɛka Hala niaa, mì la kɛɛ le tɔŋnda ndɔlan, silala ndɔlan a sɔɔn ndɔn ya co niaa hau tɛɛngullo-on biyɔɔ.

¹²Te la kɔ va pɛ dioo a pumndo, te la kɔ tangul pɛ cɛila kɛndɛlan mì la va lenin,

¹³te cɔlua niaa bɛndua a à pɔmbɔa kɔ kui pɛ taw, te volion a sianion kɔ kui pɛ niaa o ba, te ɲɛm niaan kpow n kui pɛ,

¹⁴fɔ mì la mandan, yɔŋii niaa luɛi yongaa mì la pɔɛɛnun Mɛlɛka Hala niaa. Nduyɛ, Hala kon soli niaa Esipte nɛɛ niaa va o cɛlen nin-nda ni.

¹⁵Ndu sim niaa laci le keiyo o lɛŋnde veselɛile bɛndule luei len vana siòònde len nin ni, le co len lepiaalen a kɛvaa lólòla nɛyaa a á ngeemaa len. O fondala vesɛila mɛmma co nin te lan, mó solul niaa mɛmma kɛndɛan o pow kpova kàlà-kálàá.

¹⁶O lɛŋnde veselɛile len nin, mó dɔaw niaa balo a manne, o fuɲaa niaa mamaa ndáà sina sindɛ loo. O tosa kon kpow le niaa siɛmbulan tuisio a le niaa tɔɔndanndo, haliko mo tosal niaa dɛnɛ kɛndɔɔ siɔdii laci.

¹⁷Lelan, la caa, yɔŋii niaa hun dimi aa: ‹A yoomuma naan a á kpaayaa naa naa n sɔla bolofaa ho kpow ni›.

¹⁸La bɛnda mì la loonun maa Mɛlɛka Hala niaa co niaa yoomuan yɔngoo le ɲɔɔn sɔlaa ni. O co kon tosaa hau le kpema o cuel fuɲaa niaa mamaa-o peeloo le niaa, ciɛ́ɔn o cuel nda mó mɛnan, mó yiilu nda kpemaa-on pɛɛn.

¹⁹Kɛ te la pɔɛɛnun pɛ Mɛlɛka Hala niaa, te la sooluu pɛ halaa fondoa, te la tosal pɛ nda vallo mì la baŋ vulan nda o labɛngunin, i co niaa ndi dimul hau, la vunin kpow.

²⁰Te la tosa pɛ lende, la cuunin vu maa vanaa-mangalaa-isɔɔa Mɛlɛka Hala niaa toawnin niaa laci-a, kani la biinin diom ndɔɔ le.»