Read Kissi Nsaŋ 11 Bible Online

Nsaŋ 11 - Kissi bible

Nsaŋ 11

¹Mí langbanɔ nɔ diolan aa Lasar-o del a nàá. Betani, o ciee Mari nda Marte pɔmbɔ ndɔ-o o va ni.

²Mari yɔŋnun vanalanɔ taaliaa Maalii cuɛima cun kɛndɛan o n'pelu, mó vɔɔsuu ndu pelon a yiiŋii ndɔɛi-yo ni, yema ndɔ va Lasar ni, ó va a naa-o.

³Mí vanlaandua va kan pɔmbɔɔ a bɛndoo-a viam vanndo le kɔlan Yeesu dimullo maa Lasar caan ndɔ kɔllo co a nàá.

⁴Yeesu tueyɔɔ dɔ́ɔ́ lende, mó dimi aa: «O co le piɔ́m sɔla le naa hoo bii ndu le, kɛ le biilu Hala-o cɔmndo, haliko mi Po Hala-o sɔla biiloo.»

⁵Yeesu ndóò kaola Marte, pɔmbɔ ndɔ a Lasar.

⁶Ndóò tueyɔɔ maa Lasar co a nàá, mó lo nɛɛ o va-a le palɛi ndii ŋiin,

⁷o kon kɔɔli, mó dimul kaandennda aa: «N muungun Yuda.»

⁸Mí kaandennda dimul ndu aa: «Kɔɔfa, pɛi sun Yuifia va nɔm nuwviaa le nɔm viiyo a powtan le nɔm diyɔɔ ni, vɛ̀ɛ̀ a yeema vɛlɛ mà muungu lon?»

⁹Mí Yeesu muli aa: «Vɛ̀ɛ̀ o co lɛɛlɛlan tɔ́ a latiɔn te la co o paalen nin te? Vanndo va pɛ kelaa ipala, o boŋ te, kani o co ɲɛ-tengaa ceendo ho cɔu.

¹⁰Kɛ te vanndo va pɛ kelaa icɔl, boŋndo o boŋ ni, kani o nɔla cɔu le.»

¹¹Ndóò ciiyo sɔɔn mun dimio, mó dimul nda aa: «O lɔan Lasar caan naa co ni, kɛ i co lakɔ ndu tindi.»

¹²Mí kaandennda dimul ndu aa: «Maalii, te o lɔan o co ni, mɛɛ o co tiondɔɔ.»

¹³A piɔ́m Lasar-o o kɔɔ Yeesu va sɔɛi lende ni, kɛ mí nda ca maa a lɔma kpeekpeiyan o kɔɔ o va sɔɛi ni.

¹⁴O kon mí Yeesu dimul nda kpendekele aa: «Lasar vi.

¹⁵I naŋ kɔl le niaa, le tùú ya kɛɛ va o hɔl-ndɔ-o, haliko mi la laalan. Kɛ n kɔnnun nɛɛ o co-a.»

¹⁶O kon mí Tomas nda veelu aa Didim-ndo dimul kaandeŋaa tɔ̀a aa: «Naa bɛɛ n kɔnnun mì n kɔ vunnun naa Yeesu-aa.»

¹⁷Telen Yeesu tiiya-o, o komal ndáà cii nin Lasar kumbɔɔ, ndóò tosa nin palɛi ndii hiɔɔlu o sɛiyo nin.

¹⁸Nduyɛ Betani ve Yerusalɛm levil te, o va le tiŋ kilola yaa.

¹⁹Yuifia taw a va hunɔɔ o Marte a o Mari lo, le nda yilɔɔ biisi yema nda-o.

²⁰Telen Marte tuei maa Yeesu co hunɔɔ-o, mó kɔa ndu bɔŋa, mí Mari ndu lo icali cɛinin.

²¹Mí Marte dimul Yeesu aa: «Maalii, te nɔm óò va pɛ nanu, yema nuu ve vu le.

²²Kɛ o va bɛɛ sunsun, i sínà maa ɲɛ-ɲɛ n piɛi pɛ Hala, o ke nɔm ndu.»

²³Mí Yeesu dimul ndu aa: «Yema nɔm co muungu yoomu.»

²⁴Mí Marte mulul ndu aa: «I sínà maa o muungunin yoomu o paale mɛɛlaalen.»

²⁵Mí Yeesu dimul ndu aa: «Ya co tendul vanvílɛ́iya a yoomoo ni. Vana laalan ya pɛ, o vanin yoomu, hali o vu bɛɛ.

²⁶Nduyɛ, vana-vana va pɛ yoomu, mò laalan ya, ndu vinin te. A laalan ken?»

²⁷Mí Marte muli aa: «Oi Maalii, i laalan maa nɔm co Krista ni, Po Hala-o pɛɛn, óò bɛnda le hunɔɔ o ceendo nin-ndo.»

²⁸Mɛɛ Marte cii sɔɔn mun dimi, mó kɔa Mari pɔmbɔ ndɔ veelu, mó kɔ dimul ndu tootoo aa: «Vana bɛndoo co nanu, o co nɔm veelu.»

²⁹Mari tueyɔɔ dɔ́ɔ́ lende, mó can ɲaali, mó kɔa nɛɛ Yeesu va-a.

³⁰Nduyɛ, Yeesu ndóò luei-yɔ ciee le, o va vɔ nɛɛ Marte bɔŋa ndu-a.

³¹Yuifia va cɛinin Mari ikɛi má va ndu ɲɔɔloo-a cɔu Mari cɔnɔnndo ɲaali le fulaa, má del ndu kɔɔli, a va yiyanndo maa o sɛiyo coo o co kɔlan caŋndo ni.

³²Mí Mari tiiya nɛɛ Yeesu va-a, ndóò cɔu ndu dɔ́ɔ́, mó del ndu o labɛngunin, mó dimul ndu aa: «Maalii, te nɔm óò va pɛ nanu, yema nuu ve vu le.»

³³Yeesu cɔu ndu caŋndo nda Yuifia va ndu kɔɔli-a, mí dɛnɛ kon pilan ndu kɔllo, mí kɔllo laasian ndu nin,

³⁴mó ɲuna aa: «Kuɛɛ niaa kɛsi yɛ dialun ndɔn?» Má mulul ndu aa: «Maalii, hun tofa vɔ.»

³⁵Mí Yeesu caŋ.

³⁶O kon mí Yuifia dimi aa: «La ce, ndóò yeema ndu dɛ!»

³⁷Kɛ mí vannda pum o nda tɛɛn a va dimio aa: «Ndu kumbi vana sumɛiyo hɔltan-ndo, ndóò nɔla tosa mi poo ho ndóò lo yoomu le?»

³⁸Mí dɛnnda lan la pilan vɛlɛ Yeesu kɔllo, mó kɔa o sɛiyo. O buululan nin ndáà kumbu ndu ni, má handu pow bɛndoo o sondoo.

³⁹Mí Yeesu dimi aa: «La faŋa powvo.» Mí Mari yemaa langbanɔ vi kon-ndo dimul ndu aa: «O co nin cunndo fulaa, kani palɛi hiɔɔlu co nihau hoo ni.»

⁴⁰Mí Yeesu dimul ndu aa: «I dimul nɔm, maa taa laalan pɛ, a canin biilu Hala-o?»

⁴¹O kon má faŋa powvo. Mí Yeesu heelu hɔlla coocoo, mó dimi aa: «Pua, i mel nɔm balika le tùú n mulul-la-o.

⁴²Ya, i sínà maa a co ya mulullo lɔ́ɔ́-lɔ́ɔ̀, kɛ le sɛ́lɛ́ sim hoo nan-ndo ya co sɔɛi nuaa ni, haliko ma sina maa nɔm vem ya ni.»

⁴³Ndóò ciiyo dimio lende, mó yonda a diom bɛndoo aa: «Lasar, fula!»

⁴⁴Mí vana vílɛ́i kon fula, pelon a balan va ndu la yiyaalan a kolala n'pɛngɛlan, hɔlla va ndu a simbulaa a fengbɔɔ. Mí Yeesu dimul nda aa: «La tiimbuu ndu, mì la mal ndu, mò kɔɛ.»

⁴⁵O Yuifia tɛɛn, vanaa bɔɔ-bɔɔ aa hin o Mari lo-a cɔu dɛnnda lan, má laalan Yeesu.

⁴⁶Kɛ mí vanaa pum o nda tɛɛn a kɔ komal Faliisia, má dimul nda dɛnɛ o tosa-o.

⁴⁷O kon mí bolii vanaa-solia-lasálàá a Faliisia mɔɔsiaa vanaa kialaa n'yamaa lelɛŋnda, má dimul nda aa: «Vɛɛ naa n co yɛ tosa? Kani langbanɔɔ ho co bɔɔ dɛnnda kaamaalan tosaa.

⁴⁸Te n mal pɛ ndu lende, vannda kpede a co ndu laalan, o kon mì Rɔmnda hun tɛɛmbuu fonda naa diandaa a lɛŋnde naalen.»

⁴⁹Mí vana pilɛ o nda tɛɛn, Kaif va vɔsi kon bolle vanaa-solia-lasálàá-o dimul nda aa: «La co ɲɛ-ɲɛ bila biyɔɔ le.

⁵⁰La co sina le maa o co fisa mì vana pilɛ vi le lɛŋnden kpow a vanndacieea co o lɛŋnden nden nin-nda kpede vuo?»

⁵¹Nduyɛ, o ve o ndu pila nin te ndóò dimi sɔɛi ken te, kɛ le tùú o va vɔsi kon bolle vanaa-solia-lasálàá-o, mó dimi sɔɛi ndíì hun tosannin o siɔdii lacio nin-nde, maa Yeesu ndóò bɛnda mì ndóò sɔla piɔ́mndo le lɛŋnden.

⁵²O va vu le lɛŋnden, kɛ mì ndóò mɔɔsiaa vɛlɛ cuavaa Hala-a co a sɛŋiannda-a, haliko ma muungu dialle ndii pilɛ.

⁵³Kandɔɔ paale len, má can nɛilan nuwviaa le ndu diyɔɔ.

⁵⁴Lelan, Yeesu ve lɛ kela Yuifia o hɔl kpendekele le, kɛ mó faŋan ndon, mó kɔannun o tàndá va o lɛŋnde veselɛilen ikɛi-yo nin, o kobi nɔ diolan aa Efraim-ndo nin. Mó kɔ va lon nda kaandeŋaa ndɔa.

⁵⁵Kafo Yuifia va nin kpɛɛlun, kafo-hiavaa-coo pɛɛn, mí vanaa bɔɔ-bɔɔ a va fulaa o cieon pɔmbɔn a o kobila tɔ̀lan nin, má va kɔlan Yerusalɛm le dindinndo.

⁵⁶A va Yeesu nuwviaa, má va ɲuunianndo vellaa-velle aa: «La yiyan maa o hinnin o kafoo le?»

⁵⁷Nduyɛ, bolii vanaa-solia-lasálàá a Faliisia ndáà dimúl nin vannda maa vana-vana sina pɛ nɛɛ o co-a, vana kon cɔɔmuu ndu, haliko ma kɔ bii ndu.